អគ្គនាយក CMAC ដឹកនាំប្រជុំកិច្ចប្រចាំសប្តាហ៍ជាមួយថ្នាក់ដឹកនាំ និងមន្រ្តីរបស់អង្គភាព
ភ្នំពេញ៖ ឯកឧត្តម ហេង រតនា ប្រតិភូរាជរដ្ឋាភិបាលទទួលបន្ទុកជាអគ្គនាយកនៃមជ្ឈមណ្ឌលសកម្មភាពកំចាត់មីនកម្ពុជា (CMAC) នៅថ្ងៃចន្ទ ទី១៤ ខែតុលា ឆ្នាំ២០២៤ បានដឹកនាំប្រជុំកិច្ចប្រចាំសប្តាហ៍ជាមួយថ្នាក់ដឹកនាំ និងមន្រ្តីរបស់អង្គភាព។
ក្នុងកិច្ចប្រជុំនេះ ឯកឧត្តមអគ្គនាយក បានជម្រាបជូនពីវឧ្ឍនភាពនៃស្ថានភាពគម្រោងនានាដែលកំពុងត្រូវបានអនុវត្តនៅតាមទីវាលនៅក្នុងឆ្នាំ២០២៤ និងការត្រៀមកម្លាំងសម្រាប់ការអនុវត្តគម្រោងជាបន្តបន្ទាប់។
ឯកឧត្តមបានជម្រាបជូនពីសញ្ញាវិជ្ជមាននៃជំនួបជាមួយ អនុប្រធានបេសកកម្ម (អនុទូត) នៃស្ថានទូតជប៉ុនប្រចាំកម្ពុជា ក្នុងជំនួយរបស់រដ្ឋាភិបាលជប៉ុនសម្រាប់វិស័យសកម្មភាពបោសសម្អាតមីននាឆ្នាំបន្តបន្ទាប់។
បន្ថែមពីនេះ ឯកឧត្តមអគ្គនាយក ក៏បានមានប្រសាសន៍ពាក់ព័ន្ធទៅនឹងការប្រែប្រួលគម្រោងមួយចំនួនដែលចាំបាច់ត្រូវធ្វើការកែសម្រួលកម្លាំងប្រតិបត្តិការ ជាពិសេសកាដាក់បញ្ចូលក្មួយៗអ្នកបន្តវេនជំនាន់ក្រោយ ដោយសារតែមន្រ្តីមួយចំនួនត្រូវបានដាក់ឱ្យចូលនិវត្តន៍ដោយសារតែកត្តាសុខភាព និងដល់អាយុដែលត្រូវចូលនិវត្តន៍។
មុននឹងបញ្ចប់កិច្ចប្រជុំឯកឧត្តមក៏បានក្រើនរំលឹកដល់មន្រ្តី-បុគ្គលិកឱ្យយកចិត្តទុកដាក់បន្ថែមក្នុងការភារកិច្ចប្រចាំថ្ងៃ និងបន្តការរៀនសូត្រជាប្រចាំដើម្បីទទួលបានធាតុទន់សម្រាប់ឱកាសការងារ ដើម្បីឆ្លើយតបទៅនឹងតម្រូវការនៅក្រៅប្រទេសក្នុងវិស័យសកម្មភាពមីនផងដែរ៕
