រុស្សីអាចបង្វឹកនាវិកឥណ្ឌាសម្រាប់ការធ្វើនាវាចរណ៍នៅតំបន់អាក់ទិក
បរទេស៖ រុស្ស៊ីអាចចាប់ផ្តើមការបណ្តុះបណ្តាលនាវិកឥណ្ឌាក្នុងពេលឆាប់ៗនេះសម្រាប់ការធ្វើនាវាចរនៅតំបន់ប៉ូល នេះបើយោងតាមសេចក្តីថ្លែងការណ៍ពីក្រុមហ៊ុនថាមពលបរមាណូរដ្ឋរុស្ស៊ី Rosatom។ ផែនការនេះត្រូវបានពិភាក្សានៅក្នុងកិច្ចប្រជុំលើកដំបូងនៃក្រុមការងាររួមឥណ្ឌូ-រុស្ស៊ីស្តីពីកិច្ចសហប្រតិបត្តិការតាមបណ្តោយផ្លូវសមុទ្រខាងជើង (NSR) ដែលធ្វើឡើងនៅទីក្រុងញូវដែលីកាលពីសប្តាហ៍មុន។
NSR គឺជាច្រករបៀងដឹកជញ្ជូននៅក្នុងតំបន់សេដ្ឋកិច្ចផ្តាច់មុខរបស់ប្រទេសរុស្ស៊ី ដែលឆ្លងកាត់តាមឆ្នេរសមុទ្រភាគខាងជើងរបស់ប្រទេសតាមរយៈមហាសមុទ្រអាកទិក ដែលលាតសន្ធឹងប្រវែងទាំងមូលនៃតំបន់អាក់ទិក និងចុងបូព៌ារបស់ប្រទេស។ NSR ត្រូវបានគេចាត់ទុកថាជាផ្លូវដឹកជញ្ជូនខ្លីបំផុតរវាងផ្នែកខាងលិចនៃអឺរ៉ាស៊ី និងតំបន់អាស៊ីប៉ាស៊ីហ្វិក ហើយប្រទេសរុស្ស៊ីបានអភិវឌ្ឍវាយ៉ាងទូលំទូលាយដោយការធ្វើទំនើបកម្មហេដ្ឋារចនាសម្ព័ន្ធក្នុងរយៈពេលប្រាំបួនឆ្នាំកន្លងមកនេះ។
ប្រទេសឥណ្ឌាបានខ្នះខ្នែងក្នុងការរួមបញ្ចូល NSR នៅក្នុងការដឹកជញ្ជូនតាមសមុទ្ររបស់ខ្លួន ដោយប្រាថ្នាចង់បង្កើនវត្តមានរបស់ខ្លួននៅក្នុងតំបន់ភាគខាងជើងឆ្ងាយ ហើយបាននិងកំពុងវិនិយោគយ៉ាងសកម្មក្នុងការអភិវឌ្ឍន៍ផ្លូវនេះ។
យោងតាមក្រុមហ៊ុន Rosatom ដែលប្រតិបត្តិការ NSR កិច្ចប្រជុំក្រុមការងារបានពិភាក្សាអំពីគោលដៅនៃការដឹកជញ្ជូនទំនិញឥណ្ឌា-រុស្ស៊ីតាមបណ្តោយផ្លូវ ក៏ដូចជាគម្រោងរួមគ្នានៅក្នុងការសាងសង់កប៉ាល់នៅតំបន់អាក់ទិក។ ក្រុមការងារក៏បានព្រាងអនុស្សរណៈយោគយល់គ្នារវាងរដ្ឋាភិបាលរុស្ស៊ី និងឥណ្ឌាសម្រាប់ការអភិវឌ្ឍន៍កិច្ចសហប្រតិបត្តិការក្នុងការដឹកជញ្ជូនទំនិញនៅក្នុងដែនទឹក NSR។
ក្រុមហ៊ុនថាមពលរុស្ស៊ីបានឲ្យដឹងថា ភាគីទាំងពីរក៏បានពិភាក្សាអំពីការហ្វឹកហ្វឺននាវិកឥណ្ឌាដែលអាចធ្វើទៅបានសម្រាប់ការធ្វើនាវាចរនៅតំបន់ប៉ូល ប៉ុន្តែមិនបានផ្តល់ព័ត៌មានលម្អិតបន្ថែមនោះទេ។ ទោះជាយ៉ាងណាក៏ដោយ របាយការណ៍មុននេះដែលដកស្រង់សម្តីរដ្ឋមន្ត្រីកំពង់ផែ ដឹកជញ្ជូន និងផ្លូវទឹករបស់ឥណ្ឌា Sarbananda Sonowal បានបង្ហាញថា នាវិកអាចត្រូវបានបណ្តុះបណ្តាលនៅសាកលវិទ្យាល័យ Nevelskoy Maritime State (MSUN) ក្នុងទីក្រុង Vladivostok ដែលត្រូវបានបំពាក់ដោយឧបករណ៍សម្រាប់ក្លែងធ្វើនាវាចរណ៍នៅក្នុងដែនទឹកអាកទិក។
របាយការណ៍ប្រព័ន្ធផ្សព្វផ្សាយក៏បានអះអាងផងដែរថា Rosatom បានពិភាក្សាអំពីការបញ្ជាទិញនាវាបំបែកទឹកកកដែលមិនមាននុយក្លេអ៊ែរចំនួន៤ ពីប្រទេសឥណ្ឌា។ គណៈប្រតិភូរុស្ស៊ី តាមសេចក្តីរាយការណ៍បានទៅទស្សនាកន្លែងផលិតកប៉ាល់ឥណ្ឌាមួយចំនួន ដើម្បីវាយតម្លៃសមត្ថភាព និងហេដ្ឋារចនាសម្ព័ន្ធរបស់ពួកគេ ហើយបច្ចុប្បន្នកំពុងស្ថិតក្នុងការពិភាក្សាលើការបញ្ជាទិញសក្តានុពល។
ទីក្រុងមូស្គូ និងញូវដែលីបានព្រមព្រៀងគ្នាបង្កើតក្រុមការងារស្តីពីកិច្ចសហប្រតិបត្តិការ NSR នៅខែកក្កដាឆ្នាំនេះ ដែលដឹកនាំដោយអនុរដ្ឋមន្ត្រីក្រសួងកំពង់ផែ ដឹកជញ្ជូន និងផ្លូវទឹករបស់ឥណ្ឌា Rajesh Kumar Sinha និងលោក Vladimir Panov អ្នកតំណាងពិសេសរបស់ Rosatom សម្រាប់ការអភិវឌ្ឍន៍តំបន់អាក់ទិក។
ផ្តល់យោបល់លើកិច្ចប្រជុំក្រុមការងារទៅកាន់ Interfax កាលពីថ្ងៃសុក្រ លោក Panov បានសរសើរកិច្ចសហប្រតិបត្តិការឥណ្ឌូ-រុស្ស៊ីលើ NSR ដោយកត់សម្គាល់ថាវាត្រូវបានផ្លាស់ប្តូរយ៉ាងឆាប់រហ័សពីទំនាក់ទំនងថ្នាក់កំពូលទៅលំហូរការងារជាក់ស្តែង។ លោកបានបន្ថែមថា វាទំនងជាការងារបឋមលើគម្រោងរួមមួយចំនួននឹងត្រូវបញ្ចប់នៅចុងឆ្នាំនេះ ហើយថាភាគីទាំងពីរនឹងអាចបន្តទៅលើសេចក្ដីលម្អិត។
