ឯកឧត្តមបណ្ឌិត កៅ ថាច លើកទឹកចិត្តនិងស្នើដល់ម្ចាស់រោងម៉ាស៊ីនកិនស្រូវទាំងអស់ បន្តពង្រឹងសាមគ្គីភាពគ្នា ដើម្បីលើកស្ទួយវិស័យស្រូវអង្ករកម្ពុជា ឱ្យមានការរីកចំរើន

ភ្នំពេញ៖ ឯកឧត្តមបណ្ឌិត កៅ ថាច ប្រតិភូរាជរដ្ឋាភិបាលទទួលបន្ទុកជាអគ្គនាយកនៃធនាគារអភិវឌ្ឍន៍ជនបទ និងកសិកម្ម (ARDB) បានលើកទឹកចិត្តនិងស្នើដល់ម្ចាស់រោងម៉ាស៊ីនកិនស្រូវទាំងអស់ បន្តពង្រឹងសាមគ្គីភាពគ្នា ដើម្បីលើកស្ទួយវិស័យស្រូវអង្កររបស់កម្ពុជា ឱ្យមានការរីកចំរើន។

បន្ទាប់ពីចុះពិនិត្យស្ថានភាពទិញស្រូវនៅតាមបណ្តារោងម៉ាស៊ីនកិនស្រូវនៅតាមជុំវិញ បឹងទន្លេសាប នៅថ្ងៃទី៩ ខែតុលា ឆ្នាំ២០២៤ រួចមក, នៅ ព្រឹកថ្ងៃទី១០ ខែតុលា ឆ្នាំ២០២៤ ឯកឧត្តមបណ្ឌិត កៅ ថាច ប្រតិភូរាជរដ្ឋាភិបាលទទួលបន្ទុកជាអគ្គនាយកនៃធនាគារអភិវឌ្ឍន៍ជនបទ និងកសិកម្ម (ARDB) និងមានការចូលរួមពី ឧកញ៉ា សុង សារ៉ន ប្រធានក្រុមប្រឹក្សាភិបាល សហព័ន្ធស្រូវអង្ករកម្ពុជា (CRF) និងជាប្រធានក្រុមហ៊ុន អេមរុរ៉ាយស៍ , ឧកញ៉ា ភូ ពុយ ប្រធានក្រុមប្រឹក្សាភិបាល ធនាគារស្រូវកម្ពុជា និងក្រុមហ៊ុន បៃតង កម្ពុជា, លោក លន់ យ៉េន អគ្គលេខាធិការសហព័ន្ធស្រូវអង្ករកម្ពុជា និងតំណាងរោងម៉ាស៊ីនកិនស្រូវ និងតំណាងក្រុមហ៊ុននាំចេញអង្ករ ក្នុងខេត្តពោធិ៍សាត់ បាត់ដំបង និងបន្ទាយមានជ័យ បានអញ្ជើញចូលរួមកិច្ចប្រជុំក្នុងគោលបំណង៖

(១) ចែករំលែកព័ត៌មានថ្មីៗអំពីតម្លៃស្រូវនៅវាលស្រែ, តម្លៃស្រូវដឹកមកដល់រោងម៉ាស៊ីន និងតំបន់ដែលកសិករកំពុងច្រូតកាត់ស្រូវ និងត្រូវប្រមូលផលនាពេលខាងមុខ។ ឯកឧត្តមបណ្ឌិត កៅ ថាច បាន គូសរំលេច និងបញ្ជាក់ថា ថ្មីៗនេះ មានព័ត៌មានជាច្រើនតាមបណ្តាញសង្គមបានចែកចាយអំពីតំលៃស្រូវធ្លាក់ចុះ កសិករលក់ស្រូវមិនចំណេញជាដើម-ល-។ ប៉ុន្តែតាមការចុះជាក់ស្តែងតាមរោងម៉ាស៊ីនជុំវិញបឹងទន្លេសាប ការទិញស្រូវនៅតាមរោងម៉ាស៊ីន គឺសមរម្យ ហើយអាចឱ្យកសិករនៅរក្សាប្រាក់ចំណេញបាន មិនដូចការលើកឡើងតាមព័ត៌មានតាមបណ្តាញសង្គមនោះទេ។ ដោយឡែកម្ចាស់រោងម៉ាស៊ីនក៏បានបង្ហាញឆន្ទៈចូលរួមជាមួយរាជរដ្ឋាភិបាល ដើម្បីលើកកម្ពស់ និងធានាស្ថេរភាពថ្លៃស្រូវតាមគោលនយោបាយរបស់រាជរដ្ឋាភិបាល ដែលមានធនាគារ ARDB ជាតួអង្គប្រតិបត្តិករ។

