សម្តេចធិបតី សម្រេចផ្តល់ដំណើរកម្សាន្តជូនចាស់ជរា នៅអង្គការមូលនិធិកុមារ និងអង្គការដើម្បីភាពញញឹមនៃកុមារ ទៅកាន់ភ្នំគូលែន
ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានសម្រេចផ្តល់ដំណើរកម្សាន្តជូនជនចាស់ជរា នៅអង្គការមូលនិធិកុមារ (CCF) និងអង្គការដើម្បីភាពញញឹមនៃកុមារ (PSE) ទៅកាន់ភ្នំគូលែន តាមសំណើ ។
ក្នុងឱកាសដែលសម្តេច និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត បានអញ្ជើញ «សំណេះសំណាលជាមួយលោកតា លោកយាយ និងសិស្សានុសិស្សនៃអង្គការមូលនិធិកុមារ (CCF) និងអង្គការដើម្បីភាពញញឹមនៃកុមារ (PSE)» នាថ្ងៃទី១៧ ខែតុលា ឆ្នាំ២០២៤នេះ សម្តេចមហាបវរធិបតី ហ៊ុន ម៉ាណែត បានប្រកាសថា «ជូនតាមសំណូមពរ ឥឡូវដោយសារតែខែនេះភ្លៀង ខ្ញុំថាចាំក្រោយបុណ្យអុំទូក មេឃរាំងភ្លៀងទើបល្អ ប្រហែលចុងខែ១១ អីចឹងចាំរៀបចំទៅលោកយាយ អត់អីទេលោកយាយ»។
សម្តេចធិបតី ហ៊ុន ម៉ាណែត បានថ្លែងថា សម្រាប់ការរៀបចំដំណើរកម្សាន្តដល់លោកយាយ ទៅភ្នំគូលែននេះ គឺនឹងរៀបចំរថយន្តជូនលោកយាយ ដល់លើភ្នំគូលែន តែម្តង ដើម្បីជួយសម្រាលការលំបាកលោកយាយ ឱ្យបានលេងកម្សាន្តសប្បាយនៅលើភ្នំនេះតែម្តង នៅក្រោយពិធីបុណ្យអុំទូក ៕
