គណៈកម្មាការចំពោះកិច្ចរៀបចំការប្រកួតកីឡាយុទ្ធគុនចម្រុះខ្មែរបុរាណ “ពានរង្វាន់ សម្តេចធិបតី” ស្នើឱ្យគ្រប់ភាគីពាក់ព័ន្ធត្រូវរួមគ្នាធ្វើការដោយយកចិត្តទុកដាក់

ភ្នំពេញ៖ នារសៀលថ្ងៃទី២៦ ខែកញ្ញា ឆ្នាំ២០២៤ គណៈកម្មាការចំពោះកិច្ច បានបើកកិច្ចប្រជុំដើម្បីរិះរកវិធីសាស្ត្រក្នុងការរៀបចំការប្រកួតយុទ្ធគុនចម្រុះ «ពានរង្វាន់ សម្តេចធិបតី» លើកទី១ ធ្វើយ៉ាងណាឱ្យបានកាន់តែអធិកអធម និងមានភាពទាក់ទាញខ្លាំង។

កិច្ចប្រជុំនេះបានធ្វើឡើងនៅទីស្នាក់ការគណៈកម្មាធិការជាតិអូឡាំពិកកម្ពុជា ក្រោមអធិបតីភាពឯកឧត្ដមបណ្ឌិត ថោង ខុន ទេសរដ្ឋមន្ត្រី និងជាប្រធានគណៈកម្មការចំពោះកិច្ចរៀបចំការប្រកួតកីឡាយុទ្ធគុនចម្រុះខ្មែរបុរាណ “ពានរង្វាន់ សម្តេចធិបតី” ព្រមទាំងមានការចូលរួមពីសំណាក់ ឯកឧត្ដម លោកជំទាវ ជាអនុប្រធានអចិន្ត្រិយ៍ និងអនុប្រធាន នៃគណៈកម្មាការ ចំពោះកិច្ចរៀបចំការប្រកួតកីឡាយុទ្ធគុនចម្រុះខ្មែរបុរាណ “ពានរង្វាន់សម្តេចធិបតី” ផងដែរ។

ជាមួយគ្នានេះ សម្រាប់គោលដៅនៃកិច្ចប្រជុំ បានផ្ដោតសំខាន់ទៅលើការយកចិត្តទុកដាក់ក្នុងការងារលម្អិតនៃការរៀបចំកម្មវិធីប្រកួតកីឡាយុទ្ធគុនចម្រុះខ្មែរបុរាណ “ពានរង្វាន់ សម្តេចធិបតី” ហើយគ្រប់ផ្នែក ភាគីពាក់ព័ន្ធទាំងអស់ ទាំងផ្នែកសន្តិសុខសណ្តាប់ធ្នាប់ ផ្នែកផ្សព្វផ្សាយ ជាពិសេសក្រសួងព័ត៌មាន ត្រូវតែរួមគ្នាធ្វើកិច្ចការងារនេះដោយប្រយ័ត្ន និងប្រកបដោយដោយវិជ្ជាជីវៈច្បាស់លាស់ ដើម្បីលើកគុណតម្លៃក្បាច់គុនដូនតារបស់ខ្មែរយើង៕