ប្រតិភូក្រសួងមុខងារសាធារណៈ ចូលរួមកិច្ចប្រជុំផែនការសកម្មភាពកោះបាលី ឆ្នាំ២០១៩-២០២៥ និងសិក្ខាសាលាស្តីពី The ASEAN-UK Regional Workshop Series នៅទីក្រុងបាលី ប្រទេសឥណ្ឌូនេស៊ី

ភ្នំពេញ៖ ក្នុងនាមតំណាងឱ្យ ឯកឧត្តម ហ៊ុន ម៉ានី ឧបនាយករដ្ឋមន្រ្តី រដ្ឋមន្រ្តីក្រសួងមុខងារសាធារណៈ និងជាប្រធានកិច្ចសហប្រតិបត្តិការអាស៊ាន ស្តីពីកិច្ចការមុខងារសាធារណៈ លើកទី២៣ សម្រាប់ឆ្នាំ២០២៤-២០២៦ (23rd ACCSM) ឯកឧត្តម ឈុន សុជាតិ អគ្គលេខាធិការនៃអគ្គលេខាធិការដ្ឋាននៃគណៈកម្មាធិការកែទម្រង់រដ្ឋបាលសាធារណៈ បានដឹកនាំគណៈប្រតិភូមុខងារសាធារណៈកម្ពុជា ចូលរួមកិច្ចប្រជុំ The 4th Bali Work Plan Multi Sectoral Task Force (MTF) Meeting និងកិច្ចប្រជុំ The 4th ASEAN Partners Meeting for the Implementation of the Bali Work Plan 2019-2025 រួមទាំងសិក្ខាសាលាស្តីពី The ASEAN-UK Regional Workshop Series on Counter Terrorism and Violent Extremism (CTVE) ដែលប្រពឹត្តិទៅចាប់ពីថ្ងៃទី២៥ ដល់ថ្ងៃទី២៧ ខែកញ្ញា ឆ្នាំ២០២៤ នៅទីក្រុងបាលី ប្រទេសឥណ្ឌូនេស៊ី។

កិច្ចប្រជុំនេះដឹកនាំដោយ ឯកឧត្តម Andhika Chrisnayudhanto អនុប្រធានកិច្ចសហប្រតិការអន្តរជាតិ នៃទីភ្នាក់ងារប្រឆាំងភេរវកម្មជាតិ របស់ប្រទេសឥណ្ឌូនេស៊ី និងជាប្រធានកិច្ចប្រជុំមន្រ្តីជាន់ខ្ពស់អាស៊ាន ស្តីពីឧក្រិដ្ឋកម្មឆ្លងដែន (SOMTC) ដោយមានការអញ្ជើញចូលរួមពីសំណាក់ ឯកឧត្ដម លោកជំទាវ លោក លោកស្រី ដែលជាអង្គភាពតាមវិស័យពាក់ព័ន្ធចំនួន១៩ ដៃគូសន្ទនាអាស៊ាន និងដៃគូពាក់ព័ន្ធចំនួន១២ និងតំណាងលេខាធិការដ្ឋានអាស៊ាន។

ក្រសួងមុខងារសាធារណៈកម្ពុជា ក្នុងនាមជាប្រធាននៃកិច្ចសហប្រតិបត្តិការអាស៊ាន ស្តីពីកិច្ចការមុខងារសាធារណៈ លើកទី២៣ ត្រូវបានអញ្ជើញឱ្យចូលរួមកិច្ចប្រជុំ ជាតំណាងឱ្យស្ថាប័នរបស់វិស័យមុខងារសាធារណៈអាស៊ានទាំង១០ ក្នុងក្របខណ្ឌនៃសរសរស្តម្ភសហគមន៍សង្គម-វប្បធម៌អាស៊ាន ដែលមានស្ថាប័នវិស័យមុខងារសាធារណៈ មួយនៅក្នុងចំណោមស្ថាប័នធំៗផ្សេងទៀត។

គោលបំណងសំខាន់នៃកិច្ចប្រជុំនេះ ដើម្បីផ្តល់ឱកាសដល់គ្រប់អង្គភាពតាមវិស័យពាក់ព័ន្ធទាំងអស់ ធ្វើការពិភាក្សាគ្នា និងចែករំលែកនូវកិច្ចខិតខំប្រឹងប្រែងរបស់ខ្លួនក្នុងការអនុវត្តផែនការសកម្មភាព ដែលស្ថិតនៅក្រោមផែនការការងារកោះបាលី ឆ្នាំ២០១៩-២០២៥ និងកិច្ចខិតខំប្រឹងប្រែងនានារបស់ដៃគូសន្ទនាអាស៊ាន និងដៃគូពាក់ព័ន្ធផ្សេងទៀត។

នៅក្នុងកិច្ចប្រជុំនេះ ឯកឧត្តម ឈុន សុជាតិ បានចូលរួមថ្លែងបទអន្តរាគមន៍ក្នុងនាមស្ថាប័នវិស័យមុខងារសាធារណៈ របស់អាស៊ានទាំង១០ ស្តីពីវឌ្ឍនភាពនៃការអនុវត្តសកម្មភាព ចំនួន០៧ របស់ ACCSM ដែលបានដាក់បញ្ជូលទៅក្នុងផែនការសកម្មភាពកោះបាលី ឆ្នាំ២០១៩-២០២៥ នាពេលកន្លងមក ក៏ដូចជាការប្តេជ្ញាចិត្តរបស់ ACCSM ក្នុងការរួមចំណែកអនុវត្តផែនការសកម្មភាពកោះបាលី ឆ្នាំ២០១៩-២០២៥ ឱ្យទទួលបានជោគជ័យ៕