ឯកឧត្តម វង សូត ចុះពិនិត្យមើលការដ្ឋានសាងសង់អគារសិក្សាថ្មី មានរចនាបថខ្មែរ ០១ខ្នង កម្ពស់ ០២ជាន់ ស្មើនឹង ១៦បន្ទប់ នៅវិទ្យាល័យ ហេង សំរិន ចក

ភ្នំពេញ៖ នៅថ្ងៃទី២៧ ខែកញ្ញា ឆ្នាំ២០២៤ ឯកឧត្តម វង សូត អនុប្រធានទី២រដ្ឋសភា និងគណៈប្រតិភូ បានអញ្ជើញចុះពិនិត្យមើលការដ្ឋានសាងសង់អគារសិក្សាថ្មី មានរចនាបថខ្មែរ ០១ខ្នង កម្ពស់ ០២ជាន់ ស្មើនឹង ១៦បន្ទប់ ដែលសាងសង់ នៅវិទ្យាល័យ ហេង សំរិន ចក ស្ថិតនៅភូមិចំឡាក់ ឃុំចក ស្រុកអូររាំងឳ ខេត្តត្បូងឃ្មុំ ។

សមិទ្ធផលនៅក្នុងវិទ្យាល័យ ហេង សំរិន ចក
ជាអំណោយដ៏ថ្លៃថ្លារបស់សម្តេចអគ្គមហាពញាចក្រី ហេង សំរិន ប្រធានកិត្តិយសឧត្តមទីប្រឹក្សាផ្ទាល់ព្រះមហាក្សត្រ និងសម្តេចធម្មវិសុទ្ធវង្សា សៅ ទី ហេង​ សំរិន រួមនឹងសប្បុរសជនជាច្រើនទៀតដើម្បីចូលរួមចំណែកក្នុងការបណ្តុះណ្តាល និងកសាងធនធានមនុស្សសម្រាប់កូនចៅប្រជាពលរដ្ឋក្នុង មូលដ្ឋាននេះ ស្ថិតនៅស្រុកអូររាំងឪ ខេត្តត្បូងឃ្មុំ។

ឆ្លៀតក្នុងឱកាសនេះ ឯកឧត្តមអនុប្រធានទីរដ្ឋសភា បានផ្តល់កិត្តិយសពិសានំបញ្ចុក នំគ្រក់ យ៉ាងសប្បាយរីករាយជាមួយ គណៈគ្រប់គ្រងសាលា លោកគ្រូ អ្នកគ្រូ សិស្សានុសិស្ស និងជាងសំណង់ផងដែរ ព្រមទាំងបានឧបត្ថម្ភថវិកាក្នុងម្នាក់ ៥ម៉ឺនរៀលផងដែរ។

សូមបញ្ជាក់ថា អគារសិក្សាថ្មី ០១ខ្នងនេះ ត្រូវបានបញ្ចុះបឋមសិលាបើកការដ្ឋានសាងសង់ កាលពីថ្ងៃទី២៩ ខែមិថុនា ឆ្នាំ២០២៣ ដោយរំពឹងថានឹងសាងសង់រួចជាស្ថាពរ នៅខែតុលា ឆ្នាំ២០២៤ ខាងមុខនេះ ៕