រដ្ឋមន្ត្រីក្រសួងផែនការ វាយតម្លៃខ្ពស់ចំពោះអង្គការ UNICEF ដែលជានិច្ចកាលបានជួយទាំងផ្នែកថវិកានិងបច្ចេកទេសដល់កម្ពុជា លើកការងារបណ្ដុះបណ្ដាលធនធានមនុស្ស

ភ្នំពេញ៖ នារសៀលថ្ងៃទី១១ ខែតុលា ឆ្នាំ២០២៤ ឯកឧត្តម ប៊ិន ត្រឈៃ រដ្ឋមន្ត្រីក្រសួងផែនការ បានអនុញ្ញាតឱ្យ លោកបណ្ឌិត Anirban Chatterjee តំណាងអង្គការ UNICEF ចូលជួបពិភាក្សាការងារ នៅទីស្ដីការក្រសួងផែនការ។ ជំនួបពិភាក្សានេះ មានគោលបំណងដើម្បីពិភាក្សា និងផ្ដល់ជូនការណែនាំពីសំណាក់ភាគីក្រសួងផែនការ ដល់ភាគី UNICEF ស្ដីពីការកសាងសមត្ថភាពពាក់ព័ន្ធនឹងការរៀបចំផែនការរដ្ឋបាលថ្នាក់ក្រោមជាតិ (SNA, sub-national administrations)។

ជាលទ្ធផលនៃជំនួបពិភាក្សាការងារនាឱកាសនេះ ភាគីទាំងពីរ UNICEF និងក្រសួងផែនការ បានឯកភាពលើកិច្ចសហប្រតិបត្តិការរវាងភាគីទាំងពីរ ដែលក្នុងនោះរួមមាន (១) វគ្គបណ្ដុះបណ្ដាលសមត្ថភាពមន្ត្រីនៅថ្នាក់ក្រោមជាតិ ដែលនឹងរៀបចំឡើង ក្នុងខេត្តចំនួន៣ គឺ ខេត្តសៀមរាប ខេត្តរតនគិរី និងខេត្តព្រះវិហារ ហើយបន្ទាប់មកនឹងរៀបចំវគ្គបណ្ដុះបណ្ដាលដល់មន្ត្រីមន្ទីរផែនការរាជធានី ខេត្តទាំង២៥ (២) ភាគី UNICEF នឹងសហការជាមួយក្រសួងផែនការ លើការជួយបណ្ដុះបណ្ដាល នឹងធ្វើឲ្យប្រសើរឡើងនូវប្រព័ន្ធមូលដ្ឋានទិន្នន័យឃុំសង្កាត់ (CDB) ព្រមទាំងគិតគូរលើការជួយទាំងធនធានថវិកា និងជំនាញបច្ចេកទេស (៣) ភាគី UNICEF នឹងជួយធ្វើបច្ចុប្បន្នភាពកម្រងសំណួរអង្កេតប្រជាសាស្ត្រ និងសុខភាព (CDHS) និងអង្កេតសេដ្ឋកិច្ចសង្គមកិច្ចកម្ពុជា (CSES) រួមទាំងកម្រងសំណួរ CDB ផងដែរ។

ឯកឧត្តមរដ្ឋមន្ត្រី បានវាយតម្លៃខ្ពស់ចំពោះអង្គការ UNICEF ដែលជានិច្ចកាលបានជួយទាំងផ្នែកថវិកានិងបច្ចេកទេស ដល់រាជរដ្ឋាភិបាលកម្ពុជា តាមរយៈក្រសួងផែនការ លើកការងារបណ្ដុះបណ្ដាលធនធានមនុស្ស រួមទាំងជំនួយបច្ចេកទេស ជំនាញនានា ពាក់ព័ន្ធវិស័យផែនការ ស្ថិតិ ប្រជាជននិងអភិវឌ្ឍន៍ ដែលរួមចំណែកក្នុងការការពារនិងលើកកម្ពស់សិទ្ធិកុមារ រួមទាំងតម្រូវការមូលដ្ឋានរបស់កុមារ ពង្រីកឱកាសអភិវឌ្ឍសមត្ថភាព ឆ្លើយតបភាពអាសន្នរបស់កុមារ និងលើកកម្ពស់សិទ្ធិស្ត្រី និងក្មេងស្រីនៅកម្ពុជា។

ជាមួយគ្នានេះ ឯកឧត្តមរដ្ឋមន្ត្រី បានថ្លែងអំណរគុណយ៉ាងជ្រាលជ្រៅចំពោះអង្គការ UNICEF ដែលបានជួយដល់ក្រសួងផែនការ លើការងាររៀបចំសេចក្តីព្រាងផែនការយុទ្ធសាស្ត្រអភិវឌ្ឍន៍ជាតិ ២០២៤-២០២៨ ត្រង់ជំពូកការតាមដានត្រួតពិនិត្យ និងវាយតម្លៃ ផងដែរ។

ជាទីបញ្ចប់ សមភាពភាគីទាំងពីរបានប្ដេជ្ញាបន្តកិច្ចសហប្រតិបត្តិការក្នុងភាពជាដៃគូយុទ្ធសាស្ត្រ ដើម្បីសម្រេចការអនុវត្តកម្មវិធីប្រចាំប្រទេសរបស់អង្គការ UNICEF ដែលរួមចំណែកក្នុងការកសាងអភិវឌ្ឍប្រទេសកម្ពុជា ឆ្ពោះទៅកាន់ការរីកចម្រើនប្រកបដោយចីរភាព៕