រដ្ឋមន្ដ្រីក្រសួងរ៉ែ៖ កម្ពុជាបានដាក់ការប្ដេជ្ញាថា មិនធ្វើរោងចក្រធ្យូងថ្មថ្មីទៀតទេ

ភ្នំពេញ៖ ក្នុងឱកាសអញ្ជើញធ្វើបាឋកថាស្តីពី «គោលនយោបាយថាមពលកម្ពុជា» នៅសាកលវិទ្យាល័យភូមិន្ទភ្នំពេញ នារសៀលថ្ងៃទី០៤ ខែតុលា ឆ្នាំ២០២៤ ឯកឧត្ដម កែវ រតនៈ រដ្ឋមន្ដ្រីក្រសួងរ៉ែ និងថាមពល បានបញ្ជាក់ថា កម្ពុជាបានដាក់ការប្ដេជ្ញាថា កម្ពុជាមិនធ្វើរោងចក្រធ្យូងថ្មថ្មីទៀតទេ។

រដ្ឋមន្ដ្រី កែវ រតនៈ បានលើកឡើងថា កម្ពុជា, អាស៊ាន និងពិភពលោក ក៏ដូចគ្នា គឺនៅទទួលស្គាល់ថា បន្ទាប់ពីកាត់បន្ថយធ្យូងថ្ម បណ្ដាញអគ្គិសនី នឹងមានបញ្ហាញ៉ាក់រញ័រទូទាំងពិភពលោក។

ឯកឧត្ដម កែវ រតនៈ បានបញ្ជាក់ឲ្យដឹងថា កម្ពុជាជាប្រទេសជាប់នឹងទន្លេ ហើយមានតែកម្ពុជាទេ ដែលបានប្រកាសប្រាប់អន្ដរជាតិថា កម្ពុជានឹងមិនធ្វើវារីអគ្គិសនី នៅលើដងទន្លេមេគង្គ ឬតួទន្លេមេគង្គដាច់ខាត។

បើតាមការបញ្ជាក់ របស់រដ្ឋមន្ដ្រី កែវ រតនៈ, ធ្យូងថ្មសព្វថ្ងៃ នៅផលិតប្រមាណ ៣២ភាគរយ ក្នុងបណ្តាញជាតិ ពីព្រោះថា ថាមពលធ្យូងថ្មថោកជាងគេ ហើយផ្តល់ថាមពលអគ្គិសនី ២៤ម៉ោង។ ឯកឧត្ដមថា «សូឡាជាជំនួយថែម ប៉ុន្តែមិនទាន់អាចយកមកជំនួសទេ ដូច្នេះហើយបានជាកុំឆ្ងល់ ហេតុអីបានពិភពលោកប្រើសូឡាត្រឹមតែ៥-៦ភាគរយ»។

បន្ថែមពីនោះទៀត រដ្ឋមន្ដ្រី កែវ រតនៈ បានបញ្ជាក់ថា អាស៊ានក៏ដូចជាពិភពលោក នៅតែទទួលស្គាល់ថា នៅក្នុងរយៈពេលអន្តរកាល ពីឥឡូវនេះដល់ឆ្នាំ២០៥០នេះ ថាមពលធ្យូងថ្ម នៅមានតួនាទីនៅឡើយ ដូច្នេះពិភពលោក មិនទាន់អាចបិទនៅឡើយទេ៕