ឯកឧត្តម សួស យ៉ារ៉ា ដឹកនាំកិច្ចប្រជុំពិភាក្សាអំពីដំណើរការរៀបចំកិច្ចប្រជុំគណៈកម្មាធិការប្រតិបត្តិ CDI-IDC និងកិច្ចប្រជុំពាក់ព័ន្ធ

ភ្នំពេញ៖ កាលពីថ្ងៃទី២៩ ខែកញ្ញា ឆ្នាំ២០២៤ ឯកឧត្តម សួស យ៉ារ៉ា អនុប្រធានអង្គការអ្នកប្រជាធិបតេយ្យនិយមកណ្តាលអន្តរជាតិ (CDI-IDC) បានដឹកនាំកិច្ចប្រជុំពិភាក្សាអំពីដំណើរការរៀបចំកិច្ចប្រជុំគណៈកម្មាធិការប្រតិបត្តិ CDI-IDC និងកិច្ចប្រជុំពាក់ព័ន្ធ ដែល គណបក្សប្រជាជនកម្ពុជា នឹងទទួលធ្វើជាម្ចាស់ផ្ទះ នៅថ្ងៃទី១៧-១៩ ខែវិច្ឆិកា ឆ្នាំ២០២៤ នៅខេត្តសៀមរាប។

កិច្ចប្រជុំនេះមានការចូលរួមពី ឯកឧត្តម សុខ សូកេន តំណាងគណបក្សប្រជាជនកម្ពុជាក្នុងវេទិកាយុវជន CDI-IDC និងជារដ្ឋមន្រ្តីក្រសួងអធិការកិច្ច ឯកឧត្តម ប្រាក់ សោភ័ណ ប្រធានគណៈកម្មាធិការគណបក្សខេត្តសៀមរាប និងជាអភិបាលនៃគណៈអភិបាលខេត្តសៀមរាប និងតំណាងស្ថាប័ន អាជ្ញាធរ និងអនុគណៈកម្មការរៀបចំពាក់ព័ន្ធ ដើម្បីពិនិត្យដំណើរការរៀបចំកម្មវិធី គិតចាប់ពីថ្ងៃមកដល់របស់គណៈប្រតិភូ កម្មវិធីប្រជុំ ការរៀបចំបដិសណ្ឋារកិច្ចនិងការការពារសន្តិសុខ និងកម្មវិធីទស្សនកិច្ចនៅតំបន់បេតិកភណ្ឌវប្បធម៌អង្គរ ហើយក្រុមការងារក៏បានចុះទៅពិនិត្យមើលទីតាំងរៀបចំកម្មវិធីជាក់ស្តែងផងដែរ។

កិច្ចប្រជុំគណៈកម្មាធិការប្រតិបត្តិ CDI-IDC ខាងមុខនេះ នឹងមានការចូលរួមពី ប្រធាននិងតំណាងជាន់ខ្ពស់គណបក្សនយោបាយនិយមកណ្ដាល មកពីតំបន់អាមេរិកឡាទីន អឺរ៉ុប អាហ្វ្រិក និងអាស៊ីប៉ាស៊ីហ្វិក ដើម្បីពិភាក្សាអំពីបញ្ហានានានៅជុំវិញពិភពលោក ព្រមទាំងមានការរៀបចំវេទិកាពិសេសស្តីអំពី «តួនាទីយុវជនក្នុងសន្តិភាព កិច្ចសន្ទនា សហត្ថិភាព និងបញ្ហាប្រឈម» ផ្តោតទៅលើការជំរុញរបៀបវារៈនៃសន្តិភាព ដោយនឹងមានការចូលរួមពីតំណាងយុវជនគណបក្សនៅក្នុងវេទិកាយុវជន CDI-IDC និងអ្នកជំនាញការមកពីស្ថាប័នស្រាវជ្រាវនានា ផងដែរ។

សូមជម្រាបជូនថា អង្គការ CDI-IDC ត្រូវបានបង្កើតឡើងនៅឆ្នាំ១៩៦១ ក្នុងគោលបំណងប្រមូលផ្តុំគណបក្សនយោបាយ ដែលមាននិន្នាការនិយមកណ្ដាល ផ្តោតលើសេដ្ឋកិច្ចទីផ្សារសង្គម និងមនុស្សជាតិនិយម ហើយបច្ចុប្បន្នមានសមាជិកចំនួនប្រមាណ ១០០ គណបក្ស មកពីតំបន់អាមេរិកឡាទីន អឺរ៉ុប អាហ្វ្រិក និងអាស៊ីប៉ាស៊ីហ្វិក ៕