នគរបាលខេត្តស្វាយរៀង ចាប់ខ្លួនជនសង្ស័យជនជាតិវៀតណាម ៩នាក់ ដកហូតគ្រឿងញៀនជាង២គីឡូក្រាម
ភ្នំពេញ៖ កម្លាំងនគរបាលប្រឆាំងគ្រឿងញៀន ខេត្តស្វាយរៀង បានធ្វើការបង្ក្រាប ជនសង្ស័យជនជាតិវៀតណាមចំនួន ៩នាក់ ដកហូតគ្រឿងញៀនទម្ងន់ជាង២គីឡូក្រាម នៅក្រុងបាវិត។
ការបង្ក្រាបបានធ្វើឡើងដោយអនុវត្តតាមបទបញ្ជាដ៍មុឺងម៉ាត់របស់ លោកឧត្តមសេនីយ៍ទោ ពេជ្រ វីរ: ស្នងការនគរបាលខេត្ត និងដឹកនាំបញ្ជាផ្ទាល់ពីលោកឧត្តមសេនីយ៍ត្រី កែវ សុថា ស្នងការរងទទួលផែនការងារប្រឆាំងគ្រឿងញៀន ដោយមានការសម្របសម្រួលផ្ទាល់ពីលោក ដូរ៉ា អង្គប្រទាន និងកញ្ញាពៅ ទេវី ព្រះរាជអាជ្ញារង នៃអយ្យការ អមសាលាដំបូងខេត្តស្វាយរៀង។
កាលពីថ្ងៃទី០១ ខែតុលា ឆ្នាំ២០២៤ កម្លាំងជំនាញការិយាល័យប្រឆាំងគ្រឿងញៀនខេត្តដឹកនាំដោយលោកវរសេនីយ៍ឯក កាន កេន នាយការិយាល័យ សហការជាមួយកម្លាំងអធិការដ្ឋាននគរបាលក្រុងបាវិត ដឹកនាំដោយលោកវរសេនីយ៍ទោ អែម សុវណ្ណារិទ្ធិ អធិការនគរបាលក្រុងបាវិត បានបើកប្រតិបត្តិការបង្ក្រាបករណីជួញដូរ រក្សាទុក ប្រើប្រាស់ដោយខុសច្បាប់នូវសារធាតុញៀន នៅចំណុចហាងខារ៉ាអូខយីហោ KTVBWOW ស្ថិតក្នុងភូមិបាវិតកណ្តាល សង្កាត់បាវិត ក្រុងបាវិត ខេត្តស្វាយរៀង។ លទ្ធផល ឃាត់ខ្លួនជនសង្ស័យជនជាតិវៀតណាមចំនួន០៩នាក់ ប្រុស។
ក្នុងកិច្ចប្រតិបត្តិការនេះ កម្លាំងជំនាញបានដកហូត និងចាប់យកសម្ភារៈវត្ថុតាង ដែលពាក់ព័ន្ធក្នុងបទល្មើសរួមមាន៖
-ថ្នាំញៀនប្រភេទកេតាមីនទម្ងន់ ១១០៧.១៦ ក្រាម
-ថ្នាំញៀនប្រភេទអុិចស្តាសុីទម្ងន់ ១២៥២.១២ក្រាម
-ថ្នាំញៀនប្រភេទ មេតំហ្វេតាមីនទម្ងន់ ៥.១៣ ក្រាម (សរុបសារធាតុញៀន ទម្ងន់ ២៣៦៤.៤១ក្រាម (២គីឡូ៣៦៤.៤១ក្រាម)
-ទូរសព្ទ័ដៃ ០៩ គ្រឿង
-ម៉ូតូ០៣ គ្រឿង
-លិខិតឆ្លងដែន០៦ ក្បាល
-អត្តសញ្ញាណប័ណ្ណជនជាតិវៀតណាម ចំនួន ០៥សន្លឹក ព្រមទាំងឧបករណ៍សម្ភារះ ប្រើប្រាស់គ្រឿងញៀនមួយចំនួនទៀត។
បច្ចុប្បន្នជនសង្ស័យរួមជាមួយវត្ថុតាង ត្រូវបានបញ្ជូនទៅកាន់សាលាដំបូងខេត្តដើម្បីចាត់ការបន្តតាមច្បាប់៕
