ឧបនាយករដ្ឋមន្ត្រី ហង់ ជួនណារ៉ុន៖ ការប្រឡងបាក់ឌុបឆ្នាំ២០២៤នេះ សាលាដែលមានអត្រាសិស្សនិទ្ទេសល្អច្រើន ឬជាប់ច្រើនជាងគេ នឹងជ្រើសរើសឱ្យក្លាយជាសាលាគំរូ
ភ្នំពេញ៖ ក្នុងឱកាសអញ្ជើញធ្វើសន្និសីទសារព័ត៌មានស្តីពី «ដំណើរការរៀបចំការប្រឡងសញ្ញាបត្រមធ្យមសិក្សាទុតិយភូមិសម័យប្រឡង០៨ តុលា ២០២៤» នារសៀលថ្ងៃទី២៧ ខែកញ្ញា ឆ្នាំ២០២៤ ឯកឧត្ដម ហង់ ជួនណារ៉ុន ឧបនាយករដ្ឋមន្រ្តី រដ្ឋមន្រ្តីក្រសួងអប់រំ យុវជន និងកីឡា បានប្រកាសថា លទ្ធផលប្រឡងបាក់ឌុបនាឆ្នាំនេះ ប្រសិនបើសាលាណាមួយ មានសិស្សមានអត្រានិទ្ទេសល្អច្រើន ឬជាប់ច្រើនជាងគេ នោះនឹងជ្រើសរើសឱ្យក្លាយជាសាលាគំរូ។
ឯកឧត្ដមបណ្ឌិតសភាចារ្យ ហង់ ជួនណារ៉ុន បានលើកឡើងថា ក្រសួងអប់រំបានរៀបចំស្ដង់ដារសាលាររៀនគំរូ ដោយផ្ដោតលើកកត្តាជាច្រើនដូចជា កត្តាដឹកនាំសាលារៀន ការគ្រប់គ្រងសាលារៀន ការរៀន និងការបង្រៀន ការជួយគាំទ្រ ការសហការរបស់មាតាបិតាដែលនឹងនាំមកលទ្ធផលរបស់សិស្ស។
ឯកឧត្ដមបា បន្ដថា «ដូច្នេះក្នុងការរៀបចំស្ដង់ដារសាលារៀន គឺយកលទ្ធផលរបស់សិស្ស ពិសេសផ្ដោតលើសាលាដែលបាននិទ្ទេស A ច្រើនជាងគេ ឬ A B C បាន៣០ភាគរយ ឬច្រើនជាងនេះ នោះក្រសួងអប់រំ នឹងយកសាលានោះជាសាលារៀនគំរូ ចំណែកកត្តាផ្សេងៗទៀតជាកត្តារួមផ្សំ»។
ឯកឧត្ដមបណ្ឌិតសភាចារ្យបានបញ្ជាក់ថា ចំពោះសាលារៀននៅតាមទីជនបទ មិនបាននិទ្ទេស A B C ប៉ុន្ដែក្នុងអត្រាដែលសិស្សជាប់ចន្លោះពី៨០-៩៥ភាគរយ ក្រសួងអប់រំនឹងទទួលស្គាល់ជាសាលារៀនគំរូផងដែរ។ យ៉ាងណាមិញសាលាដើមឬស ជាវិទ្យាល័យមួយដែលបង្រៀនពេញមួយថ្ងៃ (២ពេល) មានការចូលរួមពីមាតាបិតា និងការចូលរួមពីនាយកសាលា ដែលជានាយកល្អ។ សាលារៀនដើមឬសជាសាលាររៀនគំរូ ដោយមានគ្រប់ស្ដង់ដារទាំងអស់រួមមាន ទាំងការរៀន ការបង្រៀន ការចូលរួមពីមាតាបិតាជាដើម។
ឯកឧត្ដមបណ្ឌិតសភាចារ្យ ហង់ ជួនណារ៉ុន បញ្ជាក់ថា «ដើម្បីលើកទឹកចិត្តឲ្យសាលាផ្សេងៗប្រឹងប្រែង និងទទួលស្គាល់ជាសាលារៀនគំរូ និងទទួលបានពានរង្វាន់ជាសាលារៀនគំរូ ក្រសួងអប់រំ នាឆ្នាំនេះបានប្រកាសទទួលស្គាល់សាលាចំន ួន១២០ ជាសាលារៀនគំរូ ហើយឆ្នាំក្រោយយើងនឹងវាយតម្លៃ។ ដូច្នេះលទ្ធផលនៃការប្រឡងសញ្ញាបត្រមធ្យមសិក្សាទុតិយភូមិ ឆ្នាំនេះនឹងប្រើប្រាស់សម្រាប់វាយតម្លៃ ជាសាលារៀនគំរូ សម្រាប់ប្រកាសនូវខែមីនា ឬមេសា ឆ្នាំ២០២៥ខាងមុខនេះ»៕
