រដ្ឋបាលខេត្តបាត់ដំបង ចុះសួរសុខទុក្ខកងកម្លាំងប្រដាប់អាវុធទិសទី៣ យោធភូមិភាគទី៥ ក្នុងឱកាសបុណ្យភ្ជុំបិណ្ឌប្រពៃណីជាតិខ្មែរ
ភ្នំពេញ៖ នៅថ្ងៃទី២៦ ខែកញ្ញា ឆ្នាំ២០២៤ នៅទីបញ្ជាការកងពលតូចថ្មើរជើងលេខ៥២ បានទទួលស្វាគមន៍ដំណើរអញ្ជើញចុះសួរសុខទុក្ខ របស់រដ្ឋបាលខេត្តបាត់ដំបង ដឹកនាំដោយ ឯកឧត្តម អ៊ុយ រី ប្រធានក្រុមប្រឹក្សាខេត្ត ឯកឧត្តម សុខ លូ អភិបាល នៃគណៈអភិបាលខេត្តបាត់ដំបង ដែលបានដឹកនាំប្រតិភូខេត្ត អញ្ជើញចុះសំណេះសំណាល សួរសុខទុក្ខ កងកម្លាំងប្រដាប់អាវុធ ទិសទី៣ យោធភូមិភាគទី៥ ក្នុងឱកាសបុណ្យភ្ជុំបិណ្ឌប្រពៃណីជាតិខ្មែរ នៅទីបញ្ជាការកងពលតូចថ្មើរជើងលេខ៥២ ស្ថិតនៅភូមិផ្លូវមាស ឃុំផ្លូវមាស ស្រុករតនមណ្ឌល ខេត្តបាត់ដំបង។
ក្នុងសុន្ទរកថាស្វាគមន៍ របស់លោកឧត្តមសេនីយ៍ត្រី គុជ នាង មេបញ្ជាការកងពលតូចថ្មើរជើងលេខ៥២ បានបញ្ជាក់ថា ក្នុងនាមកងយោធពលខេមរភូមិន្ទ មានតួនាទី ការពារបូរណភាពទឹកដី ការពារ ជាតិ សាសនា ព្រះមហាក្សត្រ និងរាជរដ្ឋាភិបាលស្របច្បាប់ កងពលបានអនុវត្តផែនការ តាមឋានានុក្រម ពិសេសផែនការ មេបញ្ជាការ យោធភូមិភាគទី៥ ធ្វើឱ្យអង្គភាពពង្រឹងបានការងារគ្រប់គ្រងកម្លាំងទ័ព ការកសាង និងពង្រឹងប្រៀបការពារជាតិ ការងារបច្ចេកទេស ធានាបានទាន់ពេលវេលា ដើម្បីត្រៀមលក្ខណៈទប់ទល់ទៅនឹងល្បិចកលគ្រប់រូបភាពរបស់បច្ចាមិត្តដែលមានបំណងចង់បំផ្លាញសន្ដិភាព ការពារដាច់ខាតទោះក្នុងតម្លៃណាក៏ដោយ។
លោកឧត្តមសេនីយ៍ត្រី គុជ នាង ក៏បានគោរពថ្លែងអំណរគុណចំពោះ ឯកឧត្តមប្រធានក្រុមប្រឹក្សាខេត្ត ឯកឧត្តម អភិបាល នៃគណៈអភិបាលខេត្តបាត់ដំបង ដែលតែងតែយកចិត្តទុកដាក់ដឹកនាំប្រតិភូខេត្តចុះសួរសុខទុក្ខដល់កងកម្លាំងប្រដាប់អាវុធទូទាំងខេត្តក្នុងឱកាសបុណ្យជាតិដូចជា៖ បុណ្យចូលឆ្នាំ និងបុណ្យភ្ជុំបិណ្ឌប្រពៃណីជាតិខ្មែរ ព្រមទាំងបាននាំយកនូវអំណោយជាសម្ភារគ្រឿងឧបភោគបរិភោគ និងថវិកា យ៉ាងច្រើនសន្ធឹកសន្ធាប់មកផ្តល់ជូនដល់កងកម្លាំងផងដែរក្នុងន័យសមរភូមិក្រោយ តែងតែផ្សារភ្ជាប់ជានិច្ចជាមួយសមរភូមិមុខ។
ក្នុងឱកាសអញ្ជើញចុះសួរសុខទុក្ខនោះដែរ ឯកឧត្តម អភិបាល នៃគណៈអភិបាលខេត្តបាត់ដំបង បាននាំយកនូវអំណោយ របស់រដ្ឋបាលខេត្តផ្ដល់ជូនកងកម្លាំងកងពលតូចថ្មើរជើងលេខ៥២ រួមមាន ភេសជ្ជៈ ចំនួន ៣០កេស ទឹកសុទ្ធ ចំនួន ៥០កេស នំអន្សមជ្រូក ចំនួន ១ស្លឹក សាច់ជ្រូកស្រស់ ចំនួន ៦០គីឡូក្រាម បន្លែស្រស់ ចំនួន ៥០គីឡូក្រាម និងថវិកា ចំនួន ៦.០០០.០០០ រៀលផងដែរ៕
