ក្រសួងសុខាភិបាល ចុះពង្រឹងការងារផ្ដល់សេវាសុខាភិបាលមូលដ្ឋានកម្រិតមណ្ឌលសុខភាព សំដៅជំរុញបង្កើនការថែទាំសុខភាពបឋម នៅក្នុងខេត្តសៀមរាប

ភ្នំពេញ៖ ចាប់ពីថ្ងៃទី១៥ ដល់ថ្ងៃទី១៧ ខែតុលា ឆ្នាំ២០២៤ ដោយទទួលបានការអនុញ្ញាតដ៏ខ្ពង់ខ្ពស់ពី ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល លោកជំទាវវេជ្ជបណ្ឌិត ឱ វណ្ណឌីន រដ្ឋលេខាធិការក្រសួងសុខាភិបាល ទទួលបន្ទុកការងារបច្ចេកទេសសេវាសុខភាពបឋមនៅកម្រិតមណ្ឌលសុខភាពក្នុងខេត្តចំនួន ១៣ រួមដំណើរដោយ ឯកឧត្តមវេជ្ជបណ្ឌិត នាង ភារិទ្ធ រដ្ឋលេខាធិការក្រសួងសុខាភិបាល និងលោកជំទាវវេជ្ជបណ្ឌិត ចាន់ សុខា អនុរដ្ឋលេខាធិការក្រសួងសុខាភិបាល បានបំពេញដំណើរបេសកកម្មក្នុងខេត្តសៀមរាប ដើម្បីចុះពង្រឹងគុណភាពសេវាតាមមណ្ឌលសុខភាព សំដៅជំរុញបង្កើនការថែទាំសុខភាពបឋម។

តាមរយៈដំណើរបេសកកម្មនេះ លោកជំទាវ បានដឹកនាំក្រុមការងារចុះពិនិត្យ និងណែនាំការកែលម្អមណ្ឌលសុខភាពចំនួន ៤កន្លែងក្នុងការិយាល័យសុខាភិបាលស្រុកប្រតិបត្តិសៀមរាបផ្ទាល់ រួមមានមណ្ឌលសុខភាព ទឹកវិល កណ្ដែក បាគង និងបឹងធំ រីឯ ៤កន្លែងទៀតក្នុងការិយាល័យសុខាភិបាលស្រុកប្រតិបត្តិសូត្រនិគម ដែលមានមណ្ឌលសុខភាពស្ពានត្នោត ល្វែងឬស្សី សង្វើយ ដែលចុះពិនិត្យដោយ ឯកឧត្តមវេជ្ជបណ្ឌិត នាង ភារិទ្ធ រដ្ឋលេខាធិការក្រសួងសុខាភិបាល និងលោកជំទាវវេជ្ជបណ្ឌិត ចាន់ សុខា អនុរដ្ឋលេខាធិការក្រសួងសុខាភិបាល និងមណ្ឌលសុខភាពខ្ចាស់ ដែលដឹកនាំចុះពិនិត្យដោយលោកជំទាវវេជ្ជបណ្ឌិត ឱ វណ្ណឌីន ផ្ទាល់តែម្តង។

ក្នុងដំណើរបេសកកម្មនេះ លោកជំទាវក៏បានជួបប្រជុំជាមួយប្រធានមន្ទីរ និងអនុប្រធានមន្ទីរសុខាភិបាលខេត្ត អភិបាលរងស្រុក នាយករងដ្ឋបាល ស្រុកសូត្រនិគម ប្រធាន និងអនុប្រធានការរិយាល័យសុខាភិបាលស្រុកសូត្រនិគម លោកប្រធានមណ្ឌលសុខភាព និងមេឃុំខ្ចាស់ ដែលជាប្រធានគណ:កម្មការគ្រប់គ្រងមណ្ឌលសុខភាពខ្ចាស់ផងដែរលេីការងារកែលម្អគុណភាពសេវាមណ្ឌលសុខភាព ។

បន្ទាប់មក លោកជំទាវ រដ្ឋលេខាធិការ បានជួបពិភាក្សាការងារកែលម្អគុណភាពសេវាមណ្ឌលសុខភាព និងការជំរុញបង្កេីនការថែទាំសុខភាពបឋម ព្រមទាំងការជំរុញការអប់រំសុខភាព ដោយដាក់តាំងសារ “តិចអំបិល តិចខ្លាញ់ តិចស្ករ” នៅលេីតុតាមភោជនីយដ្ឋានក្នុងស្រុកសូត្រនិគម ជាមួយលោកអភិបាលស្រុកសូត្រនិគមផ្ទាល់ បន្ថែមទៀត។

នៅក្នុងជំនួបពិភាក្សាគ្នាដោយឡែកនេះ ក្រៅពីការថ្លែងនូវអំណរគុណជាអនេកនូវការចូលរួមចំណែកដាក់ប៉ាណូ “តិចអំបិល តិចខ្លាញ់ តុចស្ករ” ធំជាងគេបង្អស់ នៅលើដងផ្លូវជាតិ របស់លោកអភិបាលស្រុក តំណាងមន្ទីរសុខាភិបាលខេត្ត លោកប្រធានស្រុកប្រតិបត្តិ និងរដ្ឋបាលស្រុកសូត្រនិគម បានបង្ហាញនូវឆន្ទ:ចូលរួមជំរុញ គាំទ្រ និងអនុវត្តន៍ការងារកែលម្អសេវសសុខាភិបាល ដោយការពេញចិត្ត ហើយទទួលយកនូវចំណុចសំខាន់ៗនៃការកែលម្អគុណភាពសេវាមណ្ឌលសុខភាព ដែលលោកជំទាវរដ្ឋលេខាធិការបានលេីកជូន ដោយនឹងជួយពិនិត្យបន្ថែមទៀតទៅលើការងារកែលម្អមណ្ឌលសុខភាព ហើយក៏បានឯកភាពជ្រើសរើសឃុំណាមួយនៅក្នុងស្រុកសូត្រនិគម ឱ្យក្លាយទៅជាឃុំគំរូនៅក្នុងស្រុក ក្នុងការអនុវត្តជំរុញបង្កើនការថែទាំសុខភាពបឋម រួមទាំងបានប្ដេជ្ញាចិត្តរៀបចំមណ្ឌលសុខភាពខ្ចាស់ បន្ថែមលើមណ្ឌលសុខភាពផ្សេងៗទៀតដែលស្ថិតនៅក្នុងស្រុកសូត្រនិគមដែលស្រុកប្រតិបត្តិបានកំណត់រួចហើយនោះ ឱ្យក្លាយទៅជាមណ្ឌលសុខភាពផ្ដល់សេវាសុខាភិបាលសាធារណៈល្អប្រសើរ នៅដំណាក់កាលទី១ ក្នុងឆ្នាំ២០២៥ ហើយមណ្ឌលសុខភាពទាំងអស់នៅក្នុងស្រុកសូត្រនិគមនៃខេត្តសៀមរាបនេះ នឹងបន្តអនុវត្តន៍ជាបណ្តើរៗនូវការកែលម្អគុណភាពសេវា ពីស្ថានភាពមធ្យម ឱ្យទៅបានល្អ ប្រសើរ និងមិនសូវល្អ ឱ្យទៅបានសមរម្យផងដែរ៕