រដ្ឋមន្ត្រីអប់រំ៖ តាមរយៈកិច្ចសហប្រតិបត្តិការ និងភាពជាដៃគូបន្តរវាងកម្ពុជា-កូរ៉េ នឹងជួយពង្រឹងប្រទេសទាំងពីរបង្កើតអនាគតមួយ ដែលមានភាពល្អប្រសើរ សម្រាប់ប្រជាជន និងប្រទេសទាំងមូល

ភ្នំពេញ៖ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា តំណាងរាជរដ្ឋាភិបាលកម្ពុជា នាថ្ងៃទី២៦ ខែកញ្ញា ឆ្នាំ២០២៤ បានអញ្ជើញជាអធិបតី ក្នុងពិធីបុណ្យជាតិនៃសាធារណរដ្ឋកូរ៉េ និងមានការចូលរួមពីសំណាក់ ឯកឧត្តម ឯកអគ្គរដ្ឋទូតសាធារណរដ្ឋកូរ៉េប្រចាំនៅព្រះរាជាណាចក្រកម្ពុជា ឯកឧត្តម លោកជំទាវ ថ្នាក់ដឹកនាំរាជរដ្ឋាភិបាល ឯកឧត្តម លោកជំទាវ តំណាងស្ថានទូត និងភាគីពាក់ព័ន្ធ។

ក្នុងឱកាសនេះ ឯកឧត្តម ឯកអគ្គរដ្ឋទូតសាធារណរដ្ឋកូរ៉េប្រចាំនៅព្រះរាជាណាចក្រកម្ពុជា បានបង្ហាញសេចក្តីសោមនស្សរីករាយយ៉ាងខ្លាំង ចំពោះការប្រារព្ធពិធីអបអរសាទរទិវាបុណ្យជាតិនៃសាធារណរដ្ឋកូរ៉េនេះឡើង និងបានថ្លែងអំណរគុណយ៉ាងជ្រាលជ្រៅដល់ ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី និងភាគីពាក់ព័ន្ធទាំងអស់ ដែលបានចូលរួម និងធ្វើឱ្យពិធីនេះកាន់តែមានភាពវិសេសវិសាលថែមមួយកម្រិតទៀត កិច្ចសហប្រតិបត្តិការយ៉ាងជិតស្និទ្ធរវាងប្រទេសទាំងពីរ ជាពិសេសចំពោះឆ្នាំ២០២៤នេះ ដែលសម្តេចមហាបវរធិបតី នាយករដ្ឋមន្ត្រី នៃព្រះរាជាណាចក្រកម្ពុជា បានធ្វើដំណើរទស្សនកិច្ច និងពិភាក្សាការងារនៅប្រទេសកូរ៉េនាពេលកន្លងទៅ បានធ្វើឱ្យមិត្តភាព និងការសហការគ្នាកាន់តែមានភាពរឹងមាំបន្ថែមទៀត។ ប្រទេសកូរ៉េ បាននិងកំពុងបន្ត ជួយគាំទ្រមកប្រទេសកម្ពុជាលើវិស័យជាច្រើន ដូចជាវិស័យ នយោបាយ វិស័យសេដ្ឋកិច្ច វិស័យវប្បធម៌ ដែលនាំឱ្យអាជីវកម្ម និងការវិនិយោគនៅប្រទេសកម្ពុជាមានភាពរីកចម្រើន ការពង្រឹងហេដ្ឋារចនាសម្ព័ន្ធ ការដឹកជញ្ជូន ការគ្រប់គ្រងធនធានទឹក សុខាភិបាល ការអភិវឌ្ឍន៍នៅតំបន់ជនបទ និងគុណភាពអប់រំ ដូចជាការផ្តល់អាហារូបករណ៍ជាដើម ដើម្បីអភិវឌ្ឍន៍ធនធានមនុស្ស ក្នុងគោលដៅអភិវឌ្ឍន៍សេដ្ឋកិច្ចកម្ពុជា ឆ្លើយតបនឹងចក្ខុវិស័យរបស់រាជរដ្ឋាភិបាល។

តាងនាមរាជរដ្ឋាភិបាលកម្ពុជា ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានចូលរួមអបអរសាទរចំពោះពិធីបុណ្យជាតិនៃសាធារណរដ្ឋកូរ៉េនេះ និងបានថ្លែងអំណរគុណយ៉ាងជ្រាលជ្រៅដល់ ឯកឧត្តម ឯកអគ្គរដ្ឋទូតសាធារណរដ្ឋកូរ៉េប្រចាំនៅព្រះរាជាណាចក្រកម្ពុជា និងភាគីពាក់ព័ន្ធនៃប្រទេសកូរ៉េទាំងអស់ ដែលបានសហការ និងជួយគាំទ្រមកលើប្រទេសកម្ពុជានាពេលកន្លងមក។ ប្រទេសកម្ពុជា និងប្រទេសកូរ៉េ បានកសាងទំនាក់ទំនងមិត្តភាពដ៏រឹងមាំ តាមរយៈកិច្ចសហប្រតិបត្តិការយ៉ាងទូលំទូលាយក្នុងវិស័យនយោបាយ សន្តិសុខ ពាណិជ្ជកម្ម ការវិនិយោគ និងការផ្លាស់ប្តូរវប្បធម៌គ្នាទៅវិញទៅមក។

ទំនាក់ទំនងទ្វេភាគីរបស់ប្រទេសទាំងពីរ បានឈានដល់ដំណាក់កាលថ្មីមួយជាមួយនឹងការធ្វើឱ្យប្រសើរឡើងដល់ភាពជាដៃគូយុទ្ធសាស្ត្រក្នុងអំឡុងពេលដំណើរទស្សនកិច្ចរបស់ សម្តេចមហាបវរធិបតី នាយករដ្ឋមន្ត្រី នៃព្រះរាជាណាចក្រកម្ពុជា នៅទីក្រុងសេអ៊ូល ខែឧសភាកន្លងទៅនេះ។ ភាពជាដៃគូនេះត្រូវបានពង្រឹងដោយអន្តរកម្មកម្រិតខ្ពស់ដែលកំពុងអនុវត្តបន្ត និងការខិតខំប្រឹងប្រែងរួមគ្នារវាងប្រទេសទាំងពីរនៅក្នុងគម្រោងអភិវឌ្ឍន៍។

ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី ក៏បានកោតសរសើរ និងវាយតម្លៃខ្ពស់ចំពោះការគាំទ្ររបស់ប្រទេសកូរ៉េ មកលើប្រទេសកម្ពុជាក្នុងវិស័យមួយចំនួនដូចជា ហេដ្ឋារចនាសម្ព័ន្ធ ការគ្រប់គ្រងទឹក សុខាភិបាល និងការអប់រំ ក៏ដូចជាបានលើកឡើងពី ទំនាក់ទំនងរវាងប្រជាជន និងប្រជាជននៃប្រទេសទាំងពីរ ដែលមានភាពរីកចម្រើន និងរឹងមាំផងដែរ។ បន្ថែមពីនេះ ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានសង្ឃឹមជឿជាក់ថា តាមរយៈកិច្ចសហប្រតិបត្តិការ និងភាពជាដៃគូបន្តរវាងប្រទេសទាំងពីរ នឹងជួយពង្រឹងប្រទេសទាំងពីរឱ្យកាន់តែមានភាពស្និទ្ធស្នាល និងបង្កើតអនាគតមួយដែលមានភាពល្អប្រសើរ សម្រាប់ប្រជាជន និងប្រទេសទាំងមូល៕