ឯកឧត្តម ជួប ប៉ារីស៍៖ ការប្រែប្រួលអាកាសធាតុ នឹងអាចកាត់បន្ថយផលិតផលក្នុងស្រុកសរុប ២,៥% នៅឆ្នាំ២០៣០ និង ៩,៨% នៅឆ្នាំ២០៥០ ប្រសិនមិនមានវិធានការឆ្លើយតបសមស្រប
ភ្នំពេញ៖ ឯកឧត្តមបណ្ឌិត ជួប ប៉ារីស៍ រដ្ឋលេខាធិការក្រសួងបរិស្ថាន បានថ្លែងឲ្យដឹងថា ការសិក្សារួមគ្នារវាងក្រសួងបរិស្ថាន និងក្រសួងសេដ្ឋកិច្ចនិងហិរញ្ញវត្ថុ បានបង្ហាញថា ការប្រែប្រួលអាកាសធាតុនឹងអាចកាត់បន្ថយផលិតផលក្នុងស្រុកសរុប ចំនួន ២,៥% នៅឆ្នាំ២០៣០ និងរហូតដល់ ៩,៨% នៅឆ្នាំ២០៥០ ប្រសិនមិនមានវិធានការឆ្លើយតបសមស្របនោះទេ ។
នេះជាការថ្លែងបញ្ជាក់របស់ឯកឧត្តមបណ្ឌិត ជួប ប៉ារីស៍ ក្នុងឱកាសអញ្ជើញបើកសិក្ខាសាលាអភិវឌ្ឍន៍សមត្ថភាព ស្តីពីការប្រែប្រួលអាកាសធាតុសម្រាប់អ្នកជំនាញសារព័ត៌មាន និងវិស័យឯកជន នាថ្ងៃទី២៥ ខែកញ្ញា ឆ្នាំ២០២៤នេះ ។ សិក្ខាសាលានេះ នឹងប្រព្រឹត្តទៅរយៈពេល ៣ថ្ងៃ ចាប់ពីថ្ងៃទី២៥-២៧ ខែកញ្ញា ឆ្នាំ២០២៤ នៅសាលប្រជុំប្រាជ្ញ ស៊ុន ជាន់ទី២ នៃទីស្តីការក្រសួងបរិស្ថាន ។
ឯកឧត្តមបណ្ឌិត ជួប ប៉ារីស៍ បានមានប្រសាសន៍ថា ការសិក្សាស្រាវជ្រាវរួមគ្នាបែបវិទ្យាសាស្រ្ត គឺជាសក្ខីភាពមួយបញ្ជាក់ពីការប្តេជ្ញាចិត្តរបស់យើងក្នុងការចូលរួមចំណែកដោះស្រាយបញ្ហាប្រឈមនានាពាក់ព័ន្ធនឹងការប្រែប្រួលអាកាសធាតុដែលបាននិងកំពុងកើតឡើង។
ឯកឧត្ដមបន្តថា ប្រទេសកម្ពុជា ជាប្រទេសដែលងាយរងគ្រោះបំផុតពីផលប៉ះពាល់នៃការប្រែប្រួលអាកាសធាតុ ជាពិសេសគ្រោះទឹកជំនន់ រាំងស្ងួត ខ្យល់ព្យុះ រលកកំដៅ និងការជ្រាបចូលនៃទឹកសមុទ្រ។ ឯកឧត្ដមបញ្ជាក់ថា «ការសិក្សារួមគ្នារវាងក្រសួងបរិស្ថាន និងក្រសួងសេដ្ឋកិច្ចនិងហិរញ្ញវត្ថុ បានបង្ហាញថា ការប្រែប្រួលអាកាសធាតុនឹងអាចកាត់បន្ថយផលិតផលក្នុងស្រុកសរុប ចំនួន ២,៥% នៅឆ្នាំ២០៣០ និងរហូតដល់ ៩,៨% នៅឆ្នាំ២០៥០ ប្រសិនមិនមានវិធានការឆ្លើយតបសមស្របនោះទេ។ ដូចច្នេះ អាទិភាពចម្បងរបស់កម្ពុជា គឺការកសាងភាពធន់ក្នុងវិស័យ សេដ្ឋកិច្ច និងសង្គម ដើម្បីកាត់បន្ថយនូវផលប៉ះពាល់បណា្តលមកពីការប្រែប្រួលអាកាសធាតុលើ វិស័យកសិកម្ម ធនធានទឹក សុខភាពមនុស្ស ហេដ្ឋារចនាសម្ព័ន្ធ តំបន់ឆ្នេរ និងប្រព័ន្ធអេកូស៊ីព្រៃឈើ»។
ឯកឧត្ដមរដ្ឋលេខាធិការ បន្ថែមថា នាពេលថ្មីៗនេះ ក្រសួងបរិស្ថានបានទទួលធ្វើជាម្ចាស់ផ្ទះនៃកិច្ចប្រជុំលើកទី៦ ថ្នាក់រដ្ឋមន្ត្រីបរិស្ថានមហាអនុតំបន់មេគង្គ និងកិច្ចប្រជុំពាក់ព័ន្ធ ចាប់ពីថ្ងៃទី១០-១៣ ខែកញ្ញា ឆ្នាំ២០២៤ នៅរាជធានីភ្នំពេញ។ ការផ្សព្វផ្សាយព័ត៌មាននៃកិច្ចប្រជុំលើកទី៦ ថ្នាក់រដ្ឋមន្ត្រីបរិស្ថានមហាអនុតំបន់មេគង្គ និងកិច្ចប្រជុំពាក់ព័ន្ធបានទទួលលទ្ធផលតាមការរំពឹងទុក និងបានបង្ហាញជូនថ្នាក់ដឹកនាំ និងដៃគូរទាំងអស់ពីលទ្ធផលសម្រេចបាននៃការផ្តួចផ្តើមរបស់កម្ពុជាតាមរយៈយុទ្ធនាការ «ថ្ងៃនេះខ្ញុំមិនប្រើថង់ផ្លាស្ទិក » និង «កម្ពុជាស្អាត ខ្មែរធ្វើបាន» និង អនុម័តលើក្របខ័ណ្ឌយុទ្ធសាស្ត្រឆ្នាំ២០៣០ ដែលដោះស្រាយបញ្ហាប្រឈមរបស់តំបន់មេគង្គ និងផ្តល់នូវកាលានុវត្តភាពសម្រាប់ការទាញយកធនធានបច្ចេកទេស និងហិរញ្ញវត្ថុសម្រាប់អភិវឌ្ឍន៍សេដ្ឋកិច្ច និងសង្គមសម្រាប់ប្រទេសទាំង៦ ជាពិសេសម្រាប់កម្ពុជាយើង ៕
