ឯកឧត្ដម ចាន់ ស៊ីណាត រដ្ឋលេខាធិការក្រសួងធនធានទឹក អញ្ជើញធ្វើទស្សនកិច្ចនៅទីស្នាក់ការកណ្តាលស្ថាប័នឧតុនិយមជាតិ និងអន្តរជាតិបារាំង ក្នុងទីក្រុង Toulouse

ភ្នំពេញ៖ នៅថ្ងៃពុធ ១៥រោច ខែភទ្របទ ឆ្នាំរោង ឆស័ក ពុទ្ធសករាជ ២៥៦៨ ត្រូវនឹងថ្ងៃទី២ ខែតុលា ឆ្នាំ២០២៤នេះ ក្នុងដំណើរបំពេញបេសកកម្មការងារនៅសាធារណរដ្ឋបារាំង ឯកឧត្តម ចាន់ ស៊ីណាត រដ្ឋលេខាធិការ ក្នុងនាមតំណាងឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម បានបន្តដឹកនាំគណៈប្រតិភូក្រសួងធ្វើទស្សនកិច្ចស្វែងយល់សកម្មភាពសំខាន់ៗរបស់មជ្ឈមណ្ឌលជាតិគ្រប់គ្រងទិន្នន័យធនធានទឹក និងឧតុនិយមនៃទីស្នាក់ការកណ្តាលរបស់ស្ថាប័នឧតុនិយមជាតិ និងអន្តរជាតិរបស់ប្រទេសបារាំង(MF&MFI) ក្នុងទីក្រុង Toulouse។

ឯកឧត្តមរដ្ឋលេខាធិការបានឱ្យដឹងថា គណៈប្រតិភូបានស្វែងយល់ពីបច្ចេកវិទ្យាព្យាករណ៍ដ៏ទំនើប និងប្រព័ន្ធរ៉ាដាគ្រប់ប្រភេទក្នុងវិស័យឧតុនិយម ការប្រមូលព័ត៌មានគ្រប់ម៉ូដែល ការគណនា និងប្រើប្រាស់បណ្តាព័ត៌មានដែលប្រមូលបាន ការផ្សព្វផ្សាយក្នុងក្របខ័ណ្ឌជាតិនិងអន្តរជាតិ ជាពិសេសនៅបណ្តាប្រទេសក្នុងតំបន់សហភាពអឺរ៉ុប (EU) ដោយឯករាជ្យ ការកែលម្អជាប្រចាំលើគ្រប់ប្រព័ន្ធ និងការបណ្តុះបណ្តាលពង្រឹងសមត្ថភាពគ្រប់ពេលវេលា។

ឯកឧត្តមរដ្ឋលេខាធិការបានបញ្ជាក់ថា ស្ថាប័នឧតុនិយមជាតិ និងអន្តរជាតិបារាំង (MF&MFI) នឹងធ្វើការពង្រឹងទ្វេដងលើកិច្ចសហប្រតិបត្តិការជាមួយក្រសួងធនធានទឹក និងឧតុនិយម ក្នុងការរៀបចំលើគ្រប់វិស័យនៃមជ្ឈមណ្ឌលជាតិគ្រប់គ្រងទិន្នន័យធនធានទឹកនៅព្រះរាជាណាចក្រកម្ពុជា ៕