វិទ្យាស្ថានជាតិវិជ្ជាជីវៈបាត់ដំបង ផ្តល់អាហារូបករណ៍ដល់យុវជន ៥០០នាក់ រៀនជំនាញបច្ចេកទេសឥតគិតថ្លៃ
ភ្នំពេញ៖ វិទ្យាស្ថានជាតិវិជ្ជាជីវៈខេត្តបាត់ដំបង បានប្រកាសដល់យុវជនមកពីគ្រួសារក្រីក្រ និងគ្រួសារងាយរងហានិភ័យ ដែលមានបំណងចង់រៀនជំនាញវិជ្ជាជីវៈ ឱ្យប្រញាប់ចុះឈ្មោះចូលរៀន ដោយក្នុងឆ្នាំ២០២៣-២០២៤ វិទ្យាស្ថានជ្រើសរើសសិក្ខាកាមរហូតដល់ ៥០០នាក់ ឱ្យសិក្សាដោយឥតគិតថ្លៃ សម្រាប់កម្រិតសញ្ញាបត្របច្ចេកទេស និងវិជ្ជាជីវៈ១ (C1) ។
វិទ្យាស្ថានជាតិវិជ្ជាជីវៈខេត្តបាត់ដំបង ក៏បានផ្ដល់អាហារូបករណ៍ឥតកំណត់ សម្រាប់រៀនជំនាញបច្ចេកទេសឥតគិតថ្លៃ ដល់យុវជនមកពីគ្រួសារក្រីក្រ និងគ្រួសារងាយរងហានិភ័យ តាមរយៈឯកឧត្ដមទេសរដ្ឋមន្ត្រី សក់ សេដ្ឋា សម្រាប់ចែកជូនយុវជនក្នុងស្រុកបវេលផងដែរ ។
ជំនាញដែលផ្តល់ជូនរួមមាន ៖ ការដំឡើងបណ្តាញអគ្គិសនីក្នុងអគារ, ការថែទាំ និងជួសជុលរថយន្ត, សេវាកម្មរដ្ឋបាល, សេវាកម្មសម្អាងកាយ, ការផ្សារអគ្គិសនី, ការផលិតនំ, ការចិញ្ចឹម និងថែទាំត្រីប្រា, ការកែច្នៃបន្លែ និងផ្លែឈើ, សេវាកម្មបរិក្ខាត្រជាក់ក្នុងគេហដ្ឋាន, ការរចនាក្រាហ្វិកដោយកុំព្យូទ័រ, ការដំឡើងសរសៃដែក, ការដំឡើងដំបូល, ការថែទាំ និងជួសជុលទោចក្រយានយន្ត ។
លក្ខខណ្ឌចូលរៀន ៖ ក. ក្រុមគោលដៅអាទិភាពទី១ ទទួលបានការបណ្តុះបណ្តាល និងប្រាក់ឧបត្ថម្ភប្រចាំខែចំនួន ២៨ម៉ឺនរៀលក្នុងមួយខែ សិក្សាពេញម៉ោង ៖ យុវជនមកពីគ្រួសារក្រីក្រ មានប័ណ្ណក្រ១, ក្រ២, យុវជនមកពីគ្រួសារងាយរងហានិភ័យមាន បណ្ណសំគាល់គ្រួសារងាយរងហានិភ័យ។ ខ. ក្រុមគោលដៅអាទិភាពទី២ ទទួលបានការបណ្តុះបណ្តាល តែមិនទទួលបានប្រាក់ឧបត្ថម្ភប្រចាំខែ ៖ យុវជនមកពីគ្រួសារដែលសមាជិកមាន បណ្ណសំគាល់មានពិការភាព, យុវជនមកពីគ្រួសារដែលមានសមាជិកមាន បណ្ណមូលនិធិសមធម៌សុខាភិបាល, យុវជនដែលឧទ្ទេសនាមដោយ រដ្ឋបាលរាជធានី ខេត្ត ក្រុង ស្រុក ខណ្ឌ។ សម្រាប់សិស្សដែលចូលរៀន នឹងទទួលបានកន្លែងស្នាក់នៅ ទឹក ភ្លើងសម្រាប់ប្រើប្រាស់ដោយឥតគិតថ្លៃផងដែរ ។
ការចែក និងទទួលពាក្យចាប់ពីថ្ងៃជូនដំណឹងនេះតទៅ ហើយកាលបរិច្ឆេទចូលរៀន នៅថ្ងៃទី១ ខែតុលា ឆ្នាំ២០២៤។
សម្រាប់ការចូលរៀនក្នុងមួយវគ្គៗ តម្រូវឲ្យមានការដាក់ពាក្យចូលរៀនគ្រប់ចំនួន ចាបពី១៧នាក់ឡើងទៅ ។ ហើយសម្រាប់ការចូលរៀនធ្វើឡើងជារៀងរាល់ខែ គឺចាប់ពីដើមខែតែម្ដង ។
សូមបញ្ជាក់ថា បន្ទាប់ពីបញ្ចប់ការសិក្សា វិទ្យាស្ថានជាតិវិជ្ជាជីវៈបាត់ដំបង នឹងជួយរកការងារឲ្យធ្វើទៅតាមចំណេះជំនាញ ដើម្បីឲ្យសិស្សនិស្សិត ទទួលបានប្រាក់ខែសមរម្យ អាចផ្គត់ផ្គង់គ្រួសារ និងមានលទ្ធភាពបន្តការសិសក្សាបន្តទៅមុខទៀត ។
សម្រាប់ព័ត៌មានបន្ថែម សូមទំនាក់ទំនងទៅកាន់វិទ្យាស្ថានដែលស្ថិតនៅផ្លូវជាតិលេខ៥៧ ភូមិអណ្តូងព្រីង សង្កាត់អូរម៉ាល់ ក្រុងបាត់ដំបង ខេត្តបាត់ដំបង (ខាងលិចរង្វង់មូលនាងរំសាយសក់ចំងាយ ១៥០០ម៉ែត្រ) ឬទំនាក់ទំនងតាមទូរស័ព្ទលេខ 086 403 104 / 099 759 990 / 071 3683 360 / 070 200 002 / 012 822 495 ៕