ឯកឧត្តមបណ្ឌិត លី ឆេង និងលោកជំទាវ ព្រមទាំងក្រុមការងារ អញ្ជើញសូត្រមន្ត និងស្តាប់ធម្មទេសនា ក្នុងពិធីកាន់បិណ្ឌវេនទី១០ នៅវត្តសំពៅមាស
ភ្នំពេញ៖ នារសៀលថ្ងៃទី២៦ ខែកញ្ញា ឆ្នាំ២០២៤ ឯកឧត្តមបណ្ឌិត លី ឆេង ប្រធានស្តីទីគណៈកម្មការទី៩ នៃរដ្ឋសភា តំណាងរាស្ត្រមណ្ឌលរាជធានីភ្នំពេញ រួមជាមួយ ក្រុមការងារថ្នាក់សង្កាត់ទាំង៨ ក្នុងខណ្ឌ៧មករា បានអញ្ជើញសូត្រមន្ត និងស្តាប់ធម្មទេសនា ក្នុងពិធីចូលកាន់បិណ្ឌវេនទី១០ នៅវត្តសំពៅមាស ស្ថិតនៅសង្កាត់បឹងព្រលឹត ខណ្ឌ៧មករា រាជធានីភ្នំពេញ។
ក្នុងពិធីនេះ ក៏មានការអញ្ជើញចូលរួមពីសំណាក់ ប្រធានក្រុមប្រឹក្សាខណ្ឌ អភិបាលនៃគណៈអភិបាលខណ្ឌ សមាជិក-សមាជិកាក្រុមប្រឹក្សាខណ្ឌ អភិបាលរងខណ្ឌ ចៅសង្កាត់-ចៅសង្កាត់រង-សមាជិកក្រុមប្រឹក្សាសង្កាត់ទាំង៨ នៃខណ្ឌ ៧មករា ព្រមទាំង ថ្នាក់ដឹកនាំ បុគ្គលិក នៃប៊ែលធី គ្រុប និងពុទ្ធបរិស័ទចំណុះជើងវត្តសំពៅមាស ជាច្រើននាក់ផងដែរ។
ជាមួយគ្នានេះដែរ ឯកឧត្តមបណ្ឌិត លី ឆេង និងលោកជំទាវ ព្រមទាំងក្រុមការងារ ក៏បាននាំយកនូវបច្ច័យ ព្រមទាំងគ្រឿងឧបភោគ បរិភោគមួយចំនួន វេរប្រគេនព្រះសង្ឃគ្រប់ព្រះអង្គ ដើម្បីឧទ្ទិសកុសលផលបុណ្យជូនទៅដល់វិញ្ញាណក្ខន្ធបុព្វការីជន មាន មាតាបិតា ជីដូនជីតា ញាតកាទាំងប្រាំពីរសន្ដាន និងឥស្សរជន វីរជន យុទ្ធជន ដែលបានលះបង់ជីវិត ដើម្បីបុព្វហេតុជាតិមាតុភូមិ និងប្រជាជន៕
