គណៈកម្មការសុខាភិបាលនៃរដ្ឋសភា លើកទឹកចិត្តឱ្យថ្នាក់ដឹកនាំមណ្ឌលសុខភាព កំភុន យកចិត្តទុកដាក់លើជំងឺមិនឆ្លង
ភ្នំពេញ៖ ដោយមានការអនុញ្ញាតពី សម្តេចប្រធានរដ្ឋសភាធិការធិបតី ឃួន សុដារី ប្រធានរដ្ឋសភា គណៈប្រតិភូគណៈកម្មការសុខាភិបាល សង្គមកិច្ច អតីតយុទ្ធជន យុវនីតិសម្បទា ការងារបណ្តុះបណ្តាលវិជ្ជាជីវៈ និងកិច្ចការនារី នៃរដ្ឋសភា (គណៈកម្មការទី៨) ដឹកនាំដោយឯកឧត្តមបណ្ឌិត ឈុន សុីរុន លេខាធិការ តំណាងឱ្យគណៈកម្មការ បានជំរុញឱ្យមណ្ឌលសុខភាព កំភុន យកចិត្តទុកដាក់លើបញ្ហាជំងឺមិនឆ្លង (NCDs) ស្ថិតនៅក្នុងភូមិបានម៉ៃ ឃុំកំភុន ស្រុកសេសាន ខេត្តស្ទឹងត្រែង នាព្រឹកថ្ងៃទី១៧ ខែតុលា ឆ្នាំ២០២៤។
យោងតាមប្រសាសន៍ លោក សែន ស៊ូធ្នូ ប្រធានមណ្ឌលសុខភាព បានឱ្យដឹងថា មណ្ឌលសុខភាពនេះមានបុគ្គលិក១៥នាក់ បម្រើសេវាសុខភាពជូនប្រជាពលរដ្ឋចំនួន ១១,២៩២នាក់ មកពី១២ភូមិ ក្នុង៤ឃុំនៅក្បែរៗនោះផងដែរ។ ប្រជាពលរដ្ឋភាគច្រើនមកទទួលសេវាពិនិត្យសុខភាពមានដូចជាពិគ្រោះជំងឺក្រៅ ពន្យារកំណើត ពិនិត្យផ្ទៃពោះ សម្រាលកូន ពិនិត្យឈាមរកជាតិស្ករ លាងរបួស ចាក់វ៉ាក់សាំងជូនកុមារ និងសេវាជាច្រើនផ្សេងទៀត។ ចំពោះសេវាព្យាបាលបឋមនៃជំងឺមិនឆ្លងមានភាគច្រើនជាជំងឺទឹកនោមផ្អែម ជំងឺលើសសម្ពាធឈាម និងជំងឺផ្លូវចិត្ត ដែលជំងឺនេះកើតឡើងដោយសារប្រជាពលរដ្ឋទទួលទានរបបអាហារមិនប្រុងប្រយ័ត្ន ពិសេសទទួលទានគ្រឿងស្រវឹង និងភេសជ្ជៈផ្អែមលើសកំណត់ តាមតួលេខជាក់ស្តែងនៅពេលថ្មីៗនេះក្នុងឆ្នាំ២០២៤ មណ្ឌលសុខភាពបានរកឃើញមានករណីជំងឺទឹកនោមផ្អែមមានចំនួន៤១នាក់ ករណីជំងឺលើសសម្ពាធឈាមមានចំនួន ១២នាក់ និងករណីអ្នកជំងឺផ្លូវចិត្តមានចំនួន០៥នាក់ ដែលបានមកទទួលសេវាពិនិត្យជំងឺនៅមណ្ឌលសុខភាពនេះ។
លោក សែន ស៊ូធ្នូ បានបន្តទៀតថា ប្រជាពលរដ្ឋមកទទួលសេវានៅមណ្ឌលសុខភាព បានប្រើប្រាស់ប័ណ្ណ ប.ស.ស (ភាគច្រើនជាមន្ត្រីរាជការ) ប៉ុន្តែនៅមានចំនួនតិចតួច ដោយឡែកប័ណ្ណសមធម៌ និងការបង់ថ្លៃសេវាដោយថវិកាផ្ទាល់ខ្លួនមានចំនួនច្រើន ចំពោះការលើកលែងបង់ថ្លៃសេវាមានចំនួនតិចតួចបំផុត។
ទទ្ទឹមនឹងនោះ មណ្ឌលសុខភាពបានជួបបញ្ហាប្រឈមមួយចំនួនដូចជា ការសម្រាលកូនតាមភូមិឆ្ងាយពីមណ្ឌលសុខភាព ត្រូវពង្រឹងសមត្ថភាពបុគ្គលិកពេទ្យបន្ថែមទៀត ខ្វះបរិក្ខារពេទ្យ និងខ្វះឱសថសំរាប់ព្យាបាលជំងឺមិនឆ្លង ស្នើសុំអគារមណ្ឌលសុខភាពថ្មីមួយ ដោយសារខ្វះបន្ទប់ និងស្នើសុំតំឡើងថវិកាយាមពេលយប់។
ជាការឆ្លើយតប ឯកឧត្តមបណ្ឌិត ឈុន សុីរុន បានមានប្រសាសន៍ថ្លែងអំណរគុណ និងកោតសរសើរដល់បុគ្គលិកពេទ្យដែលខិតខំបម្រើសេវាសុខភាពជូនប្រជាពលរដ្ឋឱ្យទាន់ពេលវេលា និងយកចិត្តទុកដាក់ជួយផ្សព្វផ្សាយបន្ថែមទៀតពីផលប៉ះពាល់នៃជំងឺមិនឆ្លង ជូនប្រជាពលរដ្ឋឱ្យបានយល់ដឹងកាន់តែច្បាស់ ដោយធ្វើការចាក់ផ្សាយវីដេអូអប់រំខ្លីៗ ឱ្យប្រជាពលរដ្ឋបានទស្សនានៅពេលមកព្យាបាល និងតាមរយៈគណៈទ្រទ្រង់សុខភាពភូមិ នៅមុនពេលបើកវេទិកាសាធារណ: ភូមិ ឃុំមានសុវត្ថិភាព ព្រមទាំងមានការលើកទឹកចិត្តដល់គណៈទ្រទ្រង់សុខភាពភូមិ និងក្រុមគ្រួសាររបស់គាត់ឱ្យមកទទួលសេវាសុខភាពមិនយកកម្រៃ និងត្រូវផ្សព្វផ្សាយដាក់ប៉ាណូអប់រំដោយទទួលទានអាហារដែលមានជាតិខ្លាញ់តិច អំបិលតិច និងស្ករតិច តាមមណ្ឌលសុខភាព មន្ទីរពេទ្យបង្អែក និងតាមទីប្រជុំជន ដើម្បីឱ្យយល់ដឹងពីជំងឺមិនឆ្លង និងផលប៉ះពាល់នៃជំងឺនេះ៕