សិក្ខាកាមប្រមាណជិត១០០នាក់ ចូលរួមវគ្គផ្សព្វផ្សាយ អំពីអនុសញ្ញាស្តីពីការលប់បំបាត់រាល់ទម្រង់រើសអើង និងអំពើហឹង្សាលើស្រ្តី
ភ្នំពេញ៖ នៅថ្ងៃទី២៧ ខែកញ្ញា ឆ្នាំ២០២៤ លោកជំទាវ មឹន មាណវី រដ្ឋលេខាធិការ តំណាងដ៏ខ្ពង់ខ្ពស់ ឯកឧត្តមរដ្ឋមន្ត្រីក្រសួងសាធារណការ និងដឹកជញ្ជូន និងលោក អ៊ុក គឹមសាន អភិបាលរងខេត្តព្រះវិហារ បានអញ្ជើញជាអធិបតីក្នុងវគ្គផ្សព្វផ្សាយ អំពីអនុសញ្ញាស្តីពីការលប់បំបាត់រាល់ទម្រង់រើសអើង និងអំពើហឹង្សាលើស្រ្តី។ កម្មវិធីនេះមានការអញ្ជើញចូលរួមពី លោកស្រី ហ៊ូសុផល្លិកា ប្រធានផ្នែកផែនការ និងសហប្រតិបត្តិការ នៃអគ្គលេខាធិការដ្ឋានក្រុមប្រឹក្សាជាតិកម្ពុជាដើម្បីស្ត្រី ជាអ្នកធ្វើបទបង្ហាញ លោកស្រីប្រធានមន្ទីរកិច្ចការនារីខេត្ត លោកប្រធាន និងលោក-លោកស្រីអនុប្រធានមន្ទីរសាធារណការ និងដឹកជញ្ជូន ខេត្តព្រះវិហារ សៀមរាប ប៉ៃលិន ស្ទឹងត្រែង បន្ទាយមានេជ័យ កំពង់ធំ លោក-លោកស្រី អគ្គនាយករង ព្រមទាំងមន្ត្រីរាជការ ក្រោមឱវាទក្រសួង មន្ទីរ មានចំនួនសរុបប្រមាណជិត ១០០នាក់។
គោលបំណងនៃវគ្គផ្សព្វផ្សាយធ្វើឡើងក្នុងន័យបញ្ជ្រាបគោលគំនិត និងទស្សនៈយេនឌ័រ ចែករំលែកអនុសាសន៍១២ចំណុចរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ដើម្បីបង្ហាញឲ្យឃើញពីការខិតខំរបស់រាជរដ្ឋាភិបាលកម្ពុជា បានផ្សារភ្ជាប់ជាមួយនឹងអង្គការអន្តរជាតិ ដោយបានធ្វើកិច្ចសហប្រតិបត្តិការគាំទ្រគ្នាទៅវិញទៅមក រវាងប្រទេសកម្ពុជា និងប្រទេសនានាក្នុងសកលលោក ហើយសម្រាប់ជួយលើកកម្ពស់សិទ្ធិស្រ្តី ឱ្យមានសុខដុមភាព និងការអភិវឌ្ឍក្នុងសង្គមកម្ពុជាប្រកបដោយចីរភាព។
ឆ្លៀតក្នុងឱកាសនោះផងដែរ លោកជំទាវរដ្ឋលេខាធិការ បានកោតសរសើរ និងថ្លែងអំណរគុណដល់សិក្ខាកាមទាំងអស់បានចូលរួមវគ្គបណ្តុះបណ្តាលនេះ និងបានកើនរំលឹកផងដែរក្នុងឱកាសអំឡុងពេលបូណ្យភ្ជុំបិណ្ឌប្រពៃណីជាតិ ត្រូវចូលរួមគោរពច្បាប់ចរាចរណ៍ឱ្យបានគ្រប់គ្នា ដើម្បីសុខសុត្ថិភាពគ្រប់ក្រុមគ្រួសារ ៕