អភិបាលខេត្តពោធិ៍សាត់ ជំរុញដល់ក្រុមការងារសាងសង់ផ្លូវក្រាលកៅស៊ូ ឆ្ពោះទៅតំបន់ដោះស្រាយផលប៉ះពាល់ ត្រង់ចំណុចអូរ១ អូរ២ ក្នុងឃុំប្រម៉ោយ ស្រុកវាលវែង ត្រូវពន្លឿនការស្ថាបនា
ភ្នំពេញ៖ នាថ្ងៃទី១៤ ខែតុលា ឆ្នាំ២០២៤នេះ ឯកឧត្តម ខូយ រីដា អភិបាល នៃគណៈអភិបាលខេត្តពោធិ៍សាត់ បានជំរុញដល់ក្រុមការងារសាងសង់ផ្លូវក្រាលកៅស៊ូ រួមទាំងសំណង់សិល្បការមួយចំនួន ឆ្ពោះទៅតំបន់ដីសម្បទានរបស់រដ្ឋ ដែលត្រូវដោះស្រាយជូនប្រជាពលរដ្ឋ ឱ្យចាកចេញពីតំបន់អភិរក្សធនធានធម្មជាតិអន្ទង់អាំង ភ្នំ១៥០០ ត្រូវពន្លឿនការស្ថាបនា ធ្វើយ៉ាងណាឱ្យបានមុនពិធីបុណ្យចូលឆ្នាំថ្មីប្រពៃណីជាតិខ្មែរ។
ឯកឧត្តមអភិបាលខេត្ត បានជំរុញបែបនេះ នៅសាលប្រជុំសាលាស្រុកវាលវែង ក្នុងឱកាសដឹកនាំកិច្ចប្រជុំត្រួតពិនិត្យវឌ្ឍនភាព នៃការសាងសង់ផ្លូវ ឆ្ពោះទៅចំណុចអូរ១ អូរ២ ក្នុងឃុំប្រម៉ោយ ស្រុកវាលវែង ដោយបានការចូលរួមពី ក្រុមការងារក្រសួងសេដ្ឋកិច្ច និងហិរញ្ញវត្ថុ លោកនាយករងរដ្ឋបាលសាលាខេត្ត ថ្នាក់ដឹកនាំមន្ទីរអង្គភាពពាក់ព័ន្ធ អាជ្ញាធរ និងមន្ត្រីមូលដ្ឋាន មួយចំនួនទៀត។
ថ្លែងក្នុងឱកាសនោះ ឯកឧត្តម អភិបាលខេត្តពោធិ៍សាត់ បានជម្រាបជូនថា បច្ចុប្បន្ននេះក្រុមការងារអន្តរក្រសួង បាននឹងកំពុងរៀបចំ តំបន់ផ្លូវអន្ទង់អាំង ភ្នំ១៥០០ ឱ្យទៅជាបៃតង និងជាតំបន់អភិរក្សធនធានធម្មជាតិគ្មាន២ នៅក្នុងប្រទេសកម្ពុជា។
ឯកឧត្តម ខូយ រីដា បានបន្តថា ការសម្រេចអភិរក្សតំបន់អន្ទង់អាំង ភ្នំ១៥០០នេះទៀតសោធ គឺជាសេចក្តីប្រាថ្នាចង់បាន របស់ប្រជាពលរដ្ឋទូទាំងប្រទេស ជាពិសេសភ្ញៀវទេសចរជាតិ អន្តរជាតិ ដែលទទូចចង់ឱ្យរាជរដ្ឋាភិបាល ក៏ដូចជាអាជ្ញាធរ រក្សាទុកតំបន់នេះ ឱ្យក្លាយជាតំបន់អភិរក្សធនធានធម្មជាតិដូចពីមុន ដោយមិនឱ្យមានការសាងសង់សំណង់អនាធិបតេយ្យ ឬកាន់កាប់ខុសច្បាប់នោះឡើយ។
ស្របពេលគ្នានោះ ក្រុមការងារអន្តរក្រសួង ដោយទទួលបានអនុសាសន៍ណែនាំ និងគោលការណ៍ឯកភាព ពីប្រមុខរាជរដ្ឋាភិបាល បានយកចិត្តទុកដាក់គិតគូរ និងរកទីកន្លែងថ្មីស្របច្បាប់ ធ្វើការដោះស្រាយជូនប្រជាពលរដ្ឋ ដែលយល់ព្រមចាកចេញ ចំនួន៧០គ្រួសារ/៩៨គ្រួសារ ផ្ទៃដីត្រូវដោះស្រាយប្រមាណជាង១០០ហិកតា ស្ថិតក្នុងភូមិប្រម៉ោយ ឃុំប្រម៉ោយ ស្រុកវាលវែង «ត្រង់ចំណុចអូរ១ អូរ២» ដែលក្នុងនោះមានហេដ្ឋារចនាសម្ព័ន្ធ ផ្លូវ ទឹក ភ្លើង ដីមានជីវជាតិល្អ និងក្បែរទីប្រជុំជន នៃឃុំប្រម៉ោយផ្ទាល់តែម្តង។
គួរជម្រាបជូនថា ខ្សែផ្លូវកៅស៊ូ រួមតាំងហេដ្ឋារចនាសម្ព័ន្ធមួយចំនួន ដែលត្រូវសាងសង់ធ្វើការដោះស្រាយផលប៉ះពាល់ ជូនប្រជាពលរដ្ឋ នៅតំបន់អន្ទង់អាំង ភ្នំ១៥០០ មានប្រវែងសរុបចំនួន៦គីឡូម៉ែត្រ ដោយមានសំណង់សិល្បការ «ទំនប់បង្ហៀរចំនួន២កន្លែង និងលូកាត់ផ្លូវចំនួន៧កន្លែង» តភ្ជាប់ពីផ្លូវជាតិលេខ១០ មានទទឹងផ្លូវ៣០ម៉ែត្រ ក្រាលកៅស៊ូទ្រូងផ្លូវ ទំហំ១០ម៉ែត្រ បច្ចុប្បន្នសម្រេចស្ថាបនាបានជាង៤០%ហើយ ៕
