បរិវត្តកម្ម និងនវានុវត្តន៍នៃភាពជាអ្នកដឹកនាំ ត្រូវបានលើកយកមករៀបចំ ជាសិក្ខាសាលាចែករំលែកឧត្តមានុវត្តន៍
ភ្នំពេញ៖ ក្រសួងមុខងារសាធារណៈ រៀបចំសិក្ខាសាលាចែករំលែកឧត្តមានុវត្តន៍ស្តីពី ”បរិវត្តកម្ម និងនវានុវត្តន៍នៃភាពជាអ្នកដឹកនាំ” សម្រាប់ជូនជាប្រយោជន៍ដល់ដល់មន្រ្តីរាជការដែលស្ថិតនៅក្នុងមុខតំណែងគ្រប់គ្រងជាន់ខ្ពស់ ដែលមកពីគ្រប់ក្រសួង ស្ថាប័នថ្នាក់ជាតិ និងអភិបាលនៃគណៈអភិបាលទាំង២៥ រាជធានី-ខេត្ត។
ក្នុងប្រសាសន៍បើកសិក្ខាសាលានេះ ឯកឧត្តម យក់ ប៊ុនណា រដ្ឋលេខាធិការប្រចាំការក្រសួងមុខងារសាធារណៈ បានលើកឡើងថា ប្រធានបទដែលបានលើកយកមកចែករំលែកក្នុងថ្ងៃនេះមានផលប្រយោជន៍ក្នុងការដឹកនាំគ្រប់គ្រងអង្គភាព ឬស្ថាប័នឱ្យមានប្រសិទ្ធភាពខ្ពស់ និងការគ្រប់គ្រងការផ្លាស់ប្តូររបស់អង្គភាព ឬស្ថាប័នប្រកបដោយនិរន្តរភាព ព្រមទាំងពង្រឹងសមត្ថភាពភាពជាអ្នកដឹកនាំដល់មន្រ្តីរាជការដែលស្ថិតនៅក្នុងមុខតំណែងគ្រប់គ្រងជាន់ខ្ពស់កម្រិត អគ្គលេខាធិការ អគ្គនាយក អគ្គាធិការ និងអភិបាលនៃគណៈអភិបាលរាជធានី ខេត្ត ឬថ្នាក់ប្រហាក់ប្រហែល។
សូមជម្រាបដែរថា សិក្ខាសាលាចែករំលែកឧត្តមានុវត្តន៍ស្តីពី ”បរិវត្តកម្ម និងនវានុវត្តន៍នៃភាពជាអ្នកដឹកនាំ” នេះ មានការចូលរួមពីវាគ្មិនកិត្តិយសក្នុងការធ្វើបទបង្ហាញលើប្រធានបទឧត្តមានុវត្តន៍ស្តីពី បរិវត្តកម្មនិងនវានុវត្តន៍ក្នុងការដឹកនាំនិងគ្រប់គ្រងតែមួយប្រហាក់ប្រហែលគ្នាចំនួន ០៣រូប រួមមាន៖ ១)ឯកឧត្តម ឯក ស៊ុនចាន់ រដ្ឋមន្រ្តីប្រតិភូអមនាយករដ្ឋមន្រ្តី ២)ឯកឧត្តម គួច ចំរើន អភិបាលនៃគណៈអភិបាលខេត្តកណ្តាល និង ៣)លោកបណ្ឌិត អ៊ិន ចាន់នី ប្រធាននាយកប្រតិបត្តិ ធនាគារអេស៊ីលីដា ភីអិលស៊ី៕
