កិច្ចប្រជុំរដ្ឋមន្ត្រីការបរទេសអាស៊ាន កាលពីម្សិលមិញ សម្រេចបានសមិទ្ធផលជាច្រើន
វៀងចន្ទន៍៖ លោក សាឡឺមសាយ កុម៉ាសិទ្ធ (Saleumxay Kommasith) ឧបនាយករដ្ឋមន្ត្រី និងជារដ្ឋមន្ត្រីក្រសួងការបរទេសឡាវ កាលពីថ្ងៃទី៨ ខែតុលា ឆ្នាំ២០២៤ បានធ្វើជាប្រធានកិច្ចប្រជុំរដ្ឋមន្ត្រីការបរទេសអាស៊ាន។ កិច្ចប្រជុំឆ្នាំនេះ ធ្វើឡើងលើប្រធានបទ «អាស៊ាន៖ លើកកម្ពស់ការតភ្ជាប់ និងភាពធន់»។
កិច្ចប្រជុំដែលមានការចូលរួមពីរដ្ឋមន្ត្រីការបរទេសអាស៊ាន អគ្គលេខាធិការអាស៊ាន រដ្ឋមន្ត្រីការបរទេសទីម័រខាងកើត និងគណៈប្រតិភូជាច្រើនរូបទៀត។ រដ្ឋមន្ត្រីការបរទេសអាស៊ាន បានកត់សម្គាល់ និងវាយតម្លៃខ្ពស់ចំពោះវឌ្ឍនភាពនៃការអនុវត្តចក្ខុវិស័យសហគមន៍អាស៊ាន ឆ្នាំ២០២៥ និងអាទិភាពចំនួនប្រាំបួននៃការធ្វើជាប្រធានអាស៊ានរបស់ឡាវ ដើម្បីកសាងសហគមន៍អាស៊ានដែលមានទំនាក់ទំនង និងរឹងមាំជាងមុន និងធ្វើឱ្យប្លុកដែលមានសមាជិក១០ប្រទេសនេះ អាចដោះស្រាយបញ្ហាប្រឈមផ្សេងៗប្រកបដោយប្រសិទ្ធភាព ទាន់ពេលវេលា និងចាប់យកឱកាសដើម្បីនាំមកនូវផលប្រយោជន៍ដល់ប្រជាជនដ៏ច្រើនសន្ធឹក ចំពេលភូមិសាស្ត្រនយោបាយកាន់តែស្មុគស្មាញ និងពិបាកស្មានទុកជាមុន។
រដ្ឋមន្ត្រីការបរទេសអាស៊ាន បានសាទរចំពោះវឌ្ឍនភាពក្នុងការបង្កើតសេចក្តីព្រាងផែនការយុទ្ធសាស្ត្រ ដើម្បីអនុវត្តចក្ខុវិស័យសហគមន៍អាស៊ានឆ្នាំ២០៤៥ និងបានលើកទឹកចិត្តដល់ស្ថាប័នពាក់ព័ន្ធ ដែលបានបញ្ចប់សេចក្តីព្រាងផែនការយុទ្ធសាស្ត្រសម្រាប់ការអនុម័តរួមគ្នា ជាមួយចក្ខុវិស័យសហគមន៍អាស៊ាន ឆ្នាំ២០៤៥ នៅឆ្នាំក្រោយ ដែលម៉ាឡេស៊ី ជាប្រធាន។ មិនត្រឹមតែប៉ុណ្ណោះ កិច្ចប្រជុំក៏បានពិភាក្សា និងពិចារណាលើសំណើរបស់បណ្តាប្រទេសក្រៅតំបន់ ក្នុងការចូលជាសមាជិកនៃសន្ធិសញ្ញាមិត្តភាព និងកិច្ចសហប្រតិបត្តិការ (TAC)។ ក្នុងន័យនេះ អង្គប្រជុំបានឯកភាពលើពាក្យស្នើសុំរបស់ប្រទេសមកពីតំបន់អឺរ៉ុប ហុងគ្រី ដើម្បីចូលសមាជិក TAC និងប្រគល់ភារកិច្ចឱ្យលេខាធិការដ្ឋានអាស៊ាន ពិនិត្យលើសំណើររបស់ប្រទេសប៉ូឡូញ រូម៉ានី និងអ៊ុយរ៉ាហ្គាយ ហើយទន្ទឹងរង់ចាំស្វាគមន៍លុចសំបួរ ដែលគ្រោងនឹងចុះហត្ថលេខាលើការចូលជាសមាជិក TAC នាពេលដ៏ខ្លីខាងមុខ។
កិច្ចប្រជុំ ក៏បានទន្ទឹងរង់ចាំការចូលជាសមាជិកនៃសាធារណរដ្ឋប្រជាធិបតេយ្យប្រជាមានិតអាល់ហ្សេរី សាធារណរដ្ឋហ្វាំងឡង់ ព្រះរាជាណាចក្រអេស្ប៉ាញ ម៉ិកស៊ិក និងហុងគ្រី ទៅកាន់ TAC។ កិច្ចប្រជុំបានពិភាក្សាអំពីទំនាក់ទំនងរបស់អាស៊ានជាមួយដៃគូខាងក្រៅ និងបានអះអាងសាជាថ្មីអំពីសារសំខាន់នៃកិច្ចសហប្រតិបត្តិការដែលប្រសើរឡើង និងមជ្ឈភាពអាស៊ាននៅក្នុងនិម្មាបនកម្មតំបន់ដែលកំពុងវិវត្ត។
ពាក់ព័ន្ធនឹងបញ្ហានេះ ឡាវ ក្នុងនាមជាអ្នកសម្របសម្រួលប្រទេសសម្រាប់អាស៊ាន-កាណាដា បានសម្ដែងការពេញចិត្តចំពោះការគាំទ្រ ក្នុងការរៀបចំកិច្ចប្រជុំកំពូលពិសេសអាស៊ាន-កាណាដា ស្តីពីការពង្រឹងការតភ្ជាប់ និងភាពធន់របស់អាស៊ាន។
ជាចុងក្រោយ អង្គប្រជុំបានបញ្ចប់ដោយការអនុម័តលើឯកសារលទ្ធផលចំនួនបី ដែលនឹងដាក់ជូនមេដឹកនាំអាស៊ានបន្ថែម ដើម្បីពិចារណាក្នុងកិច្ចប្រជុំកំពូលអាស៊ានលើកទី៤៤ និងទី៤៥ រួមមាន៖ ១.សេចក្តីថ្លែងការណ៍របស់មេដឹកនាំអាស៊ាន ស្តីពីការអភិវឌ្ឍផែនការយុទ្ធសាស្ត្រ ដើម្បីអនុវត្តចក្ខុវិស័យសហគមន៍អាស៊ាន ឆ្នាំ២០៤៥។ ២.សេចក្តីថ្លែងការណ៍របស់មេដឹកនាំអាស៊ាន ស្តីពីទស្សនវិស័យអាស៊ាននាពេលអនាគត ស្តីពីឥណ្ឌូប៉ាស៊ីហ្វិក និងនិម្មាបនកម្មតំបន់អាស៊ាន។ និង៣.ការពិនិត្យឡើងវិញ និងការសម្រេចចិត្តរបស់មេដឹកនាំអាស៊ាន ស្តីពីការអនុវត្តកិច្ចព្រមព្រៀងឯកច្ឆន្ទ ៥ចំណុច៕
