អនុប្រធានទី១ ក្រុមប្រឹក្សាអភិវឌ្ឍន៍កម្ពុជា ជួបពិភាក្សាការងារជាមួយគណៈប្រតិភូក្រុមហ៊ុន ហ៊ិននីគែន ខេមបូឌា
នាព្រឹកថ្ងៃទី៩ ខែតុលា ឆ្នាំ២០២៤ ឯកឧត្តម ស៊ុន ចាន់ថុល ឧបនាយករដ្ឋមន្រ្តី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា បានអនុញ្ញាតជូនលោក Andy Hewson នាយកគ្រប់គ្រងក្រុមហ៊ុន ហ៊ិននីគែន ខេមបូឌា (Heineken Cambodia) ចូលជួបសម្ដែងការគួរសម និងពិភាក្សាការងារ។
ក្នុងឱកាសនេះ លោក Andy Hewson បានរំលេចឡើងអំពីប្រតិបត្តិការអាជីវកម្មរបស់ក្រុមហ៊ុននៅក្នុងប្រទេសកម្ពុជាដែលមានរយៈពេលប្រមាណ៣០ឆ្នាំមកហើយ ពោលក្រោយទទួលបានការអនុម័តឱ្យវិនិយោគពីរាជរដ្ឋាភិបាលកម្ពុជា តាមរយៈក្រុមប្រឹក្សាអភិវឌ្ឍន៍កម្ពុជាកាលពីឆ្នាំ១៩៩៤។
លោកនាយកគ្រប់គ្រងក៏បានបន្តដោយថ្លែងអំណរគុណចំពោះឯកឧត្តមឧបនាយករដ្ឋមន្រ្តី និងរាជរដ្ឋាភិបាលកម្ពុជាចំពោះកិច្ចសហការ និងការសម្របសម្រួលនានា ដែលអនុញ្ញាតឱ្យក្រុមហ៊ុនមានលទ្ធភាពបន្តរួមចំណែកដល់ការអភិវឌ្ឍសង្គម-សេដ្ឋកិច្ច និងបង្កើតការងារជូនប្រជាពលរដ្ឋកម្ពុជា៕
