ឯកឧត្តម សរ គឹមសាន្ត ដឹកនាំសម្របសម្រួលប្រតិភូអន្តរក្រសួង ស្ថាប័ន ចុះស្វែងយល់ពីការគ្រប់គ្រង អភិរក្សធនធានជលផល ក្នុងតំបន់អភិរក្សជលផលអតីតឡូត៍លេខ២ ខេត្តបាត់ដំបង
ភ្នំពេញ៖ ឯកឧត្តម សរ គឹមសាន្ដ អគ្គលេខាធិការ តំណាងដ៏ខ្ពង់ខ្ពស់ឯកឧត្តមរដ្ឋមន្ត្រី ថោ ជេដ្ឋា ប្រធានអាជ្ញាធរទន្លេសាប រួមជាមួយឯកឧត្តម សឿម ប៊ុនរិទ្ធិ អភិបាលរងខេត្តបាត់ដំបង នាថ្ងៃទី១៨ ខែតុលា ឆ្នាំ២០២៤ បានអញ្ជើញដឹកនាំសម្របសម្រួលប្រតិភូអន្តរក្រសួង ស្ថាប័ន អង្គភាពជំនាញថ្នាក់ក្រោមជាតិ អាជ្ញាធរស្រុក ឃុំ កងកម្លាំងសមត្ថកិច្ច និងមន្រ្តីក្រុមការងារបច្ចេកទេសអាជ្ញាធរទន្លេសាប ចុះសិក្សាស្វែងយល់ពីការគ្រប់គ្រង អភិរក្សធនធានជលផលក្នុងតំបន់អភិរក្សជលផលអតីតឡូត៍លេខ២ (តំបន់ស្នូលព្រែកទាល់) ស្ថិតក្នុងឃុំកោះជីវាំង ស្រុកឯកភ្នំ ខេត្តបាត់ដំបង។
ការសិក្សាស្វែងយល់នេះ មានការអញ្ជើញចូលរួមពី ឯកឧត្តម អគ្គលេខាធិការរងអាជ្ញាធរទន្លេសាប លោក លោកស្រី ជាតំណាងក្រសួងធនធានទឹក និងឧតុនិយម ក្រសួងអភិវឌ្ឍន៍ជនបទ ក្រសួងបរិស្ថាន រដ្ឋបាលជលផល គណៈកម្មាធិការជាតិទន្លេមេគង្គកម្ពុជា អង្គការ FACT មន្ទីរ-អង្គភាពជំនាញពាក់ព័ន្ធជុំវិញខេត្តបាត់ដំបង កងកម្លាំងទាំង៣ប្រភេទ អាជ្ញាធរមូលដ្ឋានស្រុកឯកភ្នំ អាជ្ញាធរឃុំកោះជីវាំង ខណ្ឌជលផល-ផ្នែកជលផល-សង្កាត់ជលផលព្រែកទាល់ សហគមន៍នេសាទ ប្រជាសហគមន៍ មានចំនួនសរុប ៥១ នាក់។
ក្នុងឱកាសនោះដែរ ឯកឧត្តម អគ្គលេខាធិការបានជម្រាបជូនប្រតិភូអំពីបេសកកម្មការងាររបស់អាជ្ញាធរទន្លេសាប ដែលរាជរដ្ឋាភិបាលបានប្រគល់ជូន ក្នុងការយកចិត្តទុកដាក់លើសារៈសំខាន់នៃធនធានធម្មជាតិ ជីវចម្រុះ និងសក្តានុពលក្នុងតំបន់បឹងទន្លេសាប ដែលជាប្រភពផ្តល់នូវធនធានជលផល ដែលបាន និងកំពុងរងការគំរាមកំហែងនាពេលបច្ចុប្បន្ន បណ្តាលមកពីបម្រែបម្រួលអាកាសធាតុ ទឹកបឹងទន្លេសាបគោករាក់នៅរដូវប្រាំង និងកំណើនប្រជាពលរដ្ឋជាដើម ដែលមូលហេតុទាំងនេះបង្កឱ្យផលស្តុកធនធានជលផលធ្លាក់ចុះ និងប៉ះពាល់មកលើប្រព័ន្ធអេកូឡូស៊ីបឹងទន្លេសាប។
