រដ្ឋបាលខេត្តបាត់ដំបង រៀបចំពិធីបួងសួងនៅមុខរូបសំណាកលោកតាដំបងគ្រញូងសុំសេចក្តីសុខ ក្នុងពិធីបុណ្យអុំទូក បណ្តែតប្រទីប ឆ្នាំ២០២៤
ភ្នំពេញ៖ នៅថ្ងៃទី១៥ ខែតុលា ឆ្នាំ២០២៤ ឯកឧត្តម អ៊ុយ រី ប្រធានក្រុមប្រឹក្សាខេត្ត ឯកឧត្តម សុខ លូ អភិបាល នៃគណៈអភិបាលខេត្តបាត់ដំបង ព្រមទាំងមន្រ្តីរាជការក្នុងខេត្ត បានធ្វើពិធីក្រុងពាលីបួងសួងនៅមុខរូបសំណាកលោកតាដំបងគ្រញូង សុំសេចក្តីសុខក្នុងឱកាសពេលបុណ្យអុំទូក បណ្តែតប្រទីប ក្នុងថ្ងៃចេញព្រះវស្សា ដែលមានរយៈពេល២ថ្ងៃ គឺទី១៦-១៧ ខែតុលា ឆ្នាំ២០២៤។
ក្នុងឱកាសនោះដែរ ឯកឧត្តម សុខ លូ បានមានប្រសាសន៍សំណេះសំណាលកីឡាករអុំទូកទាំងអស់ថា ឈ្នះចាញ់ជារឿងមួយ តែរឿងសំខាន់នោះគឺការគោរពវិន័យកិត្តិយស សេចក្តីថ្លៃថ្នូរកិត្តិយស និងបានសប្បាយរីករាយទាំងអស់គ្នា។
ឯកឧត្តមបានបន្តថា កម្មវិធីអុំទូកប្រពៃណីថ្នាក់ខេត្តនេះ បានចាប់ផ្តើមដំបូងធ្វើឡើងតាំងពីឆ្នាំ២០០០មកម្លេះ ឆ្នាំនេះគឺជាលើកទី២៥ ហើយទើបតែខកខាន២ឆ្នាំ ជំនាន់កូវីដ-១៩ ឆ្នាំ២០១៩-២០២០ កន្លងមកប៉ុណ្ណោះ តែឆ្នាំនេះយើងចាប់ផ្តើមអុំទូកតាមប្រពៃណីខេត្តជាបន្តទៀត ក្នុងថ្ងៃបុណ្យចេញព្រះវស្សារៀងរាល់ឆ្នាំ។
ក្នុងឱកាសនោះ ឯកឧត្តមក៏បានជូនអំណោយជាស្បៀងអាហារ មានអង្ករ មី ត្រីខ ទឹកត្រី ទឹកស៊ីអ៊ីវ ទឹកសុទ្ធ សម្រាប់ហូបនៅពេលហ្វឹកហាត់ និងនៅពេលបុណ្យអុំទូកផងដែរ។
សូមបញ្ជាក់ថា ប្រភេទទូកដែលត្រូវប្រណាំងរយៈពេល២ថ្ងៃនេះ មានទូក៥ប្រភេទ សរុបទូកចំនួន៤២ទូក កីឡាករសរុប១,៤៩០នាក់ (ស្រី៦០នាក់) ក្នុងនោះកីឡាករពេញសិទ្ធចំនួន១,០៩៣នាក់ (ស្រី៤៤នាក់) កីឡាករបំរ៉ុងចំនួន៣៩៧នាក់ (ស្រី១៦នាក់)៕
