លោក កើត ឆែ ជួបសំណេះសំណាល និង ណែនាំដល់បុគ្គលិកនិងអ្នកបើកបររថយន្ត ក្រុងសាធារណៈ ដែលត្រៀមដឹកជញ្ជូនប្រជាពលរដ្ឋទៅស្រុកកំណើត ក្នុងឱកាសបុណ្យភ្ជុំបិណ្ឌ

ភ្នំពេញ៖ នៅថ្ងៃទី២៦ ខែកញ្ញា ឆ្នាំ ២០២៤ លោក កើត ឆែ អភិបាលរង នៃគណៈអភិបាលរាជធានីភ្នំ តំណាងដ៏ខ្ពង់ខ្ពស់ ឯឧត្តម ឃួង ស្រេង អភិបាលនៃគណៈអភិបាលរាជធានីភ្នំពេញ បានអញ្ជើញជួបសំណេះសំណាល និងណែនាំដល់បុគ្គលិក និងអ្នកបើកបររថយន្តក្រុងសាធារណៈ (City  Bus ) រាជធានីទាំងអស់ដើម្បីត្រៀមដឹកជញ្ជូនបងប្អូនប្រជាពលរដ្ឋ ពីរាជធានីភ្នំពេញទៅតាមបណ្ដាខេត្ត និងពីបណ្តាខេត្តមករាជធានីភ្នំពេញវិញ ដោយជិះមិនបង់ប្រាក់ ក្នុងឱកាសបុណ្យភ្ជុំបិណ្ឌ ប្រពៃណីជាតិខ្មែរនាពេលខាងមុខនេះ រយៈពេល៥ ថ្ងៃ ចាប់ពីថ្ងៃទី ៣០ ខែកញ្ញា ដល់ថ្ងៃទី៤ ខែតុលា ឆ្នាំ២០២៤។

លោក កើត ឆែ អភិបាលរង នៃគណៈអភិបាលរាជធានីភ្នំ បានណែនាំដល់បុគ្គលិកដែលត្រូវបំពេញភារកិច្ចទាំងអស់ ត្រូវបើកបរគោរពចរាចរណ៍ ត្រូវមានការអធ្យាស្រ័យយោគយល់ខ្ពស់ ត្រូវប្រកាន់ភ្ជាប់ក្នុងការបំរើសេវាប្រជាពលរដ្ឋឱ្យបានល្អរួសរាយរាក់ទាក់ មិនត្រូវយកប្រាក់ពីប្រជាពលរដ្ឋឬមិនត្រូវឱ្យប្រជាពលរដ្ឋបង់ប្រាក់ជាដាច់ខាត សូមប្រកាន់ភ្ជាប់ការទទួលខុសត្រូវខ្ពស់ដើម្បីដឹកជញ្ជូនប្រជាពលរដ្ឋទាំងទៅទាំងមកប្រកបដោយសុវត្ថិភាព និងផាសុកភាព៕