ឯកឧត្តម ហឿន សំនៀង ដឹកនាំកិច្ចប្រជុំពិភាក្សា ត្រៀមរៀបចំតេស្តរហ័សរកសារធាតុញៀនក្នុងទឹកម៉ូត្រ នៅក្រុមប្រឹក្សាអភិវឌ្ឍន៍កម្ពុជា
ភ្នំពេញ៖ ឯកឧត្តម ហឿន សំនៀង អគ្គលេខាធិការរងនៃអគ្គលេខាធិការដ្ឋាន ក.អ.ក. និងជាអនុប្រធានអចិន្ត្រៃយ៍គណៈកម្មាធិការដឹកនាំរៀបចំតេស្តរហ័សរកសារធាតុញៀនក្នុងទឹកម៉ូត្ររបស់ ក.អ.ក. តំណាងដ៏ខ្ពង់ខ្ពស់ ឯកឧត្តម គង់ វិមាន អគ្គលេខាធិការ និងជាប្រធានគណៈកម្មាធិការដឹកនាំរៀបចំតេស្តរហ័សរកសារធាតុញៀនក្នុងទឹកម៉ូត្ររបស់ ក.អ.ក. នាថ្ងៃទី១១ ខែតុលា ឆ្នាំ២០២៤ បានដឹកនាំកិច្ចប្រជុំពិភាក្សាការកំណត់ពេលវេលា ការពិនិត្យទីតាំង ការបង្កើតក្រុមការងារសហការជាមួយអាជ្ញាធរជាតិប្រយុទ្ធប្រឆាំងគ្រឿងញៀន (អ.ជ.ប.គ.ញ.) និងការត្រៀមដោះស្រាយបណ្ដឹងតវ៉ានានា ពាក់ព័ន្ធនឹងការធ្វើតេស្តរកសារធាតុញៀនប្រភេទ មេតំហ្វេតាមីន។
កិច្ចប្រជុំនេះមានការចូលរួមពីលោកឧត្តមសេនីយ៍ត្រី ង៉ែត មោទីនោ និងលោកវរសេនីយ៍ទោ លួត សុភា ជាអនុប្រធានមន្ទីរពិសោធន៍គ្រឿងញៀននៃ អ.ជ.ប.គ.ញ. ព្រមទាំងថ្នាក់ដឹកនាំ និងសមាជិក សមាជិកាគណៈកម្មាធិការដឹកនាំរៀបចំតេស្តរហ័សរកសារធាតុញៀននៃ ក.អ.ក. សរុបប្រមាណ ២០រូប។
