ប្រទេសសហភាពអឺរ៉ុប ថ្កោលទោសការវាយប្រហារលើ UNIFIL និងបានយល់ព្រមដាក់សម្ពាធលើអ៊ីស្រាអែល
ព្រុចសែល៖ ទីភ្នាក់ងារព័ត៌មានចិនស៊ិនហួ បានចុះផ្សាយនៅថ្ងៃទី១៩ ខែតុលា ឆ្នាំ២០២៤ថា បណ្តាប្រទេសនៃសហភាពអឺរ៉ុប (EU) ដែលផ្តល់ជំនួយដល់កងកម្លាំងបណ្តោះអាសន្នរបស់អង្គការសហប្រជាជាតិ នៅក្នុងប្រទេសលីបង់ (UNIFIL) បានថ្កោលទោសការវាយប្រហារលើទីតាំង UNIFIL និងបានយល់ព្រមបង្កើនសម្ពាធលើអ៊ីស្រាអែល ដើម្បីជៀសវាងឧបទ្ទវហេតុបន្ថែមទៀត ពាក់ព័ន្ធនឹងបេសកកម្ម។
នាយករដ្ឋមន្ត្រីអ៊ីតាលី លោកស្រី Giorgia Meloni បានទៅបំពេញទស្សនកិច្ចនៅលីបង់កាលពីថ្ងៃសុក្រ។ នៅក្នុងសន្និសីទសារព័ត៌មានរួមគ្នាមួយ បន្ទាប់ពីបានជួបជាមួយនាយករដ្ឋមន្ត្រីចាំផ្ទះលីបង់ Najib Mikati លោកស្រី Meloni បានអំពាវនាវឱ្យមានការអនុវត្តពេញលេញ និងភ្លាមៗនៃដំណោះស្រាយក្រុមប្រឹក្សាសន្តិសុខអង្គការសហប្រជាជាតិ ដោយជំរុញឱ្យភាគីទាំងអស់ធានាសុវត្ថិភាព និងសន្តិសុខរបស់ UNIFIL។
លោកស្រីបានបន្តថា ការកំណត់គោលដៅរបស់ UNIFIL គឺមិនអាចទទួលយកបានទេ ហើយខ្ញុំសូមអំពាវនាវម្តងទៀតឱ្យភាគីទាំងអស់ធ្វើការដើម្បីធានាសុវត្ថិភាព និងសន្តិសុខរបស់ទាហានទាំងនេះ។
ប្រទេសចំនួន១៦ នៃសហភាពអឺរ៉ុបបានយល់ព្រមបង្កើនសម្ពាធផ្នែកនយោបាយ និងការទូតលើអ៊ីស្រាអែល ដើម្បីជៀសវាងឧប្បត្តិហេតុបន្ថែមទៀតដែលពាក់ព័ន្ធនឹងបេសកកម្ម UNIFIL។ ការសម្រេចចិត្តនេះត្រូវបានសម្រេចបន្ទាប់ពីសន្និសីទវីដេអូដែលដឹកនាំដោយរដ្ឋមន្ត្រីការពារជាតិអ៊ីតាលី លោក Guido Crosetto និងសមភាគីបារាំង លោក Sebastien Lecornu កាលពីថ្ងៃពុធ។