ក្រុម Hezbollah បញ្ជាក់ពីការស្លាប់របស់លោក Mohammad Srour
បរទេស៖ ក្រុមសកម្មប្រយុទ្ធដែលមានមូលដ្ឋាននៅលីបង់ បានបញ្ជាក់នៅក្នុងការបង្ហោះនៅលើ Telegram កាលពីថ្ងៃសុក្រថា ប្រមុខដឹកនាំយន្តហោះគ្មានមនុស្សបើក និងកាំជ្រួចធ្វើដំណើររបស់ Hezbollah ត្រូវបានសម្លាប់នៅក្នុងការវាយប្រហាររបស់អ៊ីស្រាអែលលើទីក្រុង Beirut ។
កងកម្លាំងការពារអ៊ីស្រាអែល (IDF) បានអះអាងកាលពីថ្ងៃព្រហស្បតិ៍ថាបានសម្លាប់លោក Mohammad Srour ដែលត្រូវបានគេស្គាល់ថា Abu Saleh នៅក្នុងការវាយប្រហារលើប្លុកផ្ទះល្វែងមួយនៅជាយក្រុងភាគខាងត្បូងនៃទីក្រុង Beirut។
IDF បានសរសេរនៅក្នុងការបង្ហោះនៅលើ X (អតីត Twitter) ថាយន្តហោះចម្បាំងបានវាយប្រហារទីក្រុង Beirut និងសម្លាប់លោក Mohammad Hussein Srour។
ទីភ្នាក់ងារសារព័ត៌មានជាតិរបស់ប្រទេសលីបង់បានរាយការណ៍ថា កាំជ្រួចចំនួនបី បានតម្រង់ទៅលើផ្ទះល្វែងលំនៅដ្ឋានមួយនៅក្នុងអគារដប់ជាន់។
នៅក្នុងការអាប់ដេតនៅលើ Telegram កាលពីថ្ងៃសុក្រ ក្រុមហេសបូឡាហ៍បានបញ្ជាក់ពីការស្លាប់របស់លោក Srour អាយុ ៥១ឆ្នាំ ដែលបានចូលរួមជាមួយក្រុមសកម្មប្រយុទ្ធក្នុងឆ្នាំ១៩៨៦ និងបានដឹកនាំប្រតិបត្តិការយោធាសម្រាប់កងកម្លាំងអាកាសរបស់ពួកតស៊ូអ៊ីស្លាមនៅលើរណសិរ្សគាំទ្រលីបង់។
លោកត្រូវបានគេរាយការណ៍ថាជាអ្នកទទួលខុសត្រូវលើយន្តហោះគ្មានមនុស្សបើក កាំជ្រួចធ្វើដំណើរ និងសាខាការពារអាកាសរបស់ហេសបូឡា។ យោងតាម IDF លោកបានដឹកនាំនិងបញ្ជាការវាយប្រហារដោយយន្តហោះគ្មានមនុស្សបើកជាច្រើនដែលសំដៅលើអ៊ីស្រាអែល។
ប្រព័ន្ធផ្សព្វផ្សាយក្នុងស្រុកបានរាយការណ៍ថា វាគឺជាការវាយប្រហារលើកទីបួនក្នុងរយៈពេលមួយសប្តាហ៍ដែលផ្តោតលើក្រុមមន្ត្រី Hezbollah នៅក្នុងតំបន់ដែលមានប្រជាជនរស់នៅយ៉ាងក្រាស់ក្រែលនៃភាគខាងត្បូងទីក្រុង Beirut។ យោងតាមក្រសួងសុខភាពរបស់ប្រទេសលីបង់ បានឱ្យដឹងថា មនុស្សពីរនាក់បានស្លាប់នៅក្នុងការវាយប្រហារ និង ១៥នាក់បានរងរបួស រួមទាំងស្ត្រីម្នាក់នៅក្នុងស្ថានភាពធ្ងន់ធ្ងរ។
អ៊ីស្រាអែលបានសម្លាប់មេបញ្ជាការកំពូលរបស់ក្រុមហេសបូឡាយ៉ាងហោចបីនាក់ចាប់តាំងពីថ្ងៃសុក្រសប្តាហ៍មុនក្នុងនោះរួមមាន Ibrahim Aqil, Ahmed Wahbi និង Ibrahim Qubaisi។
ការធ្វើឃាតប្រមុខបញ្ជាការលើអាកាសរបស់ក្រុម Hezbollah បានបង្ហាញពីការកើនឡើងយ៉ាងខ្លាំងក្នុងជម្លោះអ៊ីស្រាអែល និងលីបង់ដែលកំពុងបន្ត។
នាយករដ្ឋមន្ត្រីអ៊ីស្រាអែល លោក Benjamin Netanyahu បានសន្យាថានឹងរក្សាប្រតិបត្តិការយោធាទ្រង់ទ្រាយធំប្រឆាំងនឹងក្រុម Hezbollah នៅថ្ងៃព្រហស្បតិ៍ ដោយបដិសេធការអំពាវនាវអន្តរជាតិកាន់តែខ្លាំងឡើងសម្រាប់បទឈប់បាញ់។
កាលពីដើមសប្តាហ៍នេះ សហរដ្ឋអាមេរិក និងបារាំងបានស្នើកិច្ចព្រមព្រៀងឈប់បាញ់រយៈពេល ២១ថ្ងៃរវាងអ៊ីស្រាអែល និងក្រុមហេសបូឡា ដើម្បីបើកផ្លូវសម្រាប់ការចរចាកាន់តែទូលំទូលាយ។ ខណៈពេលដែលការិយាល័យរបស់លោក Netanyahu បានបញ្ជាក់ថា លោកមិនទាន់ឆ្លើយតបទៅនឹងគំនិតផ្តួចផ្តើមនេះទេ នាយករដ្ឋមន្ត្រីអ៊ីស្រាអែលបានណែនាំកងទ័ពឱ្យបន្តការប្រយុទ្ធដោយកម្លាំងពេញលេញ ប្រឆាំងនឹងប្រទេសលីបង់។
ជំហរដ៏ម៉ឺងម៉ាត់របស់លោក Netanyahu បានបិទបាំងនូវលទ្ធភាពនៃបទឈប់បាញ់ បើទោះបីជាមានការខិតខំប្រឹងប្រែងដោយមន្ត្រីអន្តរជាតិដែលតស៊ូមតិសម្រាប់ការបញ្ឈប់ជាបណ្តោះអាសន្នក្នុងអំពើហិង្សា ដើម្បីការពារជម្លោះមិនឱ្យកើនឡើងទៅជាសង្រ្គាមពេញលក្ខណៈក៏ដោយ។