សម្ដេចធិបតី កោតសរសើរចំពោះគណៈកម្មការរៀបចំការប្រកួតកីឡាយុទ្ធគុនចម្រុះខ្មែរបុរាណ
ភ្នំពេញ៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រី នៃព្រះរាជាណាចក្រកម្ពុជា បានសម្ដែងនូវការកោតសរសើរចំពោះគណៈកម្មការរៀបចំការប្រកួតកីឡាយុទ្ធគុនចម្រុះខ្មែរបុរាណ ដែលប្រព្រឹត្តទៅបានដោយជោគជ័យ ក្នុងរយៈពេល៣ថ្ងៃកន្លងមកនេះ។
ក្នុងឱកាសអញ្ជើញជាបិទការប្រកួតកីឡាយុទ្ធគុនចម្រុះខ្មែរបុរាណ «ពានរង្វាន់សម្ដេចបវរធិបតី» លើកទី១ ឆ្នាំ២០២៤ នៅពហុកីឡដ្ឋានជាតិអូឡាំពិក នារាត្រីថ្ងៃទី២០ ខែតុលា ឆ្នាំ២០២៤នេះ សម្ដេចបវរធិបតី ហ៊ុន ម៉ាណែត សង្ឃឹមថា នៅឆ្នាំក្រោយនឹងមានការចូលរួមប្រកួតច្រើនជាងឆ្នាំលើកដំបូងនេះ។
សម្ដេចធិបតី នាយករដ្ឋមន្ត្រី បានអះអាងថា សម្ដេចបានតាមដានជាប់ជាប្រចាំតាមរយៈការផ្សាយផ្ទាល់ចេញពីទីលានប្រកួត ទោះបីសម្ដេចជាប់បេសកកម្មនៅក្រៅប្រទេស ក៏នៅតែឆ្លៀតពេលសម្រាកដើម្បីតាមដានការប្រកួតដ៏ល្អមួយនេះផងដែរ។
សម្ដេចធិបតី បានបញ្ជាក់ថា ក្នុងរយៈពេលខ្លី គណៈកម្មការរៀបចំបានល្អ ថែមទាំងមានការចូលរួមយ៉ាងច្រើនកុះករសំណាក់កីឡាការ ដែលមកពីបណ្ដាសហព័ន្ធផ្សេងៗ និងអង្គភាពជាច្រើនទៀត សរុបចំនួន៥៥អង្គភាព/ក្លឹប/សហព័ន្ធ ដែលបានចូលរួម។
សម្ដេចធិបតី ហ៊ុន ម៉ាណែត បានកត់សម្គាល់ថា ការរៀបចំលើកដំបូងនៅឆ្នាំ២០២៤នេះ ដោយសារតែទីលានតូចគឺអាចកំណត់អ្នកចូលរួមប្រកួតត្រឹមជាង៤០០នាក់ប៉ុណ្ណោះ ប៉ុន្ដែសម្ដេចជឿជាក់ថា ផ្អែកតាមបទពិសោធន៍លើកដំបូងនេះ នៅឆ្នាំបន្ដបន្ទាប់នឹងអាចមានការចូលរួមប្រកួតច្រើនជាងនេះ។
ជាមួយគ្នានេះ សម្ដេចធិបតី ក៏បានថ្លែងអំណរគុណដល់ព្រឹទ្ធាចារ្យយុទ្ធគុនបុរាណ ចំនួន៣៥រូប ដែលបានចូលរួមចំណែកក្នុងការរៀបចំប្រកួត និងសម្ដែងក្នុងព្រឹត្តិការណ៍នេះ ៕
