រដ្ឋបាលខេត្តពោធិ៍សាត់ ប្រកាសទទួលពាក្យចូលរួមប្រណាំងទូក «ង» ខ្នាតអន្ដរជាតិ នៅក្នុងពិធីបុណ្យ អុំទូក បណ្ដែតប្រទីប និងសំពះព្រះខែ អកអំបុក

ភ្នំពេញ៖ រដ្ឋបាលខេត្តពោធិ៍សាត់ បានចេញសេចក្ដីជូនដំណឹង ប្រកាសទទួលពាក្យចូលរួមប្រណាំងទូក «ង» ខ្នាតអន្ដរជាតិ នៅក្នុងពិធីបុណ្យ អុំទូក បណ្ដែតប្រទីប និងសំពះព្រះខែ អកអំបុក ដែលនឹងប្រព្រឹត្តទៅនាថ្ងៃទី០៩ និងថ្ងៃទី១០ ខែវិច្ឆិកា ឆ្នាំ២០២៤ ខាងមុខ នៅទីរួមខេត្ដពោធិ៍សាត់ ។

យោងតាមសេចក្ដីជូនដំណឹងរបស់ឯកឧត្ដម ខូយ រីដា អភិបាលនៃគណៈអភិបាលខេត្តពោធិ៍សាត់ បានទូលប្រគេន ព្រះមេគណខេត្តទាំង ២គណៈ និងថ្នាក់ដឹកនាំ ប្រជាពលរដ្ឋ និងកងកម្លាំងទាំងអស់ អាចរៀបចំចុះឈ្មោះឲ្យបានទាន់ពេលវេលា សម្រាប់ទូកមានចំណុះចន្លោះពី ២០ ទៅ ២២នាក់ ។ ការចុះឈ្មោះនឹងត្រូវបិទឈប់ទទួលពាក្យនាថ្ងៃទី២៥ ខែតុលា ឆ្នាំ២០២៤ ខាងមុខ។

គួរឱ្យដឹងថា ព្រឹត្តិការណ៍នេះ រៀបចំឡើងដើម្បីបង្កភាពសប្បាយរីករាយដល់ប្រជាពលរដ្ឋក្នុងខេត្ត ពិសេសដើម្បីអបអរសាទរក្នុងឱកាសព្រះរាជពិធីបុណ្យ អុំទូក បណ្ដែតប្រទីប និងសំពះព្រះខែ អកអំបុក ដែលនឹងប្រារព្ធឡើងពីថ្ងៃទី១៤ ដល់ថ្ងៃទី១៦ ខែតុលា ឆ្នាំ២០២៤ ខាងមុខ៕