អ្នកសារព័ត៌មានមកពី២៥ស្ថាប័ន សារព័ត៌មានល្បីៗក្នុងប្រទេសកម្ពុជា ចូលរួមផ្សព្វផ្សាយគុណតម្លៃរបស់គម្រោងរេដបូកកែវសីមាចំពោះសហគមន៍ជនជាតិដើមភាគតិចក្នុងខេត្តមណ្ឌលគិរី
ភ្នំពេញ៖ អង្គការ WCS កម្ពុជា សហការជាមួយក្រសួងបរិស្ថាន បានដឹកនាំដំណើរទស្សនកិច្ចសារព័ត៌មានទៅកាន់ដែនជម្រកសត្វព្រៃកែវសីមាកាលពីថ្ងៃទី២១ដល់២៣ ខែកញ្ញា ឆ្នាំ២០២៤ កន្លេងទៅនេះ។
បើតាមអង្គការ WCS ក្នុងដំណើរទស្សនកិច្ចរយៈពេលបីថ្ងៃនេះ អ្នកសារព័ត៌មានបានស្រង់យកព័ត៌មានដោយផ្ទាល់ពីសហគមន៍អំពីគុណតម្លៃនិងសមិទ្ធផលនានាដែលសហគមន៍ទទួលបានពីគម្រោងរេដបូកកែវសីមា។
អ្នកសារព័ត៌មានបានចុះជួបសហគមន៍ក្នុងភូមិអណ្តូងក្រឡឹង ភូមិពូតាំង និងភូមិពូត្រុំ ដើម្បីយកព័ត៌មានសំខាន់ៗអំពីទេសចរណ៍ធម្មជាតិដូចជាទឹកធ្លាក់ឡែងកៅ ជំរំទោចចាហ៊ូ Jahoo Gibbon Camp សកម្មភាពបណ្តុះកូនឈើ សកម្មភាពលើកស្ទួយជីវភាពសហគមន៍ដូចជាការដាំដុះបន្លែនិងការចិញ្ចឹមសត្វរបស់សហគមន៍ សហគ្រាសប្រមូលផលផ្លែឈើសហគមន៍ សិប្បកម្មត្បាញក្រមាខ្មែរ និងក្រុមសន្សំប្រាក់សហគមន៍។ អ្នកសារព័ត៌មានក៏បានជួបផ្ទាល់ជាមួយសិស្សានុសិស្សនិងយុវជនក្នុងសហគមន៍គម្រោងរេដបូកកែវសីមាដែលទទួលបានអាហារូបករណ៍ដើម្បីសិក្សាបន្តនិងការសិក្សាជំនាញវិជ្ជាជីវៈដើម្បីប្រកបរបរចិញ្ចឹមជីវិត។
ក្រុមអ្នកសារព័ត៌មានបានស្វែងយល់ដោយផ្ទាល់អំពីការចុះបញ្ជីនិងការគ្រប់គ្រងដីសមូហភាពជនជាតិដើមភាគតិច ប្រពៃណីវប្បធម៌ជនជាតិដើមភាគតិចព្នង (ពូនង) ដូចជាការត្បាញក្រមាតាមប្រពៃណីជនជាតិដើមភាគតិច ការសម្តែងរបាំ និងឧបករណ៍តន្ត្រីរបស់ពួកគាត់ជាដើម។ ជាពិសេសទៅទៀតនោះ អ្នកសារព័ត៌មានបានស្វែងយល់អំពីជំនឿរបស់ជនជាតិដើមតិចស្តីអំពីទំនាក់ទំនងរវាងព្រៃកប់សព ព្រៃដំណម និងការអភិរក្សព្រៃឈើនៅក្នុងសហគមន៍។
ក្រុមអ្នកសារព័ត៌មានក៏បានផ្តិតយកព័ត៌មានដោយផ្ទាល់ទាក់ទងនឹងវិធីសាស្រ្តបែងចែកផលប្រយោជន៍សហគមន៍ក្នុងសហគមន៍រេដបូក «ថវិការេដបូកសម្រាប់សហគមន៍» ឬហៅកាត់ថា C4C ដែលសហគមន៍ប្រើប្រាស់ថវិកានេះដើម្បីអភិវឌ្ឍន៍សហគមន៍ទៅតាមតម្រូវការអាទិភាពរបស់ខ្លួនដូចជា ការកសាងប្រព័ន្ធទឹកស្អាត ការបំពាក់អំពូលសូឡាតាមផ្លូវ ប្រព័ន្ធលូទឹក ការជួសជុលនិងកសាងផ្លូវនិងសាលារៀន។ល៕
