ឯកឧត្តម អ៊ុយ រី និងឯកឧត្តម សុខ លូ អញ្ជើញជាអធិបតីក្នុងពិធីបើកការប្រណាំងទូក នៅតាមបណ្ដោយដងស្ទឹងសង្កែ ក្រុងបាត់ដំបង
ភ្នំពេញ៖ នៅរសៀលថ្ងៃទី១៦ ខែតុលា ឆ្នាំ២០២៤ ឯកឧត្តម អ៊ុយ រី ប្រធានក្រុមប្រឹក្សាខេត្ត និងឯកឧត្តម សុខ លូ អភិបាលនៃគណៈអភិបាលខេត្តបាត់ដំបង បានអញ្ជើញជាអធិបតីក្នុងពិធីបើកការប្រណាំងទូក និងបណ្ដែតប្រទីបដែលធ្វើឡើងរយៈពេល២ថ្ងៃចាប់ពីថ្ងៃទី១៦-១៧ ខែតុលា ឆ្នាំ២០២៤ នៅតាមបណ្ដោយដងស្ទឹងសង្កែ ក្រុងបាត់ដំបង ដើម្បីបង្កបរិយាកាសជូនប្រជាពលរដ្ឋព្រមទាំងភ្ញៀវទេសចរជាតិ និងអន្តរជាតិបានកម្សាន្តសប្បាយរីករាយ និងចូលរួមថែរក្សានូវប្រពៃណីជាតិដែលជាប់ទាក់ទងទៅនឹងប្រវត្តិសមយុទ្ធនៃកម្លាំងសាមគ្គីកងទ័ពជើងទឹករបស់បុព្វបុរសខ្មែរពីអតីតកាល។
ក្នុងឱកាសដ៏ថ្លៃថ្លានេះក្នុងនាមក្រុមប្រឹក្សាខេត្ត និងគណៈអភិបាលខេត្តបាត់ដំបង ឯកឧត្តម សុខ លូ សម្ដែងនូវការគោរពដឹងគុណដ៏ស្មោះអស់ពីដួងចិត្តដល់បុព្វបុរសខ្មែរដែលបានរក្សា និងការពារ បាននូវបូរណភាពទឹកដីនៃព្រះរាជាណាចក្រកម្ពុជា។
ទន្ទឹមនោះ ឯកឧត្តម សម្ដែងនូវអំណរគុណដ៏ជ្រាលជ្រៅ ចំពោះវត្តមានឯកឧត្តម លោកជំទាវ លោកឧកញ៉ា លោក លោកស្រី ភ្ញៀវកិត្តិយសជាតិ អន្តរជាតិ បងប្អូនប្រជាពលរដ្ឋជិតឆ្ងាយ និងគណៈប្រតិភូដឹកនាំទូក ក្រុមកីឡាករទូកទាំងអស់ដែលបានអញ្ជើញមកចូលរួមក្នុងពិធីប្រណាំងទូកក្នុងថ្ងៃចេញព្រះវស្សានេះ ដែលបានញ៉ាំងឱ្យពិធីបុណ្យអុំទូកនៅខេត្តបាត់ដំបងកាន់តែមានភាពអធិកអធមក្រៃលែង។
ឯកឧត្តម សុខ លូ គូសបញ្ជាក់ថា វត្តមានរបស់លោក លោកស្រី ភ្ញៀវកិត្តិយស និងបងប្អូនប្រជាពលរដ្ឋយ៉ាងច្រើនកុះករនាពេលនេះ ពិតជាបានបង្ហាញឱ្យឃើញពីទឹកចិត្តស្រឡាញ់ និងការចូលរួមគាំទ្រដល់វិស័យកីឡា ជាពិសេសនោះគឺបានលើកស្ទួយវប្បធម៌ កេរដំណែលប្រពៃណីរបស់បុព្វបុរសខ្មែរ ព្រមទាំងឆ្លុះបញ្ចាំងពីស្មារតីសាមគ្គីភាព មិត្តភាព ភាតរភាព និងបង្កការសប្បាយរីករាយជូនប្រជាពលរដ្ឋដែលបានសម្រាក ពីការនឿយហត់ក្នុងការងារបង្កបង្កើនផល និងកិច្ចការងារផ្សេងៗ។
