មន្ត្រីជាន់ខ្ពស់ក្រសួងសុខាភិបាល បើកវគ្គបណ្តុះបណ្តាល ពីការអនុវត្តគោលការណ៍ណែនាំជាតិស្តីពី ការគ្រប់គ្រងការប្រើប្រាស់ឱសថប្រឆាំងមេរោគ ដែលផ្តោតលើការអង្កេតចំណុចប្រេវ៉ាឡង់

ភ្នំពេញ៖ នាថ្ងៃទី៩ ខែតុលា ឆ្នំា២០២៤ ដោយទទួលបានការអនុញ្ញាតដ៏ខ្ពង់ខ្ពស់ពីឯកឧត្តមសាស្រ្តាចារ្យ ឈាង រ៉ា រដ្ឋមន្រ្តីក្រសួងសុខាភិបាល និងតាមការចង្អុលបង្ហាញពីឯកឧត្តមសាស្រ្តាចារ្យ កុយ វ៉ាន់នី រដ្ឋលេខាធិការក្រសួងសុខាភិបាល ឯកឧត្តម ហេង សុទ្ធី អនុរដ្ឋលេខាធិការបានចូលរួមជាគណអធិបតី និងបើកវគ្គបណ្តុះបណ្តាលអំពីការអនុវត្តគោលការណ៍ណែនាំជាតិស្តីពីការគ្រប់គ្រងការប្រើប្រាស់ឱសថប្រឆាំងមេរោគ២០១៩ ដែលផ្តោតលើការអង្កេតចំណុចប្រេវ៉ាឡង់(PPS) ដល់ក្រុមការងារគ្រប់គ្រងការប្រើប្រាស់ឱសថប្រឆាំងមេរោគនៃមន្ទីរពេទ្យកុមារជាតិ។

វគ្គបណ្តុះបណ្តាលនេះមានរយ:ពេល៣ថ្ងៃក្នុងគោលបំណងផ្តល់ចំណេះដឹងអំពីវិធីសាស្រ្តសម្រាប់អនុវត្ត ស្រាវជ្រាវ “ចំណុចអង្កេតប្រេវ៉ាឡង់-PPS” នៃការប្រើប្រាស់ឱសថប្រឆាំងមេរោគតាមបណ្តាអង្គភាពសុខាភិបាលសាធារណៈ ដើម្បីឈានដល់ការគ្រប់គ្រងឱសថប្រឆាំងមេរោគក្នុងការព្យាបាល ថែទាំអ្នកជំងឺប្រកបដោយគុណភាពនិងប្រសិទ្ធភាពខ្ពស់ និងគោលដៅចុងក្រោយចូលរួម កាត់បន្ថយភាពស៊ាំនឹងឱសថប្រឆាំងមេរោគនៅព្រះរាជាណាចក្រកម្ពុជា។

គួរបញ្ជាក់ផងដែរ វគ្គបណ្តុះបណ្តាលនេះ មានការអញ្ជើញចូលរួមដោយឯកឧត្តម ញឹប អង្គារបុស្ស ជានាយកមន្ទីរពេទ្យកុមារជាតិ លោកសាស្រ្តាចារ្យ កឹម សាវួន អនុប្រធាននាយកដ្ឋានមន្ទីរពេទ្យ តំណាងអង្គការសុខភាពពិភពលោក អង្គការខាណា និងគ្រូសម្របសម្រួល ពីនាយកដ្ឋានមន្ទីរពេទ្យ មន្ទីរពេទ្យមិត្តភាពខ្មែរ-សូវៀត មន្ទីរពេទ្យព្រះអង្គឌួង មន្ទីរពេទ្យបង្អែកខេត្តបាត់ដំបង មន្ទីរពេទ្យបង្អែកខេត្តកំពង់ឆ្នាំង និងសិក្ខាកាម ជាតំណាង ក្រុមការងារគ្រប់គ្រងការប្រើប្រាស់ឱសថប្រឆាំងមេរោគ នៃមន្ទីរពេទ្យតេជោសន្តិភាព មន្ទីរពេទ្យហ្លួងម៉ែ មន្ទីរពេទ្យគន្ធបុប្ផា មន្ទីរពេទ្យជ័យវរ្ម័នទី៧ សរុបចំនួន ៤៥ រូប។