ឯកឧត្តម ឡេង ប៉េងឡុង អគ្គលេខាធិការរដ្ឋសភាជួបពិភាក្សាការងារជាមួយនាយកប្រតិបត្តិមជ្ឈមណ្ឌលសភាអាស៊ី

ភ្នំពេញ៖ នៅវិមានរដ្ឋសភា នាព្រឹកទី១១ ខែតុលា ឆ្នាំ២០២៤ ឯកឧត្តម ឡេង ប៉េងឡុង អគ្គលេខាធិការរដ្ឋសភា បានជួបពិភាក្សាការងារជាមួយ លោក យី ប្រស្នា នាយកប្រតិបត្តិនៃវិទ្យាស្ថានសភាអាស៊ី ដែលទើបទទួលតំណែងថ្មី ជំនួស លោក ដារ៉ារិទ្ធ គឹមយាត ដែលបានលាលែង។

នៅក្នុងជំនួបនេះ ឯកឧត្តមអគ្គលេខាធិការរដ្ឋសភា បានពិភាក្សាលើកិច្ចការកសាងសមត្ថភាពមន្រ្តីក៏ដូចជាសភាកម្ពុជា និងសភាក្នុងតំបន់អាស៊ាន ក្រោមគម្រោងគាំទ្ររបស់មជ្ឈមណ្ឌលសភាអាស៊ី ជាអាទិ៍ ជំនាញស្រាវជ្រាវកិច្ចការសភា វិភាគច្បាប់ ជំនាញការទូតសភា ការប្រាស្រ័យឆ្លើយឆ្លងសភា ការវិភាគថវិកាជាតិ វិភាគគោលនយោបាយសាធារណៈ សភាឌីជីថល ព្រមទាំងជំនាញពាក់ព័ន្ធមួយចំនួន ដូចជា ការលើកកម្ពស់សមភាពយេនឌ័រ និងបញ្ហាបរិស្ថានជាដើម។ ឯកឧត្តមអគ្គលេខាធិការបានគូសបញ្ជាក់បន្ថែមអំពីតម្រូវការកសាងសមត្ថភាពរបស់មន្រ្តីអគ្គលេខាធិការដ្ឋានរដ្ឋសភានៅក្នុងកិច្ចការគាំទ្រតួនាទីទាំង៣របស់រដ្ឋសភា រួមទាំងការងារការទូតសភា។

ក្នុងន័យនេះ ឯកឧត្តមអគ្គលេខាធិការស្នើសុំឱ្យ PCAsia គិតគូរផងដែរអំពីការរៀបចំបទបង្ហាញដោយសាស្រ្តាចារ្យនិងអ្នកជំនាញអន្តរជាតិទៅលើជំនាញច្បាប់ និងជំនាញពាក់ព័ន្ធនឹងការងារសភា ព្រមទាំងការកសាងសមត្ថភាពរបស់សភាកម្ពុជាក្នុងការចូលរួមចំណែកជាមួយរាជរដ្ឋាភិបាលកម្ពុជាក្នុងការត្រៀមខ្លួនធ្វើជាម្ចាស់ផ្ទះនៃកិច្ចប្រជុំកំពូលហ្រ្វង់ហ្វូកូនីក្នុងឆ្នាំ២០២៦ខាងមុខនេះ។

សូមជម្រាបជូនថា កន្លងមក PCAsia បានផ្តល់ការគាំទ្រដល់សភាកម្ពុជាទាំងការកសាងសមត្ថភាពមន្រ្តីនិងអ្នកតំណាងរាស្រ្ត។ ចំពោះវគ្គបណ្តុះបណ្តាលសម្រាប់មន្រ្តី គឺធ្វើឡើងតាមរយៈការបណ្តុះបណ្តាលដោយផ្ទាល់នៅវិទ្យាស្ថានសភាអាស៊ីដែលមានទីតាំងនៅក្នុងវិមានរដ្ឋចំការមន (ព្រឹទ្ធសភា) និងតាមរយៈប្រព័ន្ធនិម្មិត ព្រមទាំងតាមរយៈការផ្លាស់ប្តូរបទពិសោធជាមួយសភានៃបណ្តាប្រទេសនានា ដូចជាសភាប្រទេសបារាំង សភាប្រទេសស្វីស និងសភានៃបណ្តាប្រទេសក្នុងតំបន់អាស៊ានជាដើម។ ចំណែកឯការកសាងសមត្ថភាពរបស់សមាជិកសភាគឺជាទូទៅធ្វើឡើងតាមរយៈសិក្ខាសាលាតំបន់ និងទៅតាមវិស័យដែលជាតម្រូវការរបស់គណៈកម្មការជំនាញនិមួយៗ។

នៅក្នុងជំនួបពិភាក្សានេះ លោកនាយកប្រតិបត្តិPCAsia ដែលទើបទទួលតំណែងថ្មី ក៏បានជម្រាបជូនអំពីផែនការសកម្មភាពរបស់វិទ្យាស្ថានសភាអាស៊ី ក្នុងដំណាក់កាលទី២ នៃឆ្នាំ២០២៤ និងសកម្មភាពក្នុងឆ្នាំបន្តបន្ទាប់ទៀត ពាក់ព័ន្ធទៅនឹងជំនាញនិងប្រធានបទដែលបានលើកឡើងខាងលើ។

មុននឹងបញ្ចប់លោកនាយកប្រតិបត្តិបានអះអាងជាថ្មីនៅក្នុងការបន្តគាំទ្រកសាងសមត្ថភាពសភាកម្ពុជា និងសភាក្នុងតំបន់អាស៊ានជាបន្តទៀត ស្របតាមចក្ខុវិស័យរបស់វិទ្យាស្ថាន និងតម្រូវការរបស់សភាកម្ពុជា និងសភាក្នុងតំបន់ ជាក់ស្តែង PCAsia បានផ្តល់ការគាំទ្រស្របតាមតម្រូវការរបស់សភាឡាវក្នុងការត្រៀមខ្លូនធ្វើជាម្ចាស់ផ្ទះនៃមហាសន្និបាតអាយប៉ា៤៥ ក្នុងឆ្នាំ២០២៤នេះ និងគាំទ្រសភាកម្ពុជាលើជំនាញចរចារនិងសម្របសម្រួល គាំទ្រសភាកម្ពុជាលើកិច្ចការប្រយុទ្ធប្រឆាំងទៅនឹងជំងឺមិនឆ្លង ស្របតាមការស្នើសុំរបស់គណៈកម្មការជំនាញរបស់រដ្ឋសភាកម្ពុជា៕