រដ្ឋមន្ត្រី កែវ រតនៈ ចុះសួរសុខទុក្ខកងទ័ព និងកម្លាំងនគរបាលចំណុះវរសេនាតូចនគរបាលការពារព្រំដែនគោកប្រចាំទិសប្រាសាទតាមាន់ ខេត្តឧត្តរមានជ័យ
ភ្នំពេញ៖ នៅថ្ងៃទី៨ ខែតុលា ឆ្នាំ២០២៤ ឯកឧត្តម កែវ រតនៈ រដ្ឋមន្ត្រីក្រសួងរ៉ែ និងថាមពល បានអញ្ជើញចុះសួរសុខទុក្ខ និងសំណេះសំណាលជាមួយមេបញ្ជាការ នាយទាហាន នាយទាហានរង និងពលទាហានចំណុះបញ្ជាការដ្ឋានកងថ្មើរជើងលេខ៤២ និងកម្លាំងនគរបាលចំណុះវរសេនាតូចនគរបាលការពារព្រំដែនគោកលេខ៧០២ ប្រចាំទិសប្រាសាទតាមាន់ ខេត្តឧត្តរមានជ័យ។
សូមបញ្ជាក់ថា ការចុះសួរសុខទុក្ខកងទ័ព និងកងកម្លាំងនគរបាលនេះ គឺជាប្រពៃណីនៃការចុះសួរសុខទុក្ខជាប្រចាំរវាងស្ថាប័នស៉ីវិល និងអង្គភាពជួរមុខ ដែលត្រូវបានផ្ដួចផ្ដើមដោយសម្ដេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្រ្តី និងជាប្រធានព្រឹទ្ធសភា និងត្រូវបានបន្តអនុវត្តដោយសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា។
ក្នុងឱកាសនោះ ឯកឧត្តមរដ្ឋមន្ត្រី កែវ រតនៈ បានលើកឡើងពីសភាពការណ៍ជាតិ តំបន់ និងអន្តរជាតិ ក៏ដូចជាការខិតខំប្រឹងប្រែងរបស់សម្ដេចតេជោ ហ៊ុន សែន ក្នុងការបញ្ចប់សង្គ្រាមស៉ីវិលនៅកម្ពុជា ការបង្រួបបង្រួមជាតិ ការស្វែងរកសន្តិភាព និងការខិតខំអភិវឌ្ឍប្រទេសជាតិប្រកបដោយភាពរីកចម្រើន ប្រជាពលរដ្ឋរស់នៅនិងប្រកបមុខរបរ-ការងារដោយភាពសុខសាន្ត។ កិច្ចខិតខំទាំងនេះ គឺជាសច្ចភាពប្រវត្តិសាស្ត្ររបស់កម្ពុជា បន្ទាប់ពីឆ្អែតឆ្អន់ក្នុងសង្គ្រាម៥០០ឆ្នាំមកនោះ។
ឯកឧត្តមរដ្ឋមន្ត្រី បានបន្តថា គ្រឹះនៃការអភិវឌ្ឍរបស់សម្ដេចតេជោ ហ៊ុន សែន កំពុងបន្តខិតខំកសាងបន្ថែមទៀតដោយសម្ដេចមហាបវរធិបតី ហ៊ុន ម៉ាណែត ទោះបីពិភពលោកកំពុងជួបសភាពការណ៍តានតឹងខ្លាំងដោយសារសង្គ្រាមរុស្ស៉ី-អ៊ុយក្រែន វិបត្តិសេដ្ឋកិច្ចពិភពលោក វិបត្តិជំងឺកូវីដ១៩ វិបត្តិសង្គ្រាមនៅតំបន់មជ្ឈិមបូព៌ាយ៉ាងណាក្ដី។
បន្ថែមពីនេះ ឯកឧត្តមរដ្ឋមន្ត្រី កែវ រតនៈ បានបញ្ជាក់ដែរថា រាជរដ្ឋាភិបាលនីតិកាលទី៧ ក្រោមការដឹកនាំរបស់សម្ដេចធិបតី ហ៊ុន ម៉ាណែត បាននិងកំពុងពង្រឹងនិងពង្រីកសេដ្ឋកិច្ចជាតិ ដោះស្រាយបញ្ហាជាច្រើនជូនប្រជាពលរដ្ឋកម្ពុជា ហើយនឹងឈានទៅបង្កើតមូលដ្ឋានគ្រឹះថ្មីសម្រាប់សេដ្ឋកិច្ច និងសង្គមជាតិ នាពេលអនាគត។
ជាមួយគ្នានោះដែរ ឯកឧត្តមរដ្ឋមន្ត្រី កែវ រតនៈ ក៏បានប្រគល់អំណោយជាគ្រឿងឧបភោគបរិភោគ និងថវិកាឧបត្ថម្ភមួយចំនួនជូនដល់បញ្ជាការដ្ឋានកងថ្មើរជើងលេខ៤២ និងវរសេនាតូចនគរបាលការពារព្រំដែនគោកលេខ៧០២ សរុបជាទឹកប្រាក់មានចំនួនជាង៥ម៉ឺនដុល្លារសហរដ្ឋអាមេរិក ៕