ឯកឧត្តម សុខ លូ ថ្លែងបន្ថែមថា ជាទូទៅពិធីប្រណាំងទូកនៅខេត្តបាត់ដំបង តែងតែរៀបចំត្រូវនឹងថ្ងៃចេញព្រះវស្សា គឺថ្ងៃ១៤-១៥កើត ខែអស្សុជ ដើម្បីផ្សារភ្ជាប់ទៅតាមទំនៀមទម្លាប់ប្រពៃណី និងវប្បធម៌របស់ប្រជាពលរដ្ឋក្នុងខេត្តបាត់ដំបង។ នៅក្នុងព្រឹត្តិការណ៍បុណ្យអុំទូក បណ្ដែតប្រទីបខេត្តបាត់ដំបងឆ្នាំនេះ គណៈកម្មការខេត្តបានរៀបចំឱ្យមានកម្មវិធីមួយចំនួនរួមមាន ៖ការប្រណាំងទូក បណ្ដែតប្រទីប បង្ហោះគោម បាញ់កាំជ្រួច ការតាំងពិព័រណ៍ផលិតផល និងការប្រគុំតន្ត្រី ដើម្បីទាក់ទាញភ្ញៀវទេសចរជាតិ អន្តរជាតិ និងប្រជាពលរដ្ឋគ្រប់មជ្ឈដ្ឋាន មកទស្សនាកម្សាន្ត រួមទាំងទស្សនានូវសមិទ្ធផលនានានៅក្នុងក្រុងបាត់ដំបង ខេត្តបាត់ដំបង ដែលកំពុងមានការអភិវឌ្ឍរីកចម្រើនគួរឱ្យកត់សម្គាល់។
ឯកឧត្តមអភិបាលខេត្ត សង្កត់ធ្ងន់ថា ស្របពេលបច្ចុប្បន្នក្នុងខេត្តបាត់ដំបង សម្រេចបាននូវសមិទ្ធផលជាច្រើនលើគ្រប់វិស័យ រួមមានដូចជាទីធ្លាសម្រាប់ដើរហាត់ប្រាណ សួនសម្តេចក្រឡាហោម វិមានឯករាជ្យ សួនធ្នង់៥៣ វិមានឯករាជ្យ និងបានរៀបចំសោភ័ណភាពច្រាំងស្ទឹងសង្កែ ការលើកកម្ពស់សោភ័ណភាពទីក្រុង ការស្តារប្រព័ន្ធលូដែលជាគម្រោងរបស់ADB ការក្រាលកៅស៊ូផ្លូវក្នុងក្រុង ការរៀបចំសួនច្បារ បង្គោលភ្លើងចរាចរណ៍ ការរៀបចំភ្លើងបំភ្លឺសាធារណៈតាមដងផ្លូវ និងតាមសួនសាធារណៈត្រើយខាងលិចស្ទឹងសង្កែ បន្ទប់ទឹកអនាម័យ និងសួនច្បារជាច្រើនកន្លែង ព្រមទាំងការកែលម្អ និងពង្រីកបណ្តាញអគ្គិសនី ទឹកស្អាតជាដើម។ តាមរយៈការអភិវឌ្ឍនេះ បានបង្កបរិយាកាសដល់ការវិនិយោគកាន់តែប្រសើរឡើង ព្រមទាំងបានចូលរួមចលនាប្រឡងប្រណាំងទីក្រុងស្អាត ដែលខេត្តបាត់ដំបងបានទទួលពានរង្វាន់និងជ័យលាភីជាបន្តបន្ទាប់ព្រមទាំងបានបង្កលក្ខណៈជូនបងប្អូនប្រជាពលរដ្ឋទាំងអស់បានសប្បាយរីករាយក្រោមដំបូលសន្តិភាព។
ឯកឧត្តម សុខ លូ គូសបញ្ជាក់ថា កត្តាដែលធ្វើឱ្យខេត្តបាត់ដំបងមានការរីកចម្រើនជាបន្តបន្ទាប់ និងមានឱកាសរៀបចំពិធីបុណ្យផ្សេងៗគឺអាស្រ័យដោយប្រទេសមានសុខសន្តិភាពពេញលេញ ក្រោមការដឹកនាំដ៏ឈ្លាសវៃគតិបណ្ឌិតរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បាននាំមកនូវសុខសុវត្ថិភាព សន្តិភាព ស្ថិរភាពនយោបាយល្អ និងផ្ដល់ឱកាសដល់ការអភិវឌ្ឍ ព្រមទាំងការវិនិយោគប្រកបដោយបរិយាប័ន្ន។
សូមបញ្ជាក់ថា ក្នុងពិធីបុណ្យអុំទូកខេត្តបាត់ដំបងឆ្នាំ២០២៤នេះ មានទូកចូលរួមប្រណាំងសរុបចំនួន៤២ទូក និងកីឡាករ កីឡាការិនីសរុប១ ៤៩០នាក់៕
