យោធិនចំនួន ៤០៨រូប កងពលពលធំអន្តរាគមន៍លេខ៣ ត្រូវបានចូលនិវត្តន៍ ឆ្នាំ២០២៤
ភ្នំពេញ៖ នៅព្រឹកថ្ងៃទី១៨ ខែតុលា ឆ្នាំ២០២៤ ឧត្តមសេនីយ៍ឯក ស្រី ឌឹក មេបញ្ជាការរង កងទ័ពជើងគោក មេបញ្ជាការ កងពលធំអន្តរាគមន៍លេខ៣ បានអញ្ជើញជាអធិបតីភាព ក្នុងពិធីសំណេះសំណាល បំពាក់ឋានន្តរសក្តិ និងគ្រឿងឥស្សរិយយស នៅទីបញ្ជាការកងពលធំអន្តរាគមន៍លេខ៣ សរុបចំនួន ៤០៨រូបរួមមាន៖
– ថ្នាក់ឧត្ដមសេនីយ៍ទោ ចំនួន៣រូប
– ថ្នាក់ឧត្តមសេនីយ៍ត្រី ចំនួន ០៨ រូប(ពិការ ០២រូប)
– ថ្នាក់វរសេនីយ៍ឯក ចំនួន១៣ រូប
– ថ្នាក់វរសេនីយ៍ទោ ចំនួន ២៥ រូប
– ថ្នាក់វរសេនីយ៍ត្រីចំនួន ៣២ រូប
– ថ្នាក់អនុសេនីយ៍ឯក ចំនួន៤៩ រូប
– ថ្នាក់អនុសេនីយ៍ទោ ចំនួន៤៦ រូប( ស្រីចំនួន ០១រូប)
– ថ្នាក់អនុសេនីយ៍ត្រី ចំនួន ៥១ រូប
– ថ្នាក់នាយចំណង់ ចំនួន១៧៨ រូប
– ថ្នាក់ព្រឹន្ទបាលឯក ចំនួន ៣ រូប
ក្នុងនាមនាយឧត្តមសេនីយ៍ ម៉ៅ សុផាន់ អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការ កងទ័ពជើងគោក ឧត្តមសេនីយ៍ឯក ស្រី ឌឹក មេបញ្ជាការរង កងទ័ពជើងគោក មេបញ្ជាការ កងពលធំអន្តរាគមន៍លេខ៣ បានថ្លែងនូវការកោតសរសើរចំពោះស្នាដៃ គុណបំណាច់ដ៏ធំធេង មិនអាចកាត់ថ្លៃបាន របស់បងប្អូនដែលបាន ពុះពារការលំបាក គ្រោះថ្នាក់ ឧបសគ្គគ្រប់បែបយ៉ាង ហ៊ានពលីជីវិត ដើម្បីបុព្វហេតុ ក្នុងកិច្ចការពារបូរណភាពទឹកដី ជាតិមាតុភូមិ និងប្រជាជន ។
ឧត្តមសេនីយ៍ឯក ស្រី ឌឹក បានមានប្រសាសន៍ បន្តទៀតថា ការដាក់យោធិនចូលនិវត្តន៍ឲ្យទៅរស់នៅស្ថាប័នស៊ីវិល ស្របតាមគោលនយោបាយ របស់រាជរដ្ឋាភិបាល និងផែនការកែទម្រង់របស់ កងយោធពលខេមរភូមិន្ទ ក្នុងនោះ ឯកឧត្តម ក៏បានលើកឡើងអំពីគុណបំណាច់ និងស្នាដៃរបស់បងប្អូនយោធិន ដែលបានរួមចំណែកក្នុងភារកិច្ច ការពារជាតិ មាតុភូមិ និងកសាងអភិវឌ្ឍន៍អង្គភាពបាន រីកចម្រើនលើគ្រប់វិស័យ ។
ឯកឧត្តម បានផ្តាំផ្ញើថា៖ ពេលបងប្អូនវិលត្រឡប់ទៅមូលដ្ឋានវិញ ត្រូវធ្វើខ្លួនឲ្យក្លាយជាពលរដ្ឋដ៏ល្អ របស់សង្គមជាតិ ដោយត្រូវគោរពច្បាប់នានារបស់រដ្ឋឲ្យបានល្អ ខិតខំបំពេញការងារបង្ករបង្កើនផល និងប្រកប របររកស៊ីចិញ្ចឹមជីវិតប្រកប ដោយភាពសុច្ចរិត ចូលរួមគ្រប់សកម្មភាពសង្គម ជាពិសេស ត្រូវចូលរួមចុះ ឈ្មោះបោះឆ្នោត និងត្រូវទៅបោះឆ្នោត ជ្រើសរើសតំណាងរាស្ត្រគ្រប់ៗអាណត្តិ ។
ក្នុងឱកាសនោះឧត្តមសេនីយ៍ឯក ស្រី ឌឹក បាននាំយកអំណោយថវិការដ៏ថ្លៃថ្លា របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និង លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ឧបត្ភម្ភថវិកាជូនចំពោះយោធិនដែលត្រូវចូលសោធននិវត្តន៍ ក្នុងម្នាក់ ២០០,០០០រៀល និងថវិកាឧបត្ភម្ភបន្ថែមក្នុងម្នាក់ ១០០,០០០រៀល ជាថវិការបស់កងពលធំអន្តរាគមន៍លេខ៣ និងកងពលតូចអន្តរាគមន៍ចំណុះទាំង៣ ៕