ប.ស.ស. បើកប្រជុំដើម្បីពង្រឹងលក្ខខណ្ឌ បែបបទ និងនីតិវិធីសំខាន់ៗ ជាមួយមូលដ្ឋានសុខាភិបាលឯកជន ដែលជាដៃគូ ប.ស.ស. ទូទាំងប្រទេស

ភ្នំពេញ៖ នៅរសៀលថ្ងៃទី២៦ ខែកញ្ញា ឆ្នាំ២០២៤នេះ ឯកឧត្តម ម៉េង ហុង ប្រតិភូរាជរដ្ឋាភិបាលទទួលបន្ទុកជាអគ្គនាយក ប.ស.ស. នៃក្រសួងការងារ និងបណ្ដុះបណ្ដាលវិជ្ជាជីវៈ បានអញ្ជើញជាអធិបតីបើកកិច្ចប្រជុំជាមួយមូលដ្ឋានសុខាភិបាលឯកជន ដែលជាដៃគូ ប.ស.ស. សរុបចំនួន ១៥៥មន្ទីរពេទ្យ ទូទាំងប្រទេស ដើម្បីផ្សព្វផ្សាយវឌ្ឍនភាពអំពីលក្ខខណ្ឌ បែបបទ និងនីតិវិធីនៃការចុះកិច្ចព្រមព្រៀង គុណភាព នៃការផ្តល់សេវាសុខាភិបាល និងការត្រួតពិនិត្យ តាមដានការស្នើសុំទូទាត់ថ្លៃសេវាព្យាបាល នៅសាលប្រជុំសន្ដិភាព ស្នាក់ការកណ្ដាល រាជធានីភ្នំពេញ។

មានប្រសាសន៍បើកកិច្ចប្រជុំនេះ ឯកឧត្តមប្រតិភូរាជរដ្ឋាភិបាល បានស្នើដល់ លោក លោកស្រី នៃអង្គប្រជុំ តំណាងឱ្យមូលដ្ឋានសុខាភិបាលឯកជនដែលជាដៃគូ សូមជួយផ្ដល់ជាធាតុចូល និងលើកបញ្ហាប្រឈមដែលកើតមានឡើងនៅតាមមូលដ្ឋានសុខាភិបាល ដើម្បីរួមគ្នាដោះស្រាយ ធ្វើយ៉ាងណាឱ្យការចូលប្រើប្រាស់សេវារបស់សមាជិក ប.ស.ស. នៅតាមមូលដ្ឋានសុខាភិបាលទាំងអស់ កាន់តែងាយស្រួល ឆាប់រហ័សជាងមុន ជាពិសេសត្រូវឈ្វេងយល់ពីប្រព័ន្ធគ្រប់គ្រងមូលដ្ឋានសុខាភិបាលដៃគូទាំងអស់ ដើម្បីងាយស្រួលក្នុងការត្រួតពិនិត្យ និងតាមដានឯកសារ ហើយទន្ទឹមនេះ មូលដ្ឋានសុខាភិបាលដៃគូ ត្រូវអនុវត្តតាមខ្លឹមសារនៃកិច្ចព្រមព្រៀងឱ្យបានល្អ ត្រឹមត្រូវ និងមានប្រសិទ្ធភាព។

ឯកឧត្តមប្រតិភូរាជរដ្ឋាភិបាល បានបន្ដថា កន្លងមកមូលដ្ឋានសុខាភិបាល ពុំអាចធ្វើការតាមដាន ការចុះកិច្ចព្រមព្រៀង ឬការទូទាត់ថ្លៃសេវាព្យាបាលរបស់ខ្លួនបានឡើយ។ បន្ទាប់ពីចូលរួមក្នុងកិច្ចប្រជុំនេះ តំណាងមូលដ្ឋានសុខាភិបាល នឹងអាចតាមដានឯកសាររបស់ខ្លួនបានតាមរយៈប្រព័ន្ធតាមដានឯកសារ (Tracking System)។

ឯកឧត្តមប្រតិភូរាជរដ្ឋាភិបាល បានថ្លែងបន្ដថា នៅពេលដែលប្រព័ន្ធកាន់តែងាយស្រួល ការទូទាត់កាន់តែឆាប់រហ័ស មូលដ្ឋានសុខាភិបាលក៏ត្រូវពង្រឹងបន្ថែមការផ្ដល់សេវារបស់ខ្លួនឱ្យបានកាន់តែល្អប្រសើរ ប្រកបដោយគុណភាព សំដៅធ្វើយ៉ាងណាឱ្យការផ្ដល់សេវាកាន់តែល្អ ជៀសវាងបង្កឱ្យមានភាពមិនប្រក្រតីណាមួយកើតមានឡើង៕