ដោយឡែក តំបន់អភិរក្សជលផលដែលជាអតីតឡូត៍នេសាទលេខ២ (តំបន់ស្នូលព្រែកទាល់) នេះ ត្រូវបានរាជរដ្ឋាភិបាល សម្រេចលុបចោលតាមអនុក្រឹត្យលេខ ៣៧ អនក្រ.បក ចុះថ្ងៃទី ៧ ខែមីនា ឆ្នាំ២០១២ ដែលមានផ្ទៃដីទំហំ ៥០ ១៣៤ ហិកតា លាតសន្ធឹងក្នុងស្រុកឯកភ្នំ និងស្រុកសង្កែ ខេត្តបាត់ដំបង។ តំបន់អភិរក្សជលផលនេះ មានលក្ខណៈសមស្របសម្រាប់ជាកន្លែងជួយថែរក្សាពូជមច្ឆជាតិ និងជីវចម្រុះគ្រប់ប្រភេទ ដើម្បីជួយបង្កើនបរិមាណផលស្តុកជលផល ការទ្រទ្រង់ជីវភាពរស់នៅរបស់ប្រជាជន និងសេដ្ឋកិច្ចជាតិ។
សូមជម្រាបថា ការយកចិត្តទុកដាក់របស់រាជរដ្ឋាភិបាលក្នុងការការពារ ថែរក្សា និងគ្រប់គ្រងតំបន់បឹងទន្លេសាប ជាពិសេសការលើកយកនូវអនុសាសន៍ និងសេចក្តីអំពាវនាវដ៏ថ្លៃថ្លាបំផុតរបស់សម្តេចមហាបវរធិបតី នាយករដ្ឋមន្រ្តី កាលពីថ្ងៃទី២១ ខែសីហា ឆ្នាំ២០២៤ ចំពោះវិធានការចូលរួមទប់ស្កាត់ការទន្រ្ទានដីព្រៃលិចទឹក ចូលរួមថែរក្សា និងការពារបឹងទន្លេសាប គឺជាការចូលរួមរក្សាធនធានជលផល និងសន្តិសុខស្បៀងសម្រាប់ប្រជាពលរដ្ឋ ក៏ដូចជាសន្តិសុខទឹកសម្រាប់ការប្រើប្រាស់ និងស្រោចស្រព ព្រមទាំងរក្សាបាននូវតុល្យភាពប្រព័ន្ធអេកូឡូស៊ីបឹងទន្លេសាប។
សូមបញ្ជាក់ថា ក្នុងស្មារតីយកចិត្តទុកដាក់ខ្ពស់ចំពោះតំបន់អភិរក្សជលផលក្នុងតំបន់បឹងទន្លេសាប ត្រូវមានកិច្ចសហការចូលរួមអនុវត្តដោយម៉ឺងម៉ាត់ពីក្រសួង ស្ថាប័ន ពាក់ព័ន្ធក្នុងការចាត់វិធានការការពារ ទប់ស្កាត់បទល្មើសនេសាទក្នុងតំបន់បឹងទន្លេសាបដើម្បីធានាបាននូវភាពសម្បូរបែបនៃធនធានជលផល ក៏ដូចជាប្រភេទត្រីកម្រដែលជិតផុតពូជ និងសម្រេចបាននូវការថែរក្សា ការបង្កើនផលស្តុកសម្រាប់ប្រើប្រាស់យូរអង្វែង ព្រមទាំងធានាបាននូវប្រភពប្រូតេអ៉ីន និងជីវភាពរស់នៅសម្រាប់បន្តដល់កូនចៅជំនាន់ក្រោយ៕
