មន្ត្រីជាន់ខ្ពស់ក្រសួងអប់រំកម្ពុជា ចូលរួមពិធីបើកកម្មវិធី សប្តាហ៍ពិភពលោកនៃហ្វ្រង់កូហ្វូនី វិទ្យាសាស្ត្រលើកទី៤
ភ្នំពេញ៖ ឯកឧត្តមបណ្ឌិត អ៊ុម រម្យណី រដ្ឋលេខាធិការ ជាតំណាងដ៏ខ្ពង់ខ្ពស់របស់ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី បានដឹកនាំគណៈប្រតិភូក្រសួងអប់រំ យុវជន និងកីឡា ចូលរួម “ពិធីបើកសប្តាហ៍ពិភពលោកនៃហ្វ្រង់កូហ្វូនីវិទ្យាសាស្ត្រលើកទី៤” (4ème édition de la Semaine Mondiale de la Francophonie Scientifique) ដែលប្រព្រឹត្តទៅនាថ្ងៃទី១៦ ខែតុលា ឆ្នាំ២០២៤ នៅទីក្រុង Toulouse ប្រទេសបារាំង។
កម្មវិធីនេះប្រព្រឹត្តិទៅក្រោមការសហការរៀបចំនេះរវាង ទីភ្នាក់ងារឧត្ដមសិក្សាប្រើប្រាស់ភាសាបារាំង (AUF) និងរដ្ឋាភិបាលនៃសាធារណៈរដ្ឋបារាំង ដោយមានការចូលរួមពីសំណាក់លោក Thani Mohamed SOILIHI រដ្ឋលេខាធិការនៃក្រសួងអឺរ៉ុប និងការបរទេសបារាំង លោក Pierre-André DURAND អភិបាលតំបន់ Haute Garonne លោក Sorin Mihai Cimpeanu ប្រធានទីភ្នាក់ងារឧត្ដមសិក្សាប្រើប្រាស់ភាសាបារាំង (Président de l’AUF) លោក Slim KHALBOUS សាកលវិទ្យាធិការនៃទីភ្នាក់ងារឧត្ដមសិក្សាប្រើប្រាស់ភាសាបារាំង (Recteur de l’AUF) រដ្ឋមន្ត្រីទទួលបន្ទុកវិស័យអប់រំ និងការស្រាវជ្រាវនៃប្រទេសនិយាយភាសាបារាំង ប្រតិភូអម និងភ្ញៀវកិត្តិយមួយចំនួនផងដែរ។
ថ្លែងនៅក្នុងពិធីបើកជាផ្លូវការនៃសប្តាហ៍ពិភពលោកនៃហ្វ្រង់កូហ្វូនីវិទ្យាសាស្ត្រលើកទី៤ នេះ ឯកឧត្តមបណ្ឌិត រដ្ឋលេខាធិការ បានរំលេចឡើងនូវកិច្ចខិតខំប្រឹងប្រែងរបស់ក្រសួងអប់រំ យុវជន និងកីឡាក្នុងការលើកកម្ពស់សមត្ថភាពធនធានមនុស្សរបស់កម្ពុជា ដើម្បីទទួលបានជំនាញសតវត្សទី២១ ជាពិសេសសមត្ថភាពបច្ចេកវិទ្យាព័ត៌មាន និងទូរគមនាគមន៍។ ការរីកចម្រើនយ៉ាងឆាប់រហ័សនៃប្រព័ន្ធបច្ចេកវិទ្យាព័ត៌មាន ក៏បានជួយជំរុញដល់ការធ្វើកំណែទម្រង់ និងទំនើបកម្មក្នុងវិស័យអប់រំផងដែរ ជាពិសេសការផ្ដល់ឱ្យសិស្ស-និស្សិតនូវការអប់រំប្រកបដោយគុណភាព។
ជាមួយគ្នានេះដែរ ឯកឧត្តមបណ្ឌិត រដ្ឋលេខាធិការ ក៏បានលើកឡើងបន្ថែមអំពីការលើកកម្ពស់ការសិក្សាភាសាបារាំងនៅក្នុងកម្មវិធីសិក្សាមធ្យមសិក្សា និងការបន្តជំរុញសិស្ស-និស្សិតជ្រើសរើសជំនាញដែលប្រើប្រាស់ភាសាបារាំងនៅកម្រិតឧត្តមសិក្សា។ ឈរលើមូលដ្ឋាននេះ ក្រសួងអប់រំ យុវជន និងកីឡា បន្តខិតខំប្រឹងប្រែងលើកកម្ពស់ (១) ការបង្ហាញឱ្យឃើញពីអត្ថប្រយោជន៍ក្នុងការចេះច្រើនភាសា ជាពិសេសឱកាសក្នុងការទទួលបានការងារល្អ ការយល់ដឹងស៊ីជម្រៅពីវប្បធម៌ និងការស្រាវជ្រាវវិទ្យាសាស្ត្រ (២) ការជំរុញឱ្យសិស្ស-និស្សិត និងអ្នកជំនាញ ឱ្យពង្រឹងចំណេះដឹងភាសាបារាំងដែលជាសមត្ថភាពមួយបន្ថែមទៀត (៣) ការដាក់បញ្ចូលភាសាបារាំងក្នុងកម្មវិធីសិក្សា STEM (៤) ការជំរុញការប្រើប្រាស់ភាសាបារាំងក្នុងវិស័យវិទ្យាសាស្ត្រ និងបច្ចេកទេស និង (៥) ការលើកកម្ពស់កម្មវិធីសិក្សាផ្នែកវិទ្យាសាស្ត្រដែលបង្រៀនជាភាសាបារាំង ដោយជំរុញបន្ថែមលើការអភិវឌ្ឍន៍កម្មវិធីសិក្សា និងគំនិតផ្ដួចផ្ដើមស្រាវជ្រាវវិទ្យាសាស្ត្រជាភាសាបារាំងនៅក្នុងគ្រឹះស្ថានឧត្តមសិក្សា និងវិទ្យាស្ថានស្រាវជ្រាវនៅកម្ពុជា។ បន្ថែមពីនេះ ក្រសួងក៏នៅតែបន្តយកចិត្តទុកដាក់យ៉ាងខ្លាំងលើការអប់រំវិទ្យាសាស្ត្រ និងបច្ចេកវិទ្យានៅកម្រិតឧត្តមសិក្សា ដោយជំរុញការអនុវត្តសកម្មភាពសំខាន់ៗ បន្ថែមជាច្រើនទៀត។
