គណៈប្រតិភូក្រសួងការងារ អញ្ជើញចូលរួមកិច្ចពិភាក្សាតុមូលរបស់ជំនាញការអាស៊ីស្ដីពី កិច្ចគាំពារផ្នែកនិកម្មភាពការងារឆ្នាំ ២០២៤
ហ្សាការតា៖ ឯកឧត្តម ម៉េង ហុង ប្រតិភូរាជរដ្ឋាភិបាលទទួលបន្ទុកជាអគ្គនាយកបេឡាជាតិសន្តិសុខសង្គម នៃក្រសួងការងារ និងបណ្តុះបណ្តាលវិជ្ជាជីវៈ បានដឹកនាំមន្ត្រីជំនាញចូលរួមអម ឯកឧត្តម គួច សុមាន រដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ តំណាងដ៏ខ្ពង់ខ្ពស់ ឯកឧត្តម ហេង សួរ រដ្ឋមន្រ្តីក្រសួងការងារនិងបណ្តុះបណ្តាលវិជ្ជាជីវៈ ចូលរួមកិច្ចពិភាក្សាតុមូលរបស់ជំនាញការអាស៊ីស្ដីពី កិច្ចគាំពារផ្នែកនិកម្មភាពការងារឆ្នាំ២០២៤។
វេទិកានេះ ប្រារព្ធឡើងក្នុងគោលបំណងដើម្បីចែករំលែកបទពិសោធន៍ និងចំនេះដឹងអំពីគោលនយោបាយ, ការគ្រប់គ្រង និងប្រតិបត្តិការរបបសន្តិសុខសង្គមផ្នែកនិកម្មភាពការងារ និងបង្កើនបរិយាកាសពិភាក្សាសម្រាប់ជំនាញការផ្នែកសន្តិសុខសង្គម និងប្រតិបត្តិករសន្តិសុខសង្គមនៅក្នុងតំបន់អាស៊ី-ប៉ាស៊ីហ្វិក អំពីរបបសន្តិសុខសង្គមផ្នែកនិកម្មភាពការងារ។
ក្នុងឱកាសនោះដែរ ឯកឧត្តម គួច សុមាន រដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ បានចែករំលែកអំពីវឌ្ឍនភាពនៃការអនុវត្តរបបសន្តិសុខសង្គមផ្នែកហានិភ័យការងារ ថែទាំសុខភាព និងផ្នែកប្រាក់សោធន ព្រមទាំងលើកឡើងអំពីការសិក្សាសមិទ្ធិលទ្ធភាពក្នុងការអនុវត្តរបបសន្តិសុខសង្គមផ្នែកនិកម្មភាពការងារ នាពេលអនាគត ស្របតាមផែនការយុទ្ធសាស្ត្រអភិវឌ្ឍន៍វិស័យការងារ សន្តិសុខសង្គម និងបណ្តុះបណ្តាលវិជ្ជាជីវៈ ឆ្នាំ២០២៤-២០២៨។
សូមបញ្ជាក់ថា៖ កិច្ចពិភាក្សាតុមូលខាងលើនេះ ប្រព្រឹត្តទៅមានរយៈពេល ២ថ្ងៃ គឺចាប់ពីថ្ងៃទី៩-១០ ខែតុលា ឆ្នាំ២០២៤ ដែលសហការរៀបចំឡើងដោយរាជរដ្ឋាភិបាលនៃប្រទេសជប៉ុន, អង្គការអន្តរជាតិខាងការងារ និងអង្គភាពធានារ៉ាប់រងសំណងគ្រោះថ្នាក់ការងារអាស៊ីនៃសាធារណរដ្ឋឥណ្ឌូណេស៊ី ដោយមានការចូលរួមពីតំណាងស្ថាប័នសន្តិសុខសង្គមជាសមាជិកនៃសមាគមសំណងគ្រោះថ្នាក់ការងារអាស៊ី (AWCA), តំណាងកម្មករនិយោជិត តំណាងនិយោជក និងតំណាងរដ្ឋាភិបាល វាគ្មិនជំនាញ និងសិក្ខាកាម មកពីបណ្តាប្រទេសរួមមាន៖ កម្ពុជា ឥណ្ឌូណេស៊ី ឡាវ ម៉ាឡេស៊ី ម៉ុងហ្គោលី ហ្វីលីពីន ថៃ វៀតណាម ចិន ឥណ្ឌា ជប៉ុន កូរ៉េ ស្រីលង្កា នេប៉ាល់ និងទីម័រខាងកើត សរុបប្រមាណ ១៥០នាក់។
