បុរសម្នាក់បើកម៉ូតូ បុកទ្រូងផ្លូវបណ្តាលឲ្យផ្លោងទៅចំណែកផ្លូវម្ខាងទៀត ត្រូវរថយន្តកិនស្លាប់តែម្តង
ភ្នំពេញ៖ វេលាម៉ោង ៤:២០នាទីទៀបភ្លឺ ថ្ងៃទី២២ ខែតុលា ឆ្នាំ២០២៤ មានករណី គ្រោះថ្នាក់ចរាចរណ៍ រវាងរថយន្ត និងម៉ូតូ បណ្តាលឲ្យបុរស ១នាក់ បានស្លាប់បាត់បង់ជីវិត ។ ហេតុការណ៍ លើផ្លូវជាតិលេខ៣ ចន្លោះគីឡូម៉ែត្រលេខ ៣៤-៣៥ ភូមិក្រាំងគាំ ឃុំត្បែង ស្រុកកណ្តាលស្ទឹង ខេត្ត កណ្តាល បានសុំឲ្យសមត្ថកិច្ចប្រចាំបញ្ជា HOTLINE ១១៧ ជួយអន្តរាគមន៍ ។
ក្រោយពេលកើតហេតុ កម្លាំងជំនាញចុះដល់កន្លែងកើតហេតុបានសម្រួលចរាចរណ៍ និងវាស់វែងយកម៉ូតូមករក្សាទុក បណ្តោះអាសន្ននៅអធិការដ្ឋាននគរបាលស្រុកកណ្តាលស្ទឹង ។
មុនពេលកើតហេតុគេឃើញម៉ូតូម៉ាក HONDA C125 ពណ៌ខ្មៅ ពាក់ផ្លាកលេខភ្នំពេញ 1HA-1638 បើកបរពីជើងទៅត្បូង ដល់ចំណុចកើតហេតុបាន បុកទ្រូងផ្លូវបណ្តាលឲ្យផ្លោងទៅចំណែកផ្លូវម្ខាងទៀត ត្រូវបានរថយន្តកិនស្លាប់តែម្តង ។ ក្រោយពេល កើតហេតុម្ចាស់រថយន្តបានបើកគេចខ្លួនបាត់ ទិសដៅពីត្បូងទៅជើង ។
តាមការសន្និដ្ឋានរបស់កម្លាំងជំនាញ បានបញ្ជាក់ថាមូលហេតុដែលបណ្ដាលឲ្យមានគ្រោះថ្នាក់ចរាចរណ៍នេះ គឺភាគីម៉ូតូបើកបរ ខ្វះការប្រុងប្រយ័ត្ន ចំណែករថយន្តបើកបរក្នុងល្បឿនលឿន ។ សពជនរងគ្រោះឈ្មោះ កៅ ចាន់ អាយុ២៤ឆ្នាំ មានទីលំនៅភូមិស្លោ សង្កាត់ស្មៅ ខណ្ឌកំបូល រាជធានៅភ្នំពេញ បានប្រគល់ជូនក្រុម គ្រួសារធ្វើបុណ្យតាមប្រពៃណី ៕