គណៈប្រតិភូអតីតកងទ័ពស្ម័គ្រចិត្ត នៃសមាគមមិត្តភាពរណសិរ្សភូមិភាគនិរតីកម្ពុជា អញ្ជើញបំពេញទស្សនកិច្ច នៅយោធភូមិភាគទី៤
ភ្នំពេញ៖ នៅថ្ងៃទី១៧ ខែតុលាឆ្នាំ២០២៤ ឯកឧត្តម ឧត្តមសេនីយ៍ឯក ពៅ ហេង មេបញ្ជាការរងកងទ័ពជើងគោក មេបញ្ជាការយោធភូមិភាគទី៤ ទទួលបដិសណ្ឋារកិច្ចគណៈប្រតិភូអតីតកងទ័ពស្ម័គ្រចិត្ត នៃសមាគមមិត្តភាពរណសិរ្សភូមិភាគនិរតីកម្ពុជា អញ្ជើញបំពេញទស្សនកិច្ច និងសម្តែងការគួរសម នៅបញ្ជាការដ្ឋានយោធភូមិភាគទី៤។
គណៈប្រតិភូអតីតកងទ័ពស្ម័គ្រចិត្ត នៃសមាគមមិត្តភាពរណសិរ្សភូមិភាគនិរតីកម្ពុជា ដឹកនាំដោយ ឯកឧត្តម ហា មិញថាម អតីតប្រធានស្នងការនយោបាយអង្គភាពទ័ពលេខ៣ និងជាអតីត ប្រធានស្នងការនយោបាយ នៃអគ្គស្នងការបច្ចេកទេស ក្រសួងការពារជាតិវៀតណាម និងប្រតិភូអមដំណើរ។
ឯកឧត្តម មេបញ្ជាការ យោធភូមិភាគទី៤ មានសេចក្តីរំភើបរីករាយ និងសូមសម្តែងនូវកិច្ចស្វាគមន៍ប្រកបដោយមនោសញ្ចេតនា និងកាគោរពរាប់អានយ៉ាងជ្រាលជ្រៅជាទីបំផុត ចំពោះគណៈប្រតិភូអតីតកងទ័ពស្ម័គ្រចិត្ត នៃសមាគមមិត្តភាពរណសិរ្សភូមិភាគនិរតីកម្ពុជា អញ្ជើញបំពេញទស្សនកិច្ច និងសម្តែងការគួរសម និងផ្លាស់ប្តូរបទពិសោធន៍ការងារ ជាមួយថ្នាក់ដឹកនាំយោធភូមិភាគទី៤ នាឱកាសនេះ ស្របពេលដែលប្រទេសកម្ពុជា មានសុខសន្តិភាពពេញលេញ និងមានការអភិវឌ្ឍន៍រីកចម្រើនយ៉ាងឆាប់រហ័ស ក្រោមការដឹកនាំដ៏ឈ្លាសវៃរបស់ សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី បច្ចុប្បន្នជាប្រធានព្រឹទ្ធសភា និងជាប្រធានក្រុមឧត្តមប្រឹក្សាផ្ទាល់ព្រះមហាក្សត្រ និងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ៕