អភិបាលរងខេត្តកំពង់ចាម អំពាវនាវដល់ អ្នកពាក់ព័ន្ធទាំងអស់ ផ្តោតការយកចិត្តទុកដាក់ឱ្យកាន់តែខ្លាំង លើការថែទាំមនុស្សចាស់
ភ្នំពេញ៖ លោកជំទាវ ប៉ាង ដានី អភិបាលរងខេត្តកំពង់ចាម អំពាវនាវដល់អាជ្ញាធរគ្រប់លំដាប់ថ្នាក់ និងអ្នកពាក់ព័ន្ធទាំងអស់ សូមផ្តោតការយកចិត្តទុកដាក់ឱ្យកាន់តែខ្លាំងថែមទៀត លើការថែទាំមនុស្សចាស់ ដោយរៀបចំឱ្យទៅជា ប្រព័ន្ធគ្រប់គ្រងចាត់ចែង ដើម្បីអាចធានាបានថាមនុស្សចាស់មានភាពកក់ក្តៅលើប្រព័ន្ធសេវាសម្រាប់ មនុស្សចាស់ របស់យើង។
ថ្លែងបែបនេះ នាឱកាស លោកជំទាវ តំណាងឯកឧត្តម អ៊ុន ចាន់ដា អភិបាល នៃគណៈអភិបាលខេត្តកំពង់ចាម អញ្ជើញ ចូលរួមក្នុង ពិធីអបអរសាទរ ទិវាមនុស្សចាស់កម្ពុជា និងទិវាមនុស្សចាស់អន្តរជាតិ ថ្ងៃទី១ ខែតុលា ក្រោមប្រធានបទ “មនុស្សចាស់ក្នុងបរិវត្តកម្មឌីជីថល” នាថ្ងៃ២១ ខែតុលា ឆ្នាំ២០២៤ នៅសាលាស្រុកស្ទឹងត្រង់ ខេត្តកំពង់ចាម។
លោកជំទាវ ប៉ាង ដានី មានប្រសាសន៍ថា ទិវាមនុស្សចាស់កម្ពុជា និងទិវាមនុស្សចាស់អន្តរជាតិ ១ តុលា ត្រូវបានប្រារព្ធឡើងជារៀងរាល់ឆ្នាំ ក្នុងគោលបំណងលើកកម្ពស់ការយល់ដឹងជាសាធារណៈអំពីឱកាស និងបញ្ហាប្រឈមរបស់មនុស្សវ័យចាស់ និងជំរុញឱ្យគ្រួសារ សហគមន៍ និងគ្រប់ភាគីពាក់ព័ន្ធ យកចិត្តទុកដាក់ គិតគូរ និង ដោះស្រាយការលំបាកនានារបស់មនុស្សវ័យចាស់ តាមរយៈការរៀបចំគោលនយោបាយ ការផ្តល់សេវា នានាឆ្លើយតបនឹងតម្រូវការ និងការលើកកម្ពស់សុខុមាលភាពមនុស្សវ័យចាស់ឱ្យកាន់តែប្រសើរឡើង។
លោកជំទាវបន្តថា ក្នុងនាម ឯកឧត្តម អ៊ុន ចាន់ដា អភិបាល នៃគណៈអភិបាលខេត្ត សូមសំណូមពរ និងលើកទឹកចិត្តដល់គ្រប់ភាគីពាក់ព័ន្ធ ទាំងអស់ សូមផ្តោតការយកចិត្តទុកដាក់លើកិច្ចការសំខាន់ៗ រួមមាន ៖
១- មន្ទីរសង្គមកិច្ច អតីតយុទ្ធជន និងយុវនីតិសម្បទាខេត្ត ត្រូវសហការជាមួយរដ្ឋបាលក្រុង ស្រុក ឃុំ សង្កាត់ បន្តតាមដាន ត្រួតពិនិត្យ និងផ្តល់ជំនួយបច្ចេកទេសដល់សមាគមមនុស្សចាស់ឃុំ សង្កាត់ ដែលកំពុងដំណើរការ ឱ្យស្របតាមគោលការណ៍ណែនាំ ប្រកបដោយប្រសិទ្ធិភាព និងនិរន្តរភាព ជំរុញដល់សមាគមមនុស្សចាស់ឃុំ សង្កាត់ ដែលនៅសល់មិនទាន់ដំណើរការ ឱ្យដំណើរការ គ្រប់ ឃុំ សង្កាត់។
២- កៀរគររកសប្បុរសជន និងអង្គការដៃគូ ដើម្បីអនុវត្តសមាគមនុស្សចាស់ ការជំរុញកម្មវិធីអភិវឌ្ឍន៍មនុស្សចាស់តាមសហគមន៍ និងកម្មវិធីថែទាំមនុស្សចាស់តាមគ្រួសារឱ្យកាន់តែប្រសើរឡើង ដើម្បីរួមចំណែកលើកស្ទួយសុខុមាលភាព និងសកម្មភាព របស់មនុស្សចាស់នៅតាមសហគមន៍ ។
៣- លើកទឹកចិត្តឱ្យមានការអប់រំ បណ្តុះបណ្តាល និងបង្កើនចំណេះដឹង អំពីផលប៉ះពាល់ នៃបម្រែបម្រួលអាកាសធាតុដល់មនុស្សចាស់ និងផ្សព្វផ្សាយអំពីការត្រៀមខ្លួនឈានចូលវ័យចាស់។
៤- ជំរុញការធ្វើបរិវត្តកម្មឌីជីថលលើការអនុវត្តគម្រោងកម្មវិធី និងការផ្តល់សេវាកម្មតាម ប្រព័ន្ធបច្ចេកវិទ្យាឌីជីថល ដើម្បីផ្តល់ភាពងាយស្រួលដល់ប្រជាពលរដ្ឋទូទៅ ជាពិសេស ក្រុមជនរងគ្រោះ និងងាយរងគ្រោះ។
បើតាមរបាយការណ៍ របស់ លោក ទូច វឌ្ឍនា ប្រធានមន្ទីរសង្គមកិច្ច អតីតយុទ្ធជន និងយុវនីតិសម្បទាខេត្ត បានឲ្យដឹងថា មនុស្សចាស់អាយុចាប់ពី ៦០ឆ្នាំឡើង ដែល មានប័ណ្ណសមធម៌ចំនួន ១៩,៩២៥នាក់ក្នុងចំណោមមនុស្សចាស់សរុប ១៣២,៧៤៧នាក់ បានទទួលថវិកាប្រចាំខែពីកម្មវិធីជាតិជំនួយសង្គមក្នុងកញ្ចប់គ្រួសារ ដែលជាកម្មវិធីមួយរបស់រាជរដ្ឋាភិបាល។ លើសពីនេះមន្ទីរបានសហការបង្កើតសមាគមមនុស្សចាស់ចំនួន ១០៩ឃុំ សង្កាត់ ទូទាំងខេត្ត ក្នុងនោះសមាគមមនុស្សចាស់ដែលកំពុងដំណើរការយ៉ាងសកម្មមានចំនួន ១៩សមាគម ៕
