ក្រសួងមុខងារសាធារណៈ បន្តការងារវិភាគមុខងារ រចនាសម្ព័ន្ធក្រសួង ស្ថាប័ន ដោយរៀបចំកិច្ចប្រជុំចំនួនពីរបន្ថែមទៀតលេីការកំណត់និងការរៀបចំមុខងារគាំទ្ររបស់ក្រសួង ស្ថាប័ន
ភ្នំពេញ៖ នារសៀលថ្ងៃទី២៧ ខែកញ្ញា ឆ្នាំ២០២៤ ឯកឧត្ដម យក់ ប៊ុនណា រដ្ឋលេខាធិការប្រចាំការក្រសួងមុខងារសាធារណៈ និងជាប្រធានអនុគណៈកម្មាធិការប្រតិបត្តិនៃ គ.វ.រ បានដឹកនាំកិច្ចប្រជុំស្តីពី ការកំណត់និងការរៀបចំមុខងារគាំទ្ររបស់ក្រសួង ស្ថាប័ន នៅសាលប្រជុំក្នុងបរិវេណសាលាភូមិន្ទរដ្ឋបាល ដោយមានការអញ្ជើញចូលរួមពី ឯកឧត្ដម លោកជំទាវ លោក លោកស្រី ថ្នាក់ដឹកនាំមន្រ្តីរាជការ តំណាងក្រសួងសេដ្ឋកិច្ច និងហិរញ្ញវត្ថុ តំណាងទីស្តីការគណៈរដ្ឋមន្រ្តី តំណាងក្រសួងការបរទេស និងសហប្រតិបត្តិការអន្តរជាតិ តំណាងក្រសួងផែនការ ព្រមទាំងក្រុមការងារពាក់ព័ន្ធជាច្រើនរូប។
អង្គប្រជុំបានពិភាក្សាទៅលើការគិតគូរពិចារណារៀបចំលើការកំណត់ និងរៀបចំមុខងារគាំទ្រសំខាន់ៗរួមមាន៖ ១).រៀបចំ និងកំណត់លក្ខខណ្ឌការងាររបស់អង្គភាព, ២).កំណត់មុខតំណែងអោយបានច្បាស់ក្នុងការអនុវត្តការងារ, ៣).កំណត់គុណវុឌ្ឍិនៃមុខតំណែងនីមួយៗ, ៤).ការពិពណ៌នាការងារនៃមុខតំណែងរៀបចំនិយាមនីតិវិធីប្រតិបត្តិការងារនៃអង្គភាពនីមួយៗ និង៥).កំណត់ក្រសួង ស្ថាប័ន ណាជាអ្នកដឹកនាំរៀបចំមុខងារនោះ។
កិច្ចប្រជុំបានសម្រេចបានលទ្ធផលជារួម ក្រសួងមុខងារសាធារណៈនឹងរៀបចំជាទម្រង់ជូនក្រសួង ស្ថាប័ន ក្នុងការរៀបចំអនុក្រឹត្យគុណវុឌ្ឍិវិជ្ជាជីវៈមន្ត្រីដោយផ្អែកតាមអនុក្រឹត្យលេខ៤៥ របស់ក្រសួងសេដ្ឋកិច្ច និងហិរញ្ញវត្ថុ នឹងគិតគូរស្នើសុំរដ្ឋាភិបាលដើម្បីផ្តល់ជូនកញ្ចប់ថវិកាលើកទឹកចិត្តជូនដល់ក្រសួង ស្ថាប័ន ដែលដឹកនាំរៀបចំកំណត់ មុខងារគាំទ្រ។
សូមជម្រាបផងដែលថាការវិភាគមុខងារ រចនាសម្ព័ន្ធក្រសួង ស្ថាប័ន គឺជាវិធានការគន្លឹះទី២ នៃការកែទម្រង់រដ្ឋបាលសាធារណៈរបស់រាជរដ្ឋាភិបាលដែលដឹកនាំអនុវត្តដោយក្រសួងមុខងារសាធារណៈ ៕
