សម្តេចធិបតី អំពាវនាវដល់យុវជនកាកបាទក្រហម បន្តការយកចិត្តទុកដាក់ សិក្សារៀនសូត្រមុខជំនាញ ឱ្យបានច្បាស់លាស់ និងចូលរួមលើកកម្ពស់វប្បធម៌ អរិយធម៌ ប្រពៃណីជាតិ

ភ្នំពេញ៖ ក្នុងឱកាសដែល អញ្ជើញចូលរួមជាអធិបតីភាព ក្នុងពិធីបំពាក់កន្សែងយុវជនកាកបាទក្រហមកម្ពុជា មកពីគ្រឹះស្ថានឧត្តមសិក្សាចំនួន៤,៧៤២នាក់ ក្នុងនោះមាននារី ៣,១០៦នាក់ នាព្រឹកថ្ងៃទី១៩ ខែតុលា ឆ្នាំ២០២៤នេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានអំពាវនាវដល់យុវជនកាកបាទក្រហម សូមបន្តការយកចិត្តទុកដាក់ ក្នុងការសិក្សារៀនសូត្រមុខជំនាញ ឱ្យបានច្បាស់លាស់ និងចូលរួមលើកកម្ពស់វប្បធម៌ អរិយធម៌ ប្រពៃណីជាតិ។

សម្តេចធិបតី ហ៊ុន ម៉ាណែត ក៏បានអំពាវនាវយុវជនកាកបាទក្រហម ត្រូវបន្តរួមគ្នាក្នុងការ បណ្តុះឧត្តម គតិ និងស្មារតីឯកភាពជាតិ ស្រឡាញ់វប្បធម៌សន្តិភាព មានមនសិកា និងឆន្ទៈ ក្នុងការការពារ បុព្វ ហេតុដ៏ត្រឹមត្រូវ របស់រាជរដ្ឋាភិបាលស្របច្បាប់។បន្ថែមពីនោះទៀត ត្រូវរួមគ្នាប្រឆាំងឱ្យបានជាដាច់ខាត នូវព័ត៌មាន ក្លែង ក្លាយបំពុលសង្គម ពិសេសក្នុងស្ថានភាពបច្ចុប្បន្ន ដែលអាចធ្វើឱ្យមានចលាចលសង្គម ប្រទេសជាតិបែកបាក់ និងប៉ះពាល់អនាគតយុវជនយើង។ នេះជាការបញ្ជាក់បន្ថែម របស់សម្តេចបវរធិបតី ហ៊ុន ម៉ាណែត។

សម្តេចធិបតី បានអំពាវនាវដល់យុវជនកាកបាទក្រហម រៀនគិតពិចារណាស្រាវជ្រាវ ឱ្យបានល្អិតល្អន់មុនជឿលើរឿងអ្វីមួយ ហើយត្រូវចេះស្រឡាញ់ជាតិ តែមិនត្រូវជ្រុលនិយម។

លើសពីនោះទៀត សម្តេចធិបតី បានប្រាប់ដល់យុវជន ត្រូវលើកតម្កើងគំនិតវិជ្ជមាន កុំអង្គុយខ្វល់នឹងគេចង់ធ្វើអ្វីមកលើយើង ឬទៅរកវិធីបំផ្លាញគេ គឺត្រូវប្រឹងប្រែងពង្រឹងសមត្ថភាព ពង្រឹងសាមគ្គី ប្រឹងប្រែងផលិត បង្កើត និងផ្សព្វផ្សាយអ្វីដែលខ្លួនមាន។

សូមជម្រាបថា យុវជនកាកបាទក្រហមកម្ពុជា គឺជាអ្នកស្ម័គ្រចិត្តវ័យក្មេង និងជាសមាសភាគមួយនៃ បណ្តាញអ្នកស្ម័គ្រចិត្ត កាក បាទក្រហម និងអឌ្ឍចន្ទក្រហម ដែលបច្ចុប្បន្ន មានជាង១៦លាននាក់ នៅទូទាំងសកលលោក។
យុវជនកាកបាទក្រហមកម្ពុជា ត្រូវ បានចាត់ទុកជាឆ្អឹងខ្នងរបស់ចលនាអន្តរជាតិកាកបាទក្រហម និងអឌ្ឍចន្ទក្រហម និងជាកម្លាំង ស កម្ម ជួរ មុខ ក្នុងប្រតិបត្តិការមនុស្សធម៌ នៅគ្រប់កាលៈទេសៈ៕