ក្រសួងអប់រំ៖ ប្រឡងបាក់ឌុបថ្ងៃទី១ បេក្ខជនចំនួន ២២នាក់ និងអនុរក្ស អប្បមាទ ជំនួយការចំនួន១០នាក់ មានបញ្ហាសុខភាព
ភ្នំពេញ៖ យោងតាមរយៈទំព័រហ្វេសប៊ុកផ្លូវការនៅល្ងាចថ្ងៃទី៨ ខែតុលានេះ ក្រសួងអប់រំ យុវជន និងកីឡាបានបញ្ជាក់ថា មានបេក្ខជនចំនួន២២នាក់ និងអនុរក្ស អប្បមាទ និងជំនួយការចំនួន១០នាក់ មានបញ្ហាសុខភាពក្នុងអំឡុងដំណើរសំណេរការប្រឡងសញ្ញាបត្រមធ្យមសិក្សាទុតិយភូមិសម័យប្រឡង ៖០៨ តុលា សម្រាប់ថ្ងៃដំបូងនៃដំណើរការប្រឡងមធ្យមសិក្សាទុតិយភូមិឆ្នាំ២០២៤។
ក្រសួងបន្តថា នៅថ្ងៃទី១ នៃការប្រឡងនេះ មានបេក្ខជនចំនួន ២២នាក់ ករណីគ្រុនឈាម៣ករណី មកពីខេត្តស្ទឹងត្រែង ខេត្តកែប ខេត្តឧត្តរមានជ័យ ខេត្តកំពត ខេត្តសៀមរាប ខេត្តបន្ទាយមានជ័យ ខេត្តតាកែវ ខេត្តក្រចេះ ខេត្តកំពង់ធំ ខេត្តត្បូងឃុំ ខេត្តប៉ៃលិន ខេត្តកំពង់ចាម ខេត្តកំពង់ឆ្នាំង ខេត្តព្រះវិហារ និងអនុរក្ស អប្បមាទ និងជំនួយការ ចំនួន១០នាក់ មានបញ្ហាសុខភាព។ ក៏សមត្ថកិច្ចមួយរូប ខេត្តកំពង់ចាម ដែលមានបញ្ហាសុខភាពនៅក្នុងដំណើរសំណេរការប្រឡងសញ្ញាបត្រមធ្យមសិក្សាទុតិយភូមិដែរ។
ក្រសួងអប់រំបានបន្ថែមថា បេក្ខជនមួយចំនួនបានបន្តការប្រឡងឡើងវិញក្រោមការយកចិត្តទុកដាក់មើលថែពីក្រុមគ្រូពេទ្យ បន្ទាប់ពីមានអាការៈធូរស្រាល និងបេក្ខជនផ្សេងទៀតត្រូវបានបញ្ជូនទៅមន្ទីរពេទ្យ និងមានមួយនាក់ត្រូវបញ្ចប់ការប្រឡង។
ក្រសួងអប់រំ យុវជន និងកីឡា ក៏បានជំរុញលើកចិត្តឱ្យបេក្ខជនប្រឡងទាំងអស់ត្រូវថែរក្សាសុខភាពឱ្យបានល្អ សម្រាក និងបរិភោគអាហារឱ្យបានគ្រប់គ្រាន់ប្រកបដោយអនាម័យ ដើម្បីទទួលបានលទ្ធផលល្អប្រសើរក្នុងការប្រឡង៕