(២) ឯកឧត្តមបណ្ឌិត បន្តលើកទឹកចិត្តដល់ម្ចាស់រោងម៉ាស៊ីន ក្នុងករណីមានតម្រូវការហិរញ្ញប្បទានបន្ថែមសម្រាប់ការទិញស្រូវ អាចទំនាក់ទំនងមកធនាគារ ARDB ដោយទទួលបានអត្រាការប្រាក់អនុគ្រោះ។

(៣) ឯកឧត្តមបណ្ឌិត កៅ ថាច បានស្នើសុំទៅកាន់ម្ចាស់រោងម៉ាស៊ីនទាំងអស់ ធ្វើការចែករំលែកអំពីព័ត៌មានទីផ្សារស្រូវអង្ករលើទីផ្សារក្នុងស្រុក និងនៅបរទេស ជាពិសេសពិភាក្សាអំពីស្ថានភាពនៃការវិវឌ្ឍន៍តំលៃអង្ករនៅលើទីផ្សារអន្តរជាតិ ជូនដល់អង្គប្រជុំជ្រាប និងបានត្រៀមខ្លួន។

(៤) ធ្វើការ ពិភាក្សាអំពីស្ថានភាពបច្ចុប្បន្នអំពីតំលៃស្រូវនៅកម្ពុជា ធៀបនឹងតំលៃនៅលើទីផ្សារបរទេស និងព្យាករណ៍អំពីបញ្ហាប្រឈមនានារបស់រោងម៉ាស៊ីនកិនស្រូវនៅពេលអណាគត។ ជាពិសេសការត្រៀមប្រមូលស្រូវវស្សា ( រំដួល-ម្លិះ) នៅខែ វិច្ឆិកា និងខែធ្នូ ខាងមុខនេះ។

(៥) អំពីតំលៃអគ្គិសនី, ឯកឧត្តមបណ្ឌិត បានស្នើសុំទៅកាន់ សហព័ន្ធស្រូវអង្ករ (CRF) ធ្វើការជូនដំណឹង អំពីការចុះថ្លៃពិសេសសម្រាប់រោងម៉ាស៊ីនកិនស្រូវ ទៅសមាជិកទាំងអស់អោយបានជ្រាប។ បន្ថែមលើនេះ អង្គប្រជុំបានបន្ត ពិភាក្សាលើបញ្ហាប្រឈមនានាក្នុងខ្សែច្រវ៉ាក់ផលិតកម្មស្រូវ, និងលើកដំដោះស្រាយដើម្បីកែលម្អ។

(៦) ឯកឧត្តមបណ្ឌិត បានណែនាំដល់ម្ចាស់រោងម៉ាស៊ីនកិនស្រូវទាំងអស់ សូមធ្វើការគិតគូរអំពីស្តុកស្រូវ ដើម្បីធានាអំពីសន្តិសុខស្បៀងសម្រាប់ប្រទេសយើង។

(៧) ឯកឧត្តមបណ្ឌិត លើកទឹកចិត្ត និងស្នើសុំ ដល់ម្ចាស់រោងម៉ាស៊ីន កិនស្រូវទាំងអស់ បន្តពង្រឹងសាមគ្គីភាព សាមគ្គីគ្នា ដើម្បីលើស្ទួយវិស័យស្រូវអង្កររបស់កម្ពុជា ឱ្យមានការរីកចំរើន ដើម្បីសម្រេចគោលដៅនៃការនាំចេញអង្កររបស់កម្ពុជា ទៅកាន់ទីផ្សារបរទេស។

(៨) ក្នងឱកាសនោះ អង្គប្រជុំក៏បានធ្វើការពិភាក្សា លើបញ្ហាប្រឈមមួយចំនួនផ្សេងទៀត ក៏ដូចជាដាក់ចេញជាដំណោះស្រាយផងដែរ។

សូមបញ្ជាក់ផងដែរថា នេះ ជាកិច្ចប្រជុំ ធ្វើឡើងរវាងធនាគារ ARDB និងម្ចាស់រោងម៉ាស៊ីនកិនស្រូវ ក្នុងតំបន់ បាត់ដំបង បន្ទាយមានជ័យ និងពោធិ៍សាត់ ជាប្រចាំដើម្បីតាមដានស្ថានភាពស្រូវអង្ករ រវាង ធនាគារអភិវឌ្ឍន៍ជនបទ និងកសិកម្ម និងសហព័ន្ធស្រូវអង្ករកម្ពុជា (CRF)៕