អភិបាលខេត្តតាកែវ ដឹកនាំមន្រ្តីរាជការចំណុះរដ្ឋបាលខេត្ត ចូលរួមកាន់បិណ្ឌវេនទី១២ នៅវត្តតុំ និងវត្តលឹមពូលសាមគ្យារាម (វត្តធម្មយុត្តិ) ក្នុងក្រុងដូនកែវ
ភ្នំពេញ៖ នាព្រឹកថ្ងៃអាទិត្យ ទី២៩ ខែកញ្ញា ឆ្នាំ២០២៤ ឯកឧត្តម វ៉ី សំណាង អភិបាលខេត្តតាកែវ រួមជាមួយ លោក លោកស្រី អភិបាលរងខេត្ត និងលោក លោកស្រី ប្រធានមន្ទីរអង្គភាពជុំវិញខេត្ត កងកំម្លាំងប្រដាប់អាវុធទាំង៣ប្រភេទ និងពុទ្ធបរិស័ទចំណុះជើងវត្ត បានអញ្ជើញចូលរួមកាន់បិណ្ឌវេនទី១២ នៅវត្តតុំ ស្ថិតនៅភូមិតុំ សង្កាត់រកាក្រៅ ក្រុងដូនកែវ និង វត្តលឹមពូលសាមគ្យារាម (វត្តធម្មយុត្តិ) ស្ថិតក្នុងភូមិឡូរី សង្កាត់រកាក្នុង ក្រុងដូនកែវ ខេត្តតាកែវ។
ថ្លែងក្នុងឱកាសអញ្ជើញចូលរួមកាន់បិណ្ឌវេនទី១២ នោះដែរ ឯកឧត្តម វ៉ី សំណាង អភិបាលខេត្តតាកែវ បានមានប្រសាសន៍ប្រាប់ប្រជាពលរដ្ឋ លោកតា លោកយាយថា សន្តិភាពនេះវាពិតជាមានតម្លៃខ្លាំងណាស់មិនអាចកាត់ផ្តាច់បានឡើយ ហើយសន្តិភាពនេះដែរ វាជាមូលដ្ឋានគ្រឹះសម្រាប់ប្រទេសជាតិនីមួយៗ ហើយប្រទេសជាតិយើងមានការរីកចម្រើនមកដល់សព្វថ្ងៃនេះដោយសារកត្តាសុខសន្តិភាពផងដែរ។ ហើយសន្តិភាពនេះបានមកពីការលះបង់សាច់ស្រស់ ឈាមស្រស់របស់សម្ដេចតេជោ ហ៊ុន សែន អតីតនាយករដ្ឋមន្រ្តីនៃកម្ពុជា ដែលបានប្រែក្លាយកម្ពុជាពីវាលសង្គ្រាម កាប់សម្លាប់គ្នា មកជាប្រទេសមានការអភិវឌ្ឍលើគ្រប់វិស័យទាំងវិស័យពុទ្ធចក្រ និងអាណាចក្រ។
ឆ្លៀតក្នុងឱកាសនោះដែរ ឯកឧត្តមអភិបាលខេត្ត រួមជាមួយថ្នាក់ដឹងនាំ រៀបចំបង្សុកូលឧទ្ទិសកុសលផលបុណ្យ ជូនដល់ដួងវិញ្ញាណក្ខន្ធ ចំពោះមាតាបិតា ជីដូនជីតា ញាតិកាទាំង៧សន្តាន ដែលបានចែកឋានទៅ កាន់បរលោកខាងមុខហើយនោះ ព្រមទាំងឧទ្ទិសកិសលដល់ដួងវិញ្ញាណក្ខន្ធកម្មាភិបាលយុទ្ធជន ដែលបានពលីជីវិត ក្នុងបុព្វហេតុការពារកសាងអភិវឌ្ឍន៍ជាតិមាតុភូមិកម្ពុជា និងជនរងគ្រោះដោយភាពអយុត្តិធម៌ក្នុងរបបប្រល័យពូជសាសន៍ សូមមកទទួលយកនូវផលានិសង្ស ដែលបានឧទ្ទិសជូនតាមរយៈព្រះសង្ឃដែលជាស្រែ បុណ្យ ក្នុងរដូវកាលបុណ្យកាន់បិណ្ឌ និងភ្ជុំបិណ្ឌនេះ សូមឱ្យ អំណាចនៃអានិសង្ឃនេះ ជួយទ្រទ្រង់ឱ្យវិញ្ញាណក្ខន្ធ អ្នកទាំងនោះបានទៅកាន់ទីសោយសុខឋានបរមសុខ កុំបីឃ្លៀងឃ្លាតក្នុងឋានសុគតិភពកុំបីខានឡើយ។
សូមជម្រាបជូនដែរថា ឯកឧត្តម វ៉ី សំណាង អភិបាលខេត្ត បានប្រគេនទេយ្យវត្ថុដល់វត្តតុំ និងវត្តលឹមពូលសាមគ្យារាម (វត្តធម្មយុត្តិ) ដោយក្នុងមួយវត្ត អង្ករ ៥ប៉ាវ, ទឹកស៊ីអ៊ីវ ៥យួរ, ទឹកត្រី ៥យួរ, ទឹកបរិសុទ្ធ ៥កេស, ទឹកក្រូច ៥កេស, តែ ៥កញ្ចប់, មី ៥កេស, អំបិល ៥គីឡូក្រាម, ប៊ីចេង ៥គីឡូក្រាម។ ដោយឡែកវត្តតុំ ប្រគេនបច្ច័យសរុប ៣,២៧០,០០០រៀល និងប្រាក់ដុល្លារ ២០ដុល្លារ និង ២៧ស្លាដក។ សម្រាប់វត្តលឹមពូលសាមគ្យារាម (វត្តធម្មយុត្តិ) ប្រគេនបច្ច័យ ៣,៨៣០,០០០រៀល និង ១២ស្លាដក ៕
