កូរ៉េខាងត្បូង និងសិង្ហបុរី ព្រមព្រៀងគ្នាក្នុងការចាប់ផ្តើមភាពជាដៃគូយុទ្ធសាស្ត្រនៅឆ្នាំក្រោយ
សិង្ហបុរី៖ លោក ឡរ៉េន វង្ស នាយករដ្ឋមន្ត្រីសិង្ហបុរី បានប្រកាសកាលពីថ្ងៃអង្គារទី៨ ខែតុលាថា កូរ៉េខាងត្បូង និងសិង្ហបុរី បានព្រមព្រៀងគ្នាក្នុងការចាប់ផ្តើមភាពជាដៃគូយុទ្ធសាស្ត្រនៅឆ្នាំក្រោយ ដោយប្រារព្ធខួបលើកទី៥០ នៃការបង្កើតទំនាក់ទំនងការទូតរបស់ប្រទេសទាំងពីរ។
ប្រទេសទាំងពីរ បានចុះហត្ថលេខាលើសន្ធិសញ្ញាស្តីពីការធ្វើបត្យាប័ន ហើយនឹងសម្លឹងមើលការពង្រឹងកិច្ចសហប្រតិបត្តិការក្នុងវិស័យដូចជា បញ្ញាសិប្បនិម្មិត ការពារជាតិ និងការប្រែប្រួលអាកាសធាតុ ក៏ដូចជាការធ្វើឱ្យប្រសើរឡើងនូវកិច្ចព្រមព្រៀងពាណិជ្ជកម្មសេរី។ លោក វង្ស បានប្រាប់សន្និសីទសារព័ត៌មានរួមគ្នាជាមួយប្រធានាធិបតីកូរ៉េខាងត្បូង លោក យូន ស៊ុកយុល កំពុងបំពេញទស្សនកិច្ចផ្លូវរដ្ឋថា ការធ្វើឱ្យប្រសើរឡើងនេះ មិនមែនគ្រាន់តែជាការផ្លាស់ប្ដូរឈ្មោះប៉ុណ្ណោះទេ វាថែមទាំងមានន័យថា កិច្ចសហប្រតិបត្តិការដ៏ច្រើនថែមទៀត។
លោកបន្ថែមថា «ប្រទេសទាំងពីរមានគុណសម្បត្តិជាច្រើនដូចគ្នា។ យើងទាំងពីរ គឺជាខ្លាអាស៊ី ដែលបានផ្លាស់ប្ដូរសេដ្ឋកិច្ចរបស់យើងដោយជោគជ័យ។ ហើយដោយសារយើងបានទទួលប្រយោជន៍យ៉ាងច្រើនពីសន្តិភាព និងស្ថិរភាពក្នុងតំបន់ យើងព្យាយាមពង្រឹងផ្នែករបស់យើង ដើម្បីរួមចំណែកឆ្ពោះទៅរកនីតិរដ្ឋ និងពង្រឹងសណ្តាប់ធ្នាប់សកលដោយផ្អែកលើច្បាប់»។
លើសពីនេះ កូរ៉េខាងត្បូង ជាប្រទេសនាំចូលឧស្ម័នធម្មជាតិរាវ (LNG) លំដាប់ទី៣របស់ពិភពលោក និងសិង្ហបុរី ដែលជាមជ្ឈមណ្ឌល LNG បានចុះហត្ថលេខាលើកិច្ចព្រមព្រៀង ស្តីពីកិច្ចសហប្រតិបត្តិការក្នុងការផ្គត់ផ្គង់ LNG ដើម្បីទទួលបានអត្ថប្រយោជន៍ស្ថិរភាពនៃខ្សែច្រវាក់ផ្គត់ផ្គង់អន្តរជាតិ។ ប្រទេសទាំង ក៏បានចុះហត្ថលេខាលើកិច្ចព្រមព្រៀងចំនួនបួន ស្តីពីខ្សែច្រវាក់ផ្គត់ផ្គង់ កិច្ចសហប្រតិបត្តិការបច្ចេកវិទ្យា សុវត្ថិភាពចំណីអាហារ និងការចាប់ផ្តើមអាជីវកម្ម។ លោក យូន ដែលបានទៅបំពេញទស្សនកិច្ចនៅប្រទេសហ្វីលីពីន ក្នុងសប្តាហ៍នេះ បានបញ្ចប់ដំណើររបស់លោកនៅលើទឹកដីនៃប្រទេសតូចជាងគេនៅអាស៊ីអាគ្នេយ៍ នៅថ្ងៃពុធ មុនពេលបន្តដំណើរទៅកាន់ប្រទេសឡាវ សម្រាប់កិច្ចប្រជុំកំពូលថ្នាក់តំបន់នៃមេដឹកនាំនៃសមាគមប្រជាជាតិអាស៊ីអាគ្នេយ៍ (អាស៊ាន) និងប្រទេសអាស៊ីមួយចំនួនទៀត។
កាសែត Straits Times បានដកស្រង់សម្តីលោក យូន បាននិយាយនៅក្នុងបទសម្ភាសជាលាយលក្ខណ៍អក្សរមួយថា រដ្ឋធានីសេអ៊ូលនឹងចូលរួមក្នុងសមយុទ្ធយោធារួមគ្នាជាមួយអាស៊ាន និងបង្កើនកិច្ចសហប្រតិបត្តិការឧស្សាហកម្មការពារជាតិ។ លោកបានបន្ថែមថា រដ្ឋធានីសេអ៊ូលក៏នឹងធ្វើការរួមគ្នាផងដែរ ដើម្បីប្រយុទ្ធប្រឆាំងនឹងការគំរាមកំហែង ដែលកំពុងកើតមានដូចជា អ៊ីនធឺណិត និងឧក្រិដ្ឋកម្មឆ្លងដែន៕